جۇما, 29 ناۋرىز 2024
الاڭ 5591 1 پىكىر 6 مامىر, 2021 ساعات 15:57

«راحات» بازارىنىڭ كاسىپكەرلەرى: سۋدياعا سەنبەيمىز!

الماتىنىڭ ايدىك بولعان «باراحولكاسىنداعى» «راحات» بازارىنا قاتىستى داۋ ءالى باسىلماي تۇر. بيىل ناۋرىز ايىنىڭ باسىندا باق پەن الەۋمەتتىك جەلىدە: «الماتىدا 250-گە تارتا كاسىپكەر جۇمىستارىنان ايىرىلىپ قالۋى مۇمكىن»، دەگەن اقپارات جاريا بولدى. وندا الماتىداعى «راحات» بازارىنىڭ جەر ۋچاسكەسى وزگە كومپانيانىڭ قولىنا ءوتىپ كەتكەنى تۋرالى ايتىلعان.

«جەردى جالعا العان جاڭا كومپانيا ەسكى بازاردى ءسۇرىپ تاستاپ، ورنىنا جيھاز فابريكاسىن سالماق»، دەگەن ساۋداگەرلەر نارازىلىقتارىن ءبىلدىرىپ، ميتينگكە شىققان. بۇل قوعامدا قىزۋ تالقى بولدى.

«راحات» بازارىنىڭ جابىلۋىنا قارسى كاسىپكەرلەردىڭ ايتۋىنشا، «تكم» كومپانياسى بازار اۋماعىن جيىرما جىلدان استام ۋاقىت بويى جالعا الىپ كەلگەن. ال 2018 جىلى جەرگىلىكتى اتقارۋ ورگانى (الماتى قالالىق اكىمدىگى) جەر «زيراتتىڭ سانيتارلىق قورعاۋ ايماعىندا ورنالاسقانىن» سەبەپ ەتىپ، جالعا الۋ مەرزىمىن ۇزارتپاعان.

ءبىر قىزىعى، جەردىڭ پايدالانۋ ماقساتى وزگەرتىلمەستەن، ءبىر اي ۋاقىت ىشىندە ءدال سول جەردى وزگە كومپانياعا - «الماتى CPS» جشس-عا جيھاز فابريكاسىن سالۋ ءۇشىن 5 جىلعا جالعا بەرۋ تۋرالى شەشىم شىعارعان. وسىعان نارازى بولعان ساۋداگەرلەر جەردىڭ «الماتى CPS-كە» بەرىلۋىنىڭ ارتىندا مۇددەلى توپتار تۇرۋى مۇمكىن»، دەپ بولجايتىندارىن بىلدىرگەن.

اتالعان فابيركانى سالۋ تۋرالى قاۋلىعا الماتى قالاسىنىڭ بۇرىنعى اكىمى، قازىر «نۇر وتان» پارتياسى توراعاسىنىڭ ورىنباسارى باۋىرجان بايبەك قول قويعان. ال «ازاتتىق راديوسى» فابريكا سالۋشى كومپانياعا يەلىك ەتكەن ادام باۋىرجان بايبەكتىڭ اكەسى قىدىرعالي بايبەكپەن سەرىكتەس بولعانىن انىقتاپ جازعان.

ال جەردى جالعا العان جاڭا كومپانيا - «الماتى CPS» جشس بۇل ورىنعا الەۋمەتتىك باعىتتالعان ەكولوگيالىق فيبريكا سالۋدى جوسپارلاپ وتىرعاندارىن ايتادى. ولاردىڭ ينۆەستجوباسىنىڭ جالپى قۇنى 3 ملرد تەڭگە دەپ جوسپارلانىپتى. «490 جاڭا جۇمىس ورنىن اشىپ، جىل سايىن بيۋدجەتكە 55 ملن تەڭگە سالىق تولەيتىن بولامىز» دەگەن كومپانيا وكىلى نۇربەك بەكباۋ مىرزا «راحات» بازارىنىڭ ساۋداگەرلەرىن قايتا وقىتىپ، ساۋدا پاۆيلوندارىن ۇسىناتىندارىن ايتقان.

ال جۋىردا الماتى قالالىق اكىمدىگى مەن «اتامەكەن» كاسىپكەرلەر پالاتاسى الماتىدا ەكى تاراپ وكىلدەرىن قاتار شاقىرىپ، جيىن وتكىزىپتى. ءبىز اتالعان جيىندا ايتىلعان اقپاراتتار مەن ءسوز جارىس، پىكىر تالاسقا ءبىر شولۋ جاساعاندى ءجون كوردىك.

وندا قالالىق اكىمدىك اتالعان جەر داۋىنا قاتىستى سوت پروتسەسسى ءجۇرىپ جاتقاندىقتان، «الماتى CPS» كومپانياسىنا قالاداعى يندۋستريالدى ايماقتان جەر بەرۋ تۋرالى ۇسىنىس ايتقان. الايدا، «الماتى CPS» بۇل ۇسىنىستان باس تارتىپ، ءوز جوبالارى ءۇشىن ءدال جاڭاعى «راحات» بازارىنىڭ اۋماعى ءتيىمدى ەكەنىن ايتقان. ەندى رەت-رەتىمەن جازايىق...

