جۇما, 29 ناۋرىز 2024
بيلىك 4322 0 پىكىر 1 شىلدە, 2021 ساعات 11:32

اۋىل اكىمدەرىنىڭ كاسىبي بىلىكتىلىگىن ارتتىراتىن باعدارلاما ازىرلەندى

بيىل ەلىمىزدە اۋىل اكىمدەرىنىڭ سايلاۋى وتەتىنى بەلگىلى. وسى ورايدا سايلانعان اۋىل اكىمدەرىنىڭ جەكە جانە كاسىبي بىلىكتىلىگىن ارتتىرۋعا باعىتتالعان ارنايى باعدارلاما ازىرلەندى. بۇل تۋرالى قر پرەزيدەنتى جانىنداعى مەملەكەتتىك باسقارۋ اكادەمياسىنىڭ رەكتورى ەرلان ءابىل ءمالىم ەتتى. 

«اۋىل اكىمدەرىن سايلاۋ مەملەكەتتىك دامۋداعى ماڭىزدى كەزەڭنىڭ ءبىرى. ويتكەنى، اۋىل حالقى باسشىنى ءوزى تاڭدايدى، ولار ەلدىمەكەننىڭ جاعدايى مەن ونداعى ماسەلەنى شەشە الاتىن ازاماتتاردى جاقسى بىلەدى، وسى ورايدا حالىققا تاڭداۋ قۇقىعى بەرىلىپ وتىر. ونىڭ ۇستىنە بۇل ءۇردىس قازاقستاندا العاش رەت قولعا الىنىپ وتىر. ەكىنشىدەن، ورتالىقتاندىرىلعان مەملەكەتتىك باسقارۋ جۇيەسىمەن عانا جۇمىس ىستەمەي، سونىمەن قوسا جەرگىلىكتى اتقارۋشى ورگانداردىڭ قىزمەتىنە باسىمدىق بەرىلەدى. وزدەرىڭىز بىلەتىندەي، مەملەكەت باسشىسى ۇسىنعان «حالىق ۇنىنە قۇلاق اساتىن مەملەكەت» قاعيداتى بار، اۋىل اكىمدەرىن سايلاۋ سونىڭ جەمىسى دەسەكتە بولادى. ياعني حالىق اكىمدى سايلاۋ ارقىلى ءوز ءۇنىن بيلىككە جەتكىزىپ وتىر»، - دەدى ە. ءابىل.

ونىڭ ايتۋىنشا، اۋىل اكىمدەرىن سايلاۋدىڭ جاۋاپكەرشىلىگى زور جانە باستىسى ول اشىق ءارى ءادىل ءوتۋى ءتيىس.

«تاعى ءبىر ماڭىزدى ءسات، اۋىل اكىمدەرىن سايلاۋدا جاۋاپكەرشىلىك ورتالىق سايلاۋ كوميسسياسىنىڭ ەمەس جەرگىلىكتى سايلاۋ كوميسسياسىنىڭ موينىندا بولماق. ول دەگەنىمىز سايلاۋدىڭ ءادىل جانە اشىق تۇردە ءوتۋى، ونىڭ ناتيجەسىنىڭ حالىقتىڭ كوڭىلىنەن شىققانى ابزال. سونىمەن قاتار سايلاۋدا جەڭگەن اۋىل اكىمى حالىقپەن تىعىز قارىم-قاتىناستا جۇمىس ىستەپ، ولاردىڭ مۇڭ-مۇقتاجىن شەشۋگە تاۋەلدى بولادى، سەبەبى حالىق وعان ءۇمىت ارتىپ، ءوز داۋسىن بەردى. جانە اۋىل حالقى دا ءوز ماسەلەلەرىن شەشۋدە سايلاعان اكىممەن بىرلەسىپ قىزمەت ەتۋگە نيەتتى بولادى. جالپى اكىم حالىققا جاقىن بولۋى كەرەك. سونداي-اق كوشباسشىلىق قاسيەتتىڭ بولۋى دا مىندەتتى جانە كەز كەلگەن ماسەلەگە قاتىستى وڭتايلى شەشىم قابىلداي الۋى ءتيىس»، - دەيدى ول.

ودان بولەك، اكادەميا باسشىسى اۋىل اكىمدەرىنە ارنالعان بىلىكتىلىكتى ارتتىرۋ باعدارلاماسىنىڭ ازىرلەنگەنىن ايتتى.

«ءبىز ءوز تاراپىمىزدان اۋىل اكىمدەرىنە ەلدى باسقارۋدا قولداۋ كورسەتۋگە قاشاندا دايىنبىز. قازىرگى ۋاقىتتا ۇلتتىق ەكونوميكا مينيسترلىگىمەن بىرلەسىپ، سايلانعان اۋىل اكىمدەرىن جەكە جانە كاسىبي قۇزىرەتتىلىككە باۋليتىن ارنايى باعدارلامانىڭ جوباسىن ازىرلەدىك. بۇگىندە ول كەلىسۋ ۇستىندە، بەكىتىلگەن سوڭ اكىمگە كەرەكتى باستى 2 قۇزىرەتتى ۇيرەتەتىن بولامىز. الدىمەن جەكە باس قۇزىرەتتىلىگى. ول دەگەنىمىز سويلەسۋ، ءوزىن-ءوزى ۇستاۋ جانە كوشباسشىلىق قاسيەت. ەكىنشى، كاسىبي قۇزىرەتتىلىك. اكىم بولعاننان سوڭ ول مەملەكەتتىك ساتىپ الۋ، سالىق ساياساتى، بيۋدجەت كودەكسىن ءجىتى مەڭگەرۋى كەرەك، مىنە وسى ورايدا ءبىز وعان ءوز ءبىلىمىن جەتىلدىرۋىنە كومەكتەسەتىن بولامىز. اتالعان باعدارلامانى مەڭگەرۋ كۋرسى 120 ساعاتتان تۇرادى. جانە ونى وفلاين نەمەسە ونلاين تۇردە وتكىزۋ قاراستىرىلىپ وتىر، ول ەلدەگى كارانتيندىك احۋالعا بايلانىستى بولادى»، - دەدى رەكتور.

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1575
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2268
عيبىرات

قايسار رۋحتى عازيز جان

مۇحتار قۇل-مۇحاممەد 3577