بەيسەنبى, 28 ناۋرىز 2024
جاڭالىقتار 8319 0 پىكىر 7 مامىر, 2012 ساعات 07:56

داۋرەن قۋات. «جاۋجۇرەك مىڭ بالا»

كينو الەمىنە سەرگەك قاراپ وتىراتىن كورەرمەن قاۋىمنان ءسۇيىنشى سۇراماقپىز. تىرناق الدى تۋىندىسىن ەكشن جانرىندا باستاعان رەجيسسەر اقان ساتاەۆ قاي-قاشاندا «قازاقفيلمنىڭ» التىن قورىنان تابىلا بەرەتىن  «جاۋجۇرەك مىڭ بالا» اتتى تاماشا دۇنيەسىن تاسپالاپ ءبىتىرىپ، الماتى قالاسىنداعى «ارمان» كينوتەاترىندا تۇساۋكەسەرىن جاسادى. اتالعان ءفيلمنىڭ جارناماسى ءباسپاسوز بىتكەندى جاۋالاپ العالى دا ءبىراز بولعان. بۇل - رەجيسسەر باستاعان شىعارماشىلىق توپ پەن «قازاقفيلم» اكىمشىلىگىنىڭ كينو نارىعىنداعى جارناما اتتى «جارتى پاتاشالىقتىڭ» دا ءتىلىن  تۇسىنىپ جۇمىس ىستەگەنىن بىلدىرسە كەرەك.

فيلم، اتىنىڭ ءوزى ايگىلەپ تۇرعانداي، جاۋجۇرەك مىڭبالانىڭ الەم تاريحىندا ەڭ ۇزاققا سوزىلعان جويقىن ۇرىس - قازاق پەن جوڭعار سوعىسى كەزىندەگى ەرلىك تاعدىرىن پاش ەتەدى. وقىرمانعا تۇسىنىكتى بولۋ ءۇشىن «مىڭ بالا» وقيعاسىنىڭ جەلىسىمەن ويىمىزدى ورتاعا سالايىق.

كينو الەمىنە سەرگەك قاراپ وتىراتىن كورەرمەن قاۋىمنان ءسۇيىنشى سۇراماقپىز. تىرناق الدى تۋىندىسىن ەكشن جانرىندا باستاعان رەجيسسەر اقان ساتاەۆ قاي-قاشاندا «قازاقفيلمنىڭ» التىن قورىنان تابىلا بەرەتىن  «جاۋجۇرەك مىڭ بالا» اتتى تاماشا دۇنيەسىن تاسپالاپ ءبىتىرىپ، الماتى قالاسىنداعى «ارمان» كينوتەاترىندا تۇساۋكەسەرىن جاسادى. اتالعان ءفيلمنىڭ جارناماسى ءباسپاسوز بىتكەندى جاۋالاپ العالى دا ءبىراز بولعان. بۇل - رەجيسسەر باستاعان شىعارماشىلىق توپ پەن «قازاقفيلم» اكىمشىلىگىنىڭ كينو نارىعىنداعى جارناما اتتى «جارتى پاتاشالىقتىڭ» دا ءتىلىن  تۇسىنىپ جۇمىس ىستەگەنىن بىلدىرسە كەرەك.

فيلم، اتىنىڭ ءوزى ايگىلەپ تۇرعانداي، جاۋجۇرەك مىڭبالانىڭ الەم تاريحىندا ەڭ ۇزاققا سوزىلعان جويقىن ۇرىس - قازاق پەن جوڭعار سوعىسى كەزىندەگى ەرلىك تاعدىرىن پاش ەتەدى. وقىرمانعا تۇسىنىكتى بولۋ ءۇشىن «مىڭ بالا» وقيعاسىنىڭ جەلىسىمەن ويىمىزدى ورتاعا سالايىق.