الدىمەن الماتى قالاسى كاسىپكەرلەر پالاتاسىنىڭ ديرەكتورى ايتۋار قوشمامبەتوۆ جيىننىڭ ماقساتى «راحات» بازارىنداعى جەر تەلىمدەرىنە قاتىستى تۋىنداعان داۋلى ماسەلەنى شەشۋدىڭ جولدارىن قاراستىرۋ، اكىمدىك تاراپىنان التەرناتيۆتى ۇسىنىس ءبىلدىرۋ جانە ەكى تاراپتى تىڭداۋ ەكەنىن ايتىپ، ءسوز باستاعان.

ال الماتى قالاسى كاسىپكەرلىك جانە ينۆەستيتسيا باسقارماسىنىڭ باسشىسى ەركەبۇلان ورازالين: «بازارداعى جاعداي ءدال قازىر وتە ۋشىعىپ تۇرعانى ەشكىمگە جاسىرىن ەمەس. الەۋمەتتىك جاعى بار، ساۋداگەرلەر بار، داعدارىس بار... سوندىقتان، ءبىز ءوز تاراپىمىزدان التەرناتيۆتى جەر ۋچاسكەسىن بەرۋگە دايىنبىز. سونىڭ ىشىندە يندۋستريالدى ايماقتان جەر بەرۋگە دايىنبىز. مەنىڭ تۇسىنگەنىم، سىزدەردىڭ ينۆەستجوبالارىڭىز باياۋ ءوندىرىس تسەحىنىڭ قۇرىلىسى. اتالعان باعىتتاعى ىسكەرلىك يندۋستريالدى ايماق تالاپتارىنا ساي كەلەدى. سوندىقتان، قازىر وزگە دە جوبالار جۇمىس جاساپ جاتقان سول يندۋستريالدى ايماقتا ءبىر جىل ىشىندە جۇمىستارىڭىزدى جۇرگىزۋدى باستاعاندارىڭىز دۇرىس، لوگيكاعا ساي دەپ ەسەپتەيمىز. ەگەر سىزدەردىڭ جوسپار-ماقساتتارىڭىز سالماقتى بولسا، بولىنەتىن جەر تەلىمىن ۇلعايتۋ جاعىن دا قاراستىرۋعا بولادى»، - دەيدى.

بۇعان «الماتى CPS» كومپانياسىنىڭ وكىلى نۇربەك بەكباۋ: «ءبىز الماتىنىڭ «راحات» بازارىنىڭ اۋماعىن تاڭدادىق، 2018 جىلى. بىزگە «پرومزونا» نەمەسە قالانىڭ سىرتى مۇلدەم ىڭعايسىز. نەگە؟ ويتكەنى، بىزدىكى جاي عانا بەتون نەمەسە تەمىر ارماتۋرا شىعاراتىن زاۋىت ەمەس. «پرومزوناعا» شىعارىپ جىبەرەتىن ءوندىرىس ءتۇرى ەمەس. كەشەندى ءوندىرىس ءتۇرى. بىزدىكى - جيھاز فابريكاسى. ءوز شىعارعان ءونىمىمىزدى سول ارادا ساتامىز. 100-گە جۋىق جيھاز تۇرلەرىن جاسايمىز. جانە ولاردى ساتاتىن ءبىرىنشى قاباتتا ساۋدا پاۆيلوندارى بار. بىزگە سول ىڭعايلى.  

ەكىنشىدەن، ءبىزدىڭ كومپانيا بيزنەستىڭ الەۋمەتتىك جاۋاپكەرشىلىگىن تۇسىنەتىن، الەۋمەتتىك باعىتتالعان كومپانيا.  بىزدە الداعى ۋاقىتتا 490 ادام جۇمىس ىستەيتىن بولادى. ال «پرومزوناعا» جىبەرەتىن بولساڭىزدار، ول جاقتان اۆتوبۋستار قاتىناي بەرمەيدى. ءبىز قالانىڭ جارتى مىڭعا جۋىق ادامىن قيناپ قويعالى وتىرمىز. 

ماسەلە بىزدە ساۋداگەرلەرگە بايلانىستى تۋىنداپ جاتىر عوي. ميتينگ بولدى، بارشامىزعا بەلگىلى. دۇرىس ەمەس نارسە. ەشقانداي اكىمشىلىكتەن رۇقسات سۇرالماي جاسالعان ميتينگ. تۇسىنەمىز، ۋايىمداپ وتىرعانىن. ءبىز الەۋمەتكە باعىتتالعان جوبا بولعاندىقتان، سول بازاردا جۇمىس ىستەپ وتىرعان 250 ساۋداگەرگە بايلانىستى، ءوز جوبامىزدى ازداپ وزگەرتەمىز. ءبىزدىڭ جوبادا ەكى قاباتتى جيھاز فابريكاسى عوي. سونىڭ ءبىرىنشى قاباتىن تولىق، سول 250 ساۋداگەر سىياتىنداي ساۋدا پاۆيلوندارىنا اينالدىرۋ جوسپارىمىزدا بار»، - دەيدى.

