جۇما, 29 ناۋرىز 2024
اقمىلتىق 6350 9 پىكىر 27 ماۋسىم, 2021 ساعات 11:44

سانكتسيا قىسپاعى: لۋكاشەنكو ارىپتەس ىزدەپ ابىگەرلەنۋدە

كەشە بەلارۋس پرەزيدەنتى الەكساندر لۋكاشەنكو مەن قازاقستان پرەزيدەنتى قاسىم-جومارت توقاەۆ تەلەفون ارقىلى سويلەستى. بۇل اقپاراتتى اقوردانىڭ ءباسپاسوز قىزمەتى حابارلادى.

رەسمي اقپاراتتارعا سۇيەنسەك، ەكى ەل پرەزيدەنتتەرى قازاقستان مەن بەلارۋس اراسىنداعى ساياسي ءھام ەكونوميكالىق قارىم-قاتىناستار جايىن، ستراتەگيالىق سەرىكتەستىك پەن وداقتاعى (ەكى مەملەكەت تە ەاەو-عا مۇشە – رەد.) بايلانىستاردىڭ قازىرگى احۋالى جانە ونى كۇشەيتۋدىڭ پەرسپەكتيۆالارىن تالقىلاعان.

اقوردا ءباسپاسوزىنىڭ ايتۋىنشا، بۇل جولعى اڭگىمەلەسۋگە الەكساندر لۋكاشەنكو كەڭسەسى باستاماشى بولعان.

«تاراپتار ءوزارا ساۋدا-ساتتىق كولەمىن ارتتىرۋعا، ماشينا جاساۋ، اۋىل شارۋاشىلىعى، كولىك جانە باسقا دا سالالارداعى بىرلەسكەن جوبالاردى جۇزەگە اسىرۋعا ءمان بەرە وتىرىپ،  ساۋدا-ەكونوميكالىق ىقپالداستىق پەن وندىرىستىك كووپەراتسيانى جان-جاقتى جانداندىرۋعا ەرەكشە نازار اۋداردى»، - دەلىنگەن رەسمي حابارلامادا.

بۇنىمەن قوسا، توقاەۆ پەن لۋكاشەنكو قازىرگى ەپيدەميولوگيالىق احۋال مەن حالىقتى جاپپاي ۆاكتسيناتسيالاۋ جايىن دا ءسوز ەتكەن.

ال بەلارۋس پرەزيدەنتىنىڭ رەسمي سايتى بۇل جايىندا: «قازاقستان مەن بەلارۋستىڭ وزگە مەملەكەتتەرمەن، سونىڭ ىشىندە رەسەي جانە قىتايمەن قارىم-قاتىناستارى جايىندا ءسوز بولدى. پرەزيدەنتتەر حالىقارالىق كۇن تارتىبىندەگى كەيبىر ماسەلەلەر بويىنشا پىكىر الماستى»، - دەپ جازادى.

تاقىرىپقا تۇزدىق رەتىندە ايتا كەتەيىك، 25 مامىردا ەۋرووداق بەلارۋستىڭ ماڭىزدى ەكونوميكالىق سەكتورلارىنا سانكتسيا سالعان ەدى. اتاپ ايتقاندا، بەلارۋستىڭ بانك، مۇناي، مۇناي-حيميا جانە كالي ءوندىرىسى سەكتورلارىن سانكتسيالاعان. سونىمەن قاتار، ەو بەلارۋستىڭ اسكەري ماقساتتارعا ارنالعان تاۋارلار مەن بارلىق اسكەري-تەحنيكالىق تاۋارلارىن  ەو اۋماعانا ساۋدالاۋعا تىيىم سالعان.

بۇل سانكتسيالار بەلارۋستەگى ازاماتتىق قوعامعا قارسى جاسالىپ جاتقان رەپرەسسيالار مەن مينسكىنىڭ Ryanair ۇشاعىن كۇشتەپ قوندىرۋ ارەكەتىنە جاۋاپ رەتىندە ەنگىزىلگەن. ايتا كەتەيىك، جولاۋشىلار تاسىمالىمەن اينالىساتىن Ryanair ۇشاعىن مينسكى اۋەجايىنا قوندىرۋعا بەلارۋس پرەزيدەنتى الەكساندر لۋكاشەنكو تىكەلەي بۇيرىق بەرگەن.

