جەكسەنبى, 1 تامىز 2021
1485 2 پىكىر 16 ماۋسىم, 2021 ساعات 14:15

ەلىمىزدە بالا قۇقىن قورعاۋ جونىندە جۇمىس توبى قۇرىلادى

قاۋىپسىزدىك كەڭەسىنىڭ اپپاراتى جانىنان بالا قۇقىعى مەن زاڭدى مۇددەسىن قورعاۋ، كامەلەتكە تولماعاندارعا قاتىستى قىلمىستىق قول سۇعۋشىلىقتىڭ الدىن الۋ جانە جولىن كەسۋ جونىندەگى ۆەدومستۆوارالىق جۇمىس توبى قۇرىلادى، – دەپ حابارلايدى اقوردانىڭ رەسمي سايتى.

حابارلامادا پرەزيدەنت جولداۋىندا بالالاردىڭ قاۋىپسىزدىگى مەن قۇقىعىن قورعاۋ ماسەلەلەرىنە ەرەكشە نازار اۋدارۋ، كامەلەتكە تولماعاندارعا قاتىستى زورلىق-زومبىلىققا بايلانىستى تەرگەلىپ جاتقان ءاربىر ءىستى باقىلاۋدى قامتاماسىز ەتۋ مىندەتىن قويعانى جازىلعان.

«وسى جۇمىستىڭ قازىرگى جاعدايىن تالقىلاۋ جانە ونى جەتىلدىرۋ بويىنشا شارالار ازىرلەۋ ماقساتىندا پرەزيدەنتتىڭ كومەكشىسى – قاۋىپسىزدىك كەڭەسىنىڭ حاتشىسى اسەت يسەكەشەۆ توراعالىق ەتكەن كەڭەس ءوتتى. كەڭەسكە بالا قۇقىقتارى جونىندەگى ۋاكىل ارۋجان ساين، جوعارعى سوت، باس پروكۋراتۋرا، ىشكى جانە سىرتقى ىستەر، ادىلەت، ءبىلىم جانە عىلىم مينيسترلىكتەرىنىڭ وكىلدەرى قاتىستى»، – دەپ حابارلاندى اقوردا سايتىندا.

كەڭەستە كامەلەتكە تولماعاندارعا قاتىستى زورلىق-زومبىلىققا قارسى ءىس-قيمىل، بالا ساۋداسى، سونداي-اق بالالار ءۇيى مەن ينتەرناتتاردا ءتيىستى جاعدايلاردى قامتاماسىز ەتۋ ماسەلەلەرى قارالدى.

«كەڭەس قورىتىندىسى بويىنشا قاۋىپسىزدىك كەڭەسىنىڭ اپپاراتى جانىنان بالالاردىڭ قۇقىقتارى مەن زاڭدى مۇددەلەرىن قورعاۋ، كامەلەتكە تولماعاندارعا قاتىستى قىلمىستىق قول سۇعۋشىلىقتىڭ الدىن الۋ جانە جولىن كەسۋ جونىندەگى بارلىق ۋاكىلەتتى ورگاننىڭ قىزمەتىن ۇيلەستىرۋ ءۇشىن تۇراقتى جۇمىس ىستەيتىن ۆەدومستۆوارالىق جۇمىس توبىن قۇرۋ تۋرالى شەشىم شىقتى.

سونداي-اق، مەملەكەتتىك ورگاندارعا كامەلەتكە تولماعاندارعا جىنىستىق تيىسپەۋشىلىككە قارسى قىلمىستار جاساعانى ءۇشىن جازاسىن وتەگەننەن كەيىن باس بوستاندىعىنان ايىرۋ ورىندارىنان بوساتىلعان ادامداردى باقىلاۋ مەن ەسەپكە الۋدى قامتاماسىز ەتۋ بويىنشا قوسىمشا شارالار قابىلداۋ تاپسىرىلدى»، – دەلىنگەن حابارلامادا.

Abai.kz

2 پىكىر

ۇزدىك ماتەريالدار