جالپى تاريحتا «جوڭعار شاپقىنشىلىعى» اتالاتىن قالماق-ويراتتار مەن شىعىستان تونگەن جوڭعاردىڭ قالىڭ قولى قازاق اۋىلدارىنا قالاعان كەزىندە ويران سالىپ، الا-بۇلىك تۋدىرادى. سونداي ءبىر كەزەكتى قان-قاساپتىڭ قارا داۋىلىندا باس قاھارماننىڭ اكەسى مەن اناسىن قالماقتار ءولتىرىپ، جۇرەگىنە جۋىلماس كەكتىڭ كوز جاسىن قۇيىپ كەتە بارادى. دالادا قوي باعىپ جۇرگەن باس قاھارمان - سارتاي اكە-شەشەسىنەن دە، قاسىنداعى سەرىگىنەن دە ايرىلىپ، جان ساۋعالاپ قۇتىلادى. ءسويتىپ، سىرىن ىشىنە بۇككەن ەلسىز تاۋدىڭ قىران كوزى شالا بەرمەس شاتقالىن جايلاعان نازارداي قارتتىڭ ەتەگىن پانالاپ، وزىندەي ءوندىر جاستارمەن تۋىستاسادى.  ءار كۇنىن كورىك باسىپ، قىلىش قايراپ، نايزا ۇشتاۋمەن وتكەرەتىن نازار قارت (تىلەكتەس مەيراموۆ) قازاق قولى جوڭعارعا جاۋاپ قايتاراتىن ءساتتى سارىلا توسىپ قانا قويماي سارتاي، قورلان، تايماس دەگەن بالالاردى ات قۇلاعىندا ويناتىپ، ساداق تارتۋ، قىلىشتاسۋ، قۇيعىتىپ كەلە جاتىپ اي بالتا لاقتىرىپ، شالما تاستاۋدى ۇيرەتىپ، جاس ۇلانداردى جاۋىنگەرلىك رۋحتا تاربيەلەۋگە كىرىسەدى. ءبىر كۇنى نازاردىڭ ءۇش جەتىمەگى تاۋدان ەتەككە ءتۇسىپ، دالانى كورەدى. دالانىڭ كەڭ تىنىسىن سەزىنگەن ءۇش بوزداق «دۇنيە نەتكەن كەڭ ەدى» دەپ تامسانادى. تاۋدىڭ تار قولتىعىندا تىعىلىپ وسكەن «مىڭ بالاداعى» شەر كوكىرەك كوكورىم جاستاردىڭ جازيرا دالا مەن جارىق دۇنيەنىڭ كەڭدىگىنە ۇمتىلىسى وسىدان كەيىن الاش جۇرتىنىڭ ازاتتىعى ءۇشىن بولاتىن الاساپىران كۇرەسكە ۇلاسادى. ۇشەۋى جاۋدان كەك الماققا انتتاسادى. سول انتتاسۋدان كەيىن تۇلەيدى تۇندە تىنتكەن جولبارىستاي جورتىۋىلداپ باستاعان بۇل ۇشەۋ اڭ سوعىپ، ارەدىك قازاق اۋىلىن توناپ دانىككەن جاۋدى قاپىسىن تاۋىپ جايراتىپ كەتۋدى ماشىققا اينالدىرادى.

اڭ سوعىپ، قازاق اۋىلىن توناۋ دەگەننەن شىعادى، قازاق-قالماق  جاۋلىعىنىڭ ۇلى دالاعا ءتان تابيعاتى فيلمدە  شىنايى كورىنىس تاپقانىن ايتىپ وتۋگە ءتيىسپىز. قازاق ورداسى ءوز الدىنا ۇلىس اتانىسىمەن قانى قاتقان جوڭعار-ويرات بىردە ەكپىندەپ، بىردە دەسى قايتقانىن مويىنداي كەرى سەرپىلىپ، بىراق تىنباستان ءۇش جىز جىل تىنىشىمىزدى كەتىرىپتى. اسپان استىن ات تۇياعىنىڭ دۇبىرىنە تولتىرعان بۇنداي الامان سوعىستى الەم تاريحىنان تابۋ مۇمكىن ەمەس، بىراق، اقيقات - وسى. ارينە، ءۇش عاسىردىڭ ۇلى ارناسىندا قازاق پەن قالماق بىرىڭعاي قىلشتاسىپ، قيدالاسا بەرگەن جوق. ءدال سولاي ەتكەندە جەر بەتىنەن ەكى جاۋىنگەر حالىقتىڭ دا تۇقىم تۇياعى تۇزداي قۇريتىن ەدى. «جاۋجۇرەك مىڭ بالادان» دا ءبىز قازاق-قالماقتىڭ بىردە تاتۋ، بىردە قاتۋ قارىم-قاتىناسىن كورەمىز. راقىمجان بايدىڭ (تولەۋباي ارالباەۆ) اۋىلىنا توي تويلاپ بارعان نازاردىڭ ءۇش جەتىمەگى - سارتاي، قورلان، تايماس جوڭعار جاساقتارىنىڭ ات باسىن ىرىكپەي كەلىپ جونون باتۋردىڭ وسىنوۋ بەيبىت اۋىلدا تىعىز جۇمىسى بار ەكەندىگىن تەپسىنىپ تۇرىپ ەسكەرتىپ قايتقاندارىن ەستيدى. سويتسە، جونون باتۋر راقىمجان بايدىڭ تولىقسىپ بويجەتكەن قىزى زەرەنى بالاسىنا الىپ بەرمەك كورىنەدى. ال، زەرە العاش كورگەن بەتتە-اق اي جۇزىمەن سارتايدىڭ جانارىن ارباپ، جۇرەگىن جاندىرادى. ادەتتە ءبىزدىڭ رەجيسسەرلەر (اقان ساتاەۆقا دەيىنگى توقسانىنشى جىلداردىڭ تولقىنىندا تانىلعان كينوگەرلەرىمىزدى ايتامىن) قازاق تاريحىنا قاتىستى كينو تۇسىرە قالسا، سۇلى كوز، بۇيرەك بەت، قارا قوشقىل نەمەسە ماڭدايىن جەل، القىمىن كۇن قاپپاعان قالانىڭ ارشىن ءتوس اپپاق قىزدارىن ەكرانعا الەمىشتەپ شىعارا قويىپ جىنىڭا تيەتىن ەدى عوي، «مىڭ بالاداعى» زەرە سۇلۋلىعىمەن، سىپايى سىنىق مىنەزىمەن، اسىق جارى ءۇشىن تاعدىردىڭ قاتال سىنىنا تاۋكەل ەتە الاتىن قايسارلىعىمەن جانىڭدى ەگىلتەدى. سەبەبى جاس اكتريسا - ءاليا انۋاربەك زەرەدەي جاۋجۇرەك قازاق قىزىنىڭ كەيىپىنە بار بولمىسىمەن ەنىپ كەلبەتىمەن سۇيسىندىرەدى، كەمەلدىگىنە سەندىرەدى.