وسى جەردە «الماتى CPS» كومپانياسىنىڭ وكىلى مەن الماتى اكىمدىگى وكىلىنىڭ اراسىندا از-كەم ءسوزتالاس بولعان، قاراڭىز:

ورازالين:

- سىزگە سۇراق. «500-گە جۋىق ادامعا جۇمىس تاۋىپ بەرەمىز» دەيسىز. قازىر سىزدەردىڭ ءبىر جەردە ىستەپ تۇرعان زاۋىتتارىڭىز، جۇمىسشىلارىڭىز بار ما؟

بەكباۋ:

- ءدال قازىر بۇل جوبا عوي...

ورازالين:

- جوق، جوبادان باسقا ءبىر جەردە ناقتى ىستەپ تۇرعان باسقا زاۋىتتارىڭىز بار ما؟

بەكباۋ:

- باسقا، قازىر... مۇنى زاڭگەرلەرىمىز ايتسىن، ارى قاراي... بولەك توقتالايىق، بۇل ماسەلەگە. بۇدان بولەك بىرنەشە دۇنيەلەر بار. ونى ارنايى تارقاتىپ، تۇسىندىرەمىز...

ورازالين:

- قازىر ماعان جاۋاپ بەرە الاسىز با، قانداي باعىتتاردا، نە ىستەپ جاتقاندارىڭىزدى؟ بىزگە تۇسىنىكتى بولۋى ءۇشىن... ەگەر سىزدەردىڭ كومپانيا بۇل سالادا 10-20 جىلدىق جەتىستىكتەرى بار، قالىپتاسقان، ءوزىنىڭ تاجىربيەسى بار، جۇمىسشىلارى بار نەمەسە ءبىر كونتراكتىلەرى بار دەسەڭىزدەر، وندا ءبىر ماسەلە....

جالپى سىزدەرگە تۇسىندىرە كەتەيىن، اياعىندا وسى جەردە وتىرعان ءبىز شەشىم قابىلداي المايمىز. شەشىم قابىلدايتىن سوت. مەن سىزدەرگە اشىعىن ايتىپ وتىرمىن. ينۆەستيتسيا كوميتەتى تاراپىنان حات كەلدى. ەرتەڭ ول سوتتا ەسكەرىلەتىن بولادى. ءبىز وسى جايدى دا ەسكەرە وتىرىپ، سىزدەرمەن بىرگە باسقا مۇمكىندىكتەردى دە قاراستىرۋعا دايىنبىز.

بىراق، ناقتى سىزدەردىڭ ماسەلەدە شەشىمدى سوت قابىلدايدى. ءبىز سوتقا ىقپال ەتە المايمىز. سىزدەردىڭ ينۆەستيتسيالىق جوبالارىڭىزعا كەلىسىپ، جەر بەرگەن جاۋاپتى اتقارۋشى ورگان رەتىندە سوت شەشىمى بىزگە دە اكىمشىلىك جاۋاپكەرشىلىك جۇكتەيدى.

بەكباۋ:

- مەن باسشىلىق تاراپىنان تولىق اقپارات الا الامىن. ال ءدال قازىر وسى جوبانى ەندى جۇزەگە اسىرعالى وتىر.

ورازالين:

- جاقسى...

وسى ءۇش تاراپتىڭ كەزدەسۋىندە ءسوز العان «راحات» بازارى (تكم كومپانياسى) زاڭگەرى ءجاميلا تولەنوۆا: «3 جىلدان بەرى، اي سايىن ءتۇرلى ينستانتسياعا حات جازىپ، سوتقا جۇگىنىپ كەلگەندەگى، وسى ماسەلەنىڭ سۋدىڭ بەتىنە قالقىپ شىققانىنا قۋانىپ وتىرمىن. «تامشى تاس تەسەدى»، دەيدى. ءوزىنىڭ شەگىنە جەتەر ۋاقىت كەلگەن بولار. راس، قازىرگى تۋىنداپ وتىرعان داۋ - جەرگىلىكتى اتقارۋشى ورگانداردىڭ سالعىرتتىعىنان، تەگىس جەردە تۋىنداپ وتىرعان داۋ. «الماتى CPS-كە» قويار ءبىزدىڭ تالاپ-ارىزىمىز جوق، ءبىزدىڭ ارامىزدا داۋ جوق.

بىراق، ول داۋدى «الماتى CPS»، مىناۋ وتىرعان نۇربەك بەكباۋ مىرزا ءورشىتىپ جىبەردى. ءسىزدى قاراپ وتىرسام، «الماتى CPS» جشس ديرەكتورىنىڭ ورىنباسارى دەيدى. ءسىز ارىزدانۋشى ورگان اