قازاقستان ۇكىمەتى بىرىككەن اراب امىرلىكتەرى مەن قاتاردىڭ ءتورت شەيحىنە ەلىمىزدىڭ قورىقتىق اۋماقتارىندا قىزىل كىتاپقا ەنگەن جەك دۋاداقتاردى يتەلگىمەن اۋلاۋعا رۇقسات بەرۋ تۋرالى قاۋلىنى قاراستىرىپ جاتىر. 

«جەك دۋاداققا ساياتشىلىق قۇرۋ تۋرالى» ۇكىمەت قاۋلىسىنىڭ جوباسى اشىق نقا سايتىندا جاريالاندى. قۇجاتقا سايكەس، 2021 جىلعى 1 قىركۇيەك – 15 قاراشا كەزەڭىندە تومەندەگى شەيحتارعا ەل اۋماعىندا اڭشىلىق جاساۋعا رۇقسات بەرىلگەن:

شەيح حاليفا بين زاەد ءال ناحايانعا (بىرىككەن اراب امىرلىكتەرى) تۇركىستان وبلىسىنداعى رەسپۋبليكالىق ماڭىزى بار ارىس جانە قاراقتاۋ مەملەكەتتىك قورىعى ايماعىنىڭ اۋماعىندا 97 (توقسان جەتى) داراق جەك دۋاداققا جانە جامبىل، قىزىلوردا جانە تۇركىستان وبلىستارىنداعى رەسپۋبليكالىق ماڭىزى بار وڭتۇستىك قازاقستان مەملەكەتتىك قورىعى ايماعىنىڭ اۋماعىندا 99 (توقسان توعىز) داراق جەك دۋاداققا.

شەيح سۋرۋر بين مۇحاممەد ءال ناحايانعا (بىرىككەن اراب امىرلىكتەرى) ماڭعىستاۋ وبلىسىنداعى رەسپۋبليكالىق ماڭىزى بار كەندىرلى-قاياسان مەملەكەتتىك قورىعى ايماعىنىڭ اۋماعىندا 52 (ەلۋ ەكى) داراق جەك دۋاداققا;

شەيح سەيف بين مۇحاممەد ءال ناحايانعا (بىرىككەن اراب امىرلىكتەرى) ماڭعىستاۋ وبلىسىنداعى رەسپۋبليكالىق ماڭىزى بار كەندىرلى-قاياسان مەملەكەتتىك قورىعى ايماعىنىڭ اۋماعىندا 51 (ەلۋ ءبىر) داراق جەك دۋاداققا.

شەيح دجاسەم بين حاماد بين حاليفا ءال تانيگە (قاتار) جامبىل وبلىسىنداعى رەسپۋبليكالىق ماڭىزى بار اڭداساي مەملەكەتتىك تابيعي قاۋمالىنىڭ اۋماعىندا 34 (وتىز ءتورت) داراق جەك دۋاداققا جانە الماتى جانە جامبىل وبلىستارىنداعى رەسپۋبليكالىق ماڭىزى بار جۋساندالا مەملەكەتتىك قورىعى ايماعىنىڭ اۋماعىندا 80 (سەكسەن) داراق جەك دۋاداققا ءوز يتەلگىلەرىمەن ساياتشىلىق قۇرۋعا رۇقسات بەرىلسىن. جەك دۋاداقتىڭ ءبىر داراعىن اۋلاۋ اقىسىنىڭ مولشەرلەمەسى 260 ايلىق (758 420 تەڭگە) ەسەپتىك كورسەتكىش مولشەرىندە بەلگىلەنگەن.

وسىلايشا، قۇجات ءتورت شەيحكە ارىس، قاراتاۋ، وڭتۇستىك قازاقستان، كەندىرلى-قاياسان، جۋساندالا مەملەكەتتىك قورعالاتىن تابيعي اۋماقتارى مەن رەسپۋبليكالىق ماڭىزى بار انداساي مەملەكەتتىك تابيعي رەزەرۆاتىنىڭ اۋماقتارىنداعى 413 جەك-دۋاداقتارىن تابيعاتتان الۋعا رۇقسات بەرۋدى قاراستىرىپ وتىر. قۇجات جوباسى 2021 جىلدىڭ 22 ماۋسىمىنا دەيىن قوعامدىق تالقىلاۋعا ۇسىنىلدى.

«قازاقستان رەسپۋبليكاسىنداعى سيتەس اكىمشىلىك ورگانى جويىلىپ كەتۋ قاۋپى تونگەن جابايى فاۋنا مەن فلورا تۇرلەرىمەن حالىقارالىق ساۋدا تۋرالى كونۆەنتسيانىڭ راسىمدەرىن ساقتاي وتىرىپ، يتەلگىمەن ساياتشىلىق قۇرۋ ءۇشىن جىرتقىش اۋشى قۇستاردىڭ قازاقستان رەسپۋبليكاسىنا اكەلىنۋى مەن قازاقستان رەسپۋبليكاسىنان اكەتىلۋىن قامتاماسىز ەتسىن.الماتى، جامبىل، قىزىلوردا، ماڭعىستاۋ جانە تۇركىستان وبلىستارىنىڭ اكىمدەرى كورسەتىلگەن ءىس-شارالاردى ۇيىمداستىرۋدا قاجەتتى جاردەم كورسەتسىن»، - دەلىنگەن قاۋلىدا.

قۇجات انىقتاماسىندا كورسەتىلگەندەي، شەيحتاردىڭ اڭشىلىعى ەل بيۋدجەتىنە قوماقتى كىرىس كىرۋىن قامتاماسىز ەتەدى.

«قاۋلى جوباسىن قابىلداۋ حالىقارالىق ىنتىماقتاستىقتى دامىتۋعا سەپتىگىن تيگىزەدى، سونداي-اق بيۋدجەتكە 313 227 460 تەڭگە كولەمىندە كىرىس كىرۋىن قامتاماسىز ەتەدى.قاۋلى جوباسى بەلگىلەنگەن تارتىپتە ادىلەت، قارجى، ۇلتتىق ەكونوميكا، ءبىلىم جانە عىلىم جانە سىرتقى ىستەر مينيسترلىكتەرىمەن كەلىسىلدى.قاۋلىنى قابىلداۋ تەرىس الەۋمەتتىك-ەكونوميكالىق جانە قۇقىقتىق سالدارلارعا الىپ كەلمەيدى»، - دەپ كورسەتىلگەن.

جەك دۋاداق - دۋاداقتار تۇقىمداسىنا جاتاتىن، دەنە ءپىشىنى ورتاشا، سالماعى 1 – 2,5 كگ قۇرايتىن قۇس ءتۇرى. قازاقستاندا مەكەندەيتىن جەكدۋاداقتار قىس مەزگىلىندە ارابيا، يران، يراك، پاكىستان شولدەرىنە ۇشىپ كەتەدى. ول جاقتا ولار اتاقتى اراب قىران اڭ اۋلاۋىنىڭ قىزىعۋشىلىق نىسانىنا اينالعان. ۇزدىكسىز اۋلاۋدىڭ زاردابىنان بۇل قۇستىڭ سانى ازايىپ، قازاقستاننىڭ قىزىل كىتابىنا ەنگىزىلگەن.

Abai.kz