فيلمدە ەرلىك پەن ماحاببات قانا ەمەس، قاتىگەزدىك پەن قىزعانىش تا قاتار ءورىلىپ، قاپتالداسا ءجۇرىپ جاتادى. زەرەدەي سۇلۋدىڭ سارتايعا تىلەگىن قوسۋى، سارتايدىڭ قولباسسىلىقتى يەلەنۋى تايماس باتىردىڭ جانىن جەگىدەي جەي باستايدى. ونىڭ ۇستىنە،  قاتار قانات جازىسقان قورلان ارۋ دا سارتايدىڭ باعىن ۇستەپ، تايماستىڭ ساعىن سىندىرا تۇسەتىندەي. «بۇل ءوزى قالاي بولدى، - دەيدى تايماس سارتايدى زەرەنىڭ اۋىلىنا الداپ الىپ شىققان جولدا قاتار كەلە جاتىپ، - قولباسشىمىز دا سەن بولدىڭ، قورلاننىڭ دا سەن دەگەندە شىعارعا جانى بولەك». قىزعانىش تايماستىڭ قولىنا ساداق ۇستاتىپ، قورامساقتان سۇر جەبەنى سۋىرتادى. سۇر جەبەنى سۋىرعان تايماس سارتايدىڭ تۋ سىرتىنان تارتىپ كەپ جىبەرەدى. سارتاي قانسىراپ دالادا قالادى. كينوداعى وقيعا ءدال وسى تۇسقا جەتكەندە كورەرمەننىڭ ايگىلى «قىز جىبەك» فيلمىندەگى بەكەجانمەن قايتا جۇزدەسەتىنى داۋسىز. ويتكەنى، اكتەرلىك شەبەرلىك دەيتىن ءدارىستىڭ الىپبيىمەن  تولايىم تانىسىپ ۇلگەرمەگەن تالانتتى جاس  ايان وتەپبەرگەننىڭ (تايماس)  تەگەۋرىنى بەكەجانمەن بۋىنى بەكىپ، بۇعاناسى قاتقان شاعىندا «بەتتەسكەن» ءاسانالى ءاشىموۆتان كەم سوقپايدى. قۇداي ءتىل كوزدەن ساقتاسىن، قازاق كينوسىنا تاعى ءبىر عاجايىپ تالانت كەلدى. ول - ايان وتەپبەرگەن! «قازاقفيلم» بۇل بالادان كوز جازباي، شىعارماشىلىق قابىلەتىن شىڭداي تۇسسە، ءبىز اياننىڭ تالانتىنا ءالى تالاي قول سوعاتىن بولامىز.