ال 22 ماۋسىم كۇنى ەو، ۇلىبريتانيا، كانادا مەن اقش بەلارۋسكە كەزەكتى سانكتسيالاردى جاريالاعان.

سەبەبىن: «سانكتسيالار Ryanair كومپانياسىنىڭ ۇشاعىن ءماجبۇرلى تۇردە قوندىرىپ، جۋرناليست رومان پروتاسەۆيچتى زاڭسىز تۇتقىنداۋىنا بايلانىستى ەنگىزىلدى»، - دەپ تۇسىندىرگەن باق.

مينيسترلەر كەڭەسى سانكتسيالىق تىزىمگە 86 كومپانيا مەن بىرقاتار لاۋازىمدى تۇلعالاردى قوسىپ، ولاردىڭ ەسەپشوتتارىن بۇعاتتاپ، ۆيزا بەرۋ مۇمكىندىگىنەن ايىراتىنى حابارلانعان.

اقش قارجى مينيسترلىگى سانكتسيالىق تىزىمگە 16 ادامدى قوسقان. ولاردىڭ ىشىندە شەنەۋنىكتەر مەن اسكەريلەر بار. لۋكاشەنكونىڭ ءباسپاسوز حاتشىسى ناتاليا ەيسمونت، كگب باسشىسى يۆان تەرتەل، كگب-نىڭ ارنايى «الفا» جاساعىنىڭ باسشىسى سەرگەي زۋبكوۆ، باس پروكۋرور اندرەي شۆەد، ىشكى اسكەر قولباسشىسى نيكولاي كارپەنكوۆ، ادىلەت ءمينيسترىنىڭ ورىنباسارى سەرگەي كالينوۆسكي، برەست ميليتسياسىنىڭ باسشىسى ميحايل گريب پەن ونىڭ ارىپتەسى الەكساندر استرەيكو جانە ورتالىق سايلاۋ كوميتەتىنىڭ جەتى وكىلى تىزىمگە ەنگەن.

ۇلىبريتانيا سىرتقى ىستەر مينيسترلىگى ءوز وداقتاستارىن قولداپ، مينسككە قارسى سانكتسيالاردى كۇشەيتەتىنىن مالىمدەدى. «جەتى ادام مەن ءبىر مەكەمەگە سانكتسيالار ۇشاقتى قوندىرعانى ءۇشىن، ال وزگە ءتورت شەنەۋنىككە ادام قۇقىعىن بۇزعانى ءۇشىن ەنگىزىلدى»، - دەپ مالىمدەدى ۇلىبريتانيا.

ەو سانكتسياسىندا بەلارۋستىڭ قورعانىس ءمينيسترى ۆيكتور حرەنين، كولىك جانە تاسىمالداۋ ءمينيسترى  الەكسەي اۆرامەنكو، ءىىم ورىنباسارى نيكولاي كارپەنكوۆ بار. بۇل جولى تىزىمگە لۋكاشەنكو وتباسى دا ەنگىزىلگەن. لۋكاشەنكونىڭ ۇلى دميتري مەن كەلىنى ليليا ەندى قارا تىزىمدە.

سانكتسيا قامىتىن «مينسك كولىك زاۋىتى» مەن ايگىلى «بەلاز»، مۇناي مەن تاۋار جەتكىزۋ سالاسىنداعى «ننك»، «لوگەكس»، «گلوبالكاستوممەنەدجمەنت» ، «برەمينو گرۋپپ»،  «سوحرا» كومپانيالارى كيدى.

باتىس ەلدەرى بۇل سانكتسيالاردى جالعاستىراتىنىن مالىمدەدى. الداعى تامىز ايىندا اۋقىمدى سانكتسيالار ەنگىزۋ مۇمكىندىكتەرىن قاراستىرىپ جاتىر.

Abai.kz

9 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1567
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2261
عيبىرات

قايسار رۋحتى عازيز جان

مۇحتار قۇل-مۇحاممەد 3542