اقان ساتاەۆ ايان وتەپبەرگەن سياقتى وجەت ۇلمەن بىرگە باس كەيىپكەر  سارتاي رولىندەگى اسىلحان تولەپوۆتى دە قاپىسىز تاپقان. قورلان - قۇرالاي اناربەكوۆا دا رەجيسسەردىڭ ءمىنسىز شەشىمىنە ەسەپ. كينوداعى تايماس - ايان وتەپبەرگەن جاۋعا مەيىرمسىز، قاتال، سۋىق، شيىرشىق اتقان ءىستىڭ، مىنەزدىڭ ادامى. قورلان - قۇرالاي اناربەكوۆا كورىكتى، تۇڭعيىق، اقىلدى، ءارى بۇرىمىن توبەسىنە ءتۇيىپ وسكەن جاۋگەرشىلىك زامانداعى قازاقتىڭ قاھارمان قىزى. سارتاي - اسىلحان تولەپوۆ -- جايساڭ جىگىت. ونىڭ جانارىندا مازداپ تۇرعان وت، مەيىرىم دالا جۇرتىنىڭ دارالىعىن دارىپتەپ، اقسۇيەكتىگىن ايشىقتايدى. «بولاتىن بالانىڭ» بار بەلگىسى سارتاي - اسىلحاننىڭ بويىننان تابىلىپ تۇرعاندىقتان دا ول كينونىڭ باس كەيىپكەرىنە ابدەن لايىق. ءبىز بۇل ۇشتىك وداقتى ەندى بۇدان بىلاي «تالانتتى رەجيسسەر اقان ساتاەۆتىڭ التىن قىراندارى» دەيتىن شىعارمىز. نەگە دەسەڭىز،  جاس بۋىندى كينو الەمىنىڭ زاۋ بيىگىنە كوتەرۋ - ساتاەۆ سياقتى ساڭلاق رەجيسسەرلەردىڭ عانا سىباعاسىنا بۇيىرادى. «قازاقفيلم» اق-نىڭ توراعاسى ەرمەك امانشاەۆ پەن رەجيسسەر اقان ساتاەۆ قازاق كينوسىنا جاڭا ۇرپاقتىڭ كوشىن اكەلدى.  «قازاقفيلم» «جاۋجۇرەك مىڭ بالامەن» قالعىپ بارا جاتقان قازاقتىڭ رۋحىن ءدۇر سىلكىنتىپ وياتتى. ءبىز وسىلاي دەيمىز. وسىنى بايلام ەتەمىز. سوۆەتتىك تسەنزۋرا مەن ماسكەۋدىڭ «قايشىسىنان» وتسە دە كوركەمدىگىن، استارلى ويىن الدىرماعان اياۋلى اعا رەجيسسەرلەردىڭ تۋىندىلارىنا ەش وكپەمىز جوق، الايدا سول اسىل ۇرپاققا مۇرىن شۇيىرگەن «جاڭا تولقىننىڭ» قازاق جانىن جۇدەتىپ، قازاق كينوسىن توقىراۋعا سالعانىن ويلاساق، «جاۋجۇرەك مىڭ بالا» كورەرمەن بايقۇس جىلاپ كورىسكەندەي فيلم بولىپ شىعىپتى. ءوزىن ساتاەۆتىڭ ۇستازى سانايتىن ساتىبالدى نارىمبەتوۆتەي ساقا رەجيسسەرىمىزدىڭ كەيىپكەرلەرى ءتىلىن بۇراپ، قازاقتى كەمسىتىپ، كوردەن شىققان بەيباقتىڭ كولەڭكەسىندەي كوشىپ، الباتى اداسىپ جۇرسە، «جاۋجۇرەك مىڭ بالانىڭ» ۇلاندارى رۋح شاقىرىپ اتويلايدى. قيمىلدارى توتەنشە شيراق. شەتىنەن شىرق ءۇيرىلىپ تۇر.  ات قۇلاعىندا وينايدى. بۇل دا «مىڭ بالانىڭ» (ياعني، جاس ارتيستەر شوعىرىنىڭ) ەندىگى كەزەكتە كينوسىنشىلار تاراپىنان ەسكەرىلىپ وتىرۋعا ءتيىس ەرەكشەلىكتەرىنىڭ ءبىرى.

«جاۋجۇرەك مىڭ بالا» وقيعاسىن ءارى قاراي جالعايىق.

ارقانداي قىلمىسىنان جازىپ، جازاعا كەسىلگەن قازاقتاردى بۇحارا ساۋداگەرلەرى ساتىپ الىپ قۇلداناتىن بازاراعا تاپ بولعان جاۋجۇرەك بالالار  قۇل يەلەنگەن كەرەۋەن جولىن توسىپ جاتىپ قانداستارىن قۇتقارىپ جىبەرەدى. كەرۋەندى جونون ءباتۋردىڭ ۇلى ايۋر باتىر باستاپ كەلەدى ەكەن. دالا زاڭى بويىنشا سارتاي مەن ايۋر جەكپە-جەككە شىعىپ، جەڭىس تۋى سارتايدىڭ قولىندا جەلبىرەيدى. قاپىدا جالعىز ۇلىنان ايرىلعان جونون باتۋر راقىمجان بايدى الدىنا كەلتىرىپ، «سارتايدى تاۋىپ، بايلاپ بەر نەمەسە باسىن كەسىپ اكەل» دەيدى. ءفيلمنىڭ كورەرمەندى تولقىتار جانە ءبىر تۇسى وسى ەپيزود. بۇرىنعى دالا ادامدارىنىڭ پارقىن ۇقپايتىن رەجيسسەر بولسا، ءبىرىن كىجىنتىپ، ءبىرىن ونىڭ اياعىنا باس ۇرعىزىپ، كىسىنەتىپ قويا بەرەر ەدى، ساتاەۆتىڭ جوڭعارى مەن قازاعى ءۇنسىز تىلدەسەدى. ءۇنسىز ارباسادى. ەكەۋى دە تاعدىرلى ادام. ءبىرى قايعىنىڭ زاپىرانىن قۇسىپ، قۇسامەن وتىر. ەكىنشىسى جان ساۋعالاپ قايتكەندە جاقىنىن جاۋعا الدىرماۋدىڭ قامى ءۇشىن قالتىراپ جۇرگەن مۇڭلىق. سوندا جونون (موڭعول اكتەرى بەح-وچير  جارگالسايحان) جانارىنا ۇيرىلگەن جاسىن جاسىرىپ، ءجۇزىن قولىمەن كولەگەيلەپ: «بۇل - سوعىس، سوعىستا ءبارى بولادى» دەيدى. بىراق كەكتىڭ ءىسى كەسكىلەسپەي تىنبايدى. «اڭىراقاي شايقاسىندا» جونون مەن سارتاي كەزدەسەدى. ايتكەنمەندە جونوندى سارتايدىڭ باعىن قىزعانىپ وققا بايلاپ،  ارتىنان ايىبىن قانمەن جۋعا بەكىگەن ءمارت باتىر تايماس ولتىرەدى. سارتاي جوڭعارلاردىڭ شاشاقتى تۋىن قۇلاتىپ، شەيىت بولادى.

«ارمان» كينوتەاترىنان سىرتقا اقتارىلعان جاستار «ومىردە سارتاي، تايماس باتىرلار بولدى ما ەكەن،ءا؟» دەسىپ بارا جاتتى. «مىڭ بالا»  - ەل اۋزىندا  ساقتالعان ەرلىك داستانى. اڭىز. «اڭىراقاي شايقاسى» تۋرالى ەڭبەگىندە ماناش اعا قوزىباەۆ «مىڭ بالانىڭ» تاريحتا دا بولعانىن جازادى. مىڭ بالاعا ۇقساس جاۋجۇرەك ۇلدار ەرتەدە «العادايلار» دەپ اتالعان. العادايلار - جەكپە-جەككە شىعىپ، باس باتىر ءۇشىن ءوز باستارىن ولىمگە تىككەن كوزسىز ەرلەردىڭ قوسىنى. دەمەك، «مىڭ بالا» كەشەگى اڭىز بەن تاريحتىڭ بۇگىنگى ونەردىڭ شىڭى - كينوعا كوشكەن كوركەم نۇسقاسى. بۇلاي دەۋىمىزگە سەبەپ - اكتەرلىك ويىنداردىڭ شەبەرلىگىنە قۇرىلعان فيلمنەن شەبەرلەردى شەتىنەن كورىپ كوزايىم بولاسىز. قازاق كينوسىنىڭ كوريفەيلەرى - تۇڭعىشباي ءال-تارازي، دوسقان جولجاقسىنوۆ، تولەۋباي ارالباەۆ، دىنمۇحامەت اكيموۆ، سايات مەرەكە، بولات ءابدىلمانوۆ، ومار قيقىم، ت.ب. رەسەيدىڭ التاي ايماعى اتالاتىن ولكەدەن كەلگەن اكتەرلەرمەن، موڭعوليالىق ارىپتەستەرىمەن بىرگە «مىڭ بالانىڭ» «وينىنىندا» ءجۇر. ەۋورپا ءۇشىن داڭقتى شىڭعىس حاننىڭ ۇرپاعى سانالاتىن جوڭعار-ويراتتاردىڭ ءرولىن سول جوڭعار-ويراتتارعا جاقىن ەلدىڭ اكتەرلارى ويناپ «جاۋجۇرەك مىڭ بالانىڭ» مازمۇنىن بايىتا تۇسكەن. شىنىندا سۋحەە اريۋنبيامبا  كەيىپتەگەن ايۋر باتۋر،  بەح-وچير  جارگالسايحان  كەيىپىنە ەنگەن  جونون باتۋر، گومبو زولبووتتىڭ  ۋلەگەي نويانى «مىڭ بالاعا» ادامنىڭ جانىن تۇرشىكتىرەتىندەي سۋىق، جات كوزبەن جاۋىعىپ قارايدى. ويناپ ەمەس، ويداعىسىن ورىنداپ جۇرگەندەي اسەر قالدىرادى.

قىسقاسى، ءبىز «جاۋجۇرەك مىڭ بالا» فيلمىنەن نە تۇيدىك؟

بىرىنشىدەن، قازىر سانگە اينالعان اۆتورلىق فيلمدەردى سول اۆتورلاردىڭ وزىنە قالدىرىپ جۇرت جاپىرىلا كورەتىن كوركەم فيلم تۇسىرۋگە بولاتىندىعىن ۇقتىق.

ەكىنشىدەن، قازاقستاندا كاسسالىق فيلم ءتۇسىرۋ مۇمكىن ەمەس دەگەن  ويدىڭ ويىنشىعىنا اينالا بەرمەي كينونىڭ كلاسسيكالىق نۇسقاسى باسشىلىققا الىنسا، «جاۋجۇرەك مىڭ بالا» باستاعان فيلمدەر وتاندىق ەكراندى تولىق جاۋلاپ الاتىندىعىنا كوز جەتكىزدىك.

ۇشىنشىدەن، «جاۋجۇرەك مىڭ بالاداي» تۋىندىلارمەن «قازاقفيلم» شەتەلدىك كينولاردىڭ ەكسپانتسياسىنا توسقاۋىل قويىپ، كينو نارىعىنا يەلىك ەتە الاتىندىعىنا (بۇل پايىمىمىزدى الداعى ۋاقىت دالەلدەي تۇسەدى دەگەن ۇمىتتەمىز) قول سوقتىق.

تورتىنشىدەن، شەتەلدەن تانىمال اكتەرلەردى شاقىرىپ شاشىلماي-اق  «قازاقفيلمنىڭ» شەدەۆرلەر تۇسىرۋگە قابىلەتتى ەكەنىن بىلدىك.

بەسىنشىدەن، كينوننىڭ يدەولوگيالىق قىزمەتىنە دە ءمان بەرە الساق، جاستاردىڭ بويىنداعى رۋحتى وياتىپ، وتان، ەل تاريحىن جادىمىزدا جاڭعىرتۋعا بولاتىندىعىن مويىندادىق .

التىنشىدان، جەتىنشىدەن،.. جۇزىنشىدەن. وسىنىڭ بارىنە مىسالدى «جاۋجۇرەك مىڭ بالادان» تاباتىنىڭىزعا بەك سەنىمدى بولىڭىز، الاش جۇرتى.

«اباي-اقپارات»

سۋرەتتەردە:

1. سارتاي - اسىلحان تولەپوۆ

2. تايماس - ايان وتەپبەرگەن

3. قورلان - قۇرالاي اناربەكوۆا

4. راقىمجان - تولەۋبەك ارالباي

5. تولە بي - دوسحان جولجاقسىنوۆ

6. سارتاي مەن زەرە - اسىلحان تولەپوۆ جانە ءاليا انۋاربەك

7. سارتاي، تايماس، ءسابيت - اسىلحان تولەپوۆ، ايان وتەپبەرگەن، داۋرەن سەرعازين

8, 9 "جاۋجۇرەك مىڭبالا" فيلمىنەن كورىنىستەر

;hl=ru_RU&rel=0" />;hl=ru_RU&rel=0" type="application/x-shockwave-flash" allowscriptaccess="always" allowfullscreen="true" height="315" width="420">

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2253
عيبىرات

قايسار رۋحتى عازيز جان

مۇحتار قۇل-مۇحاممەد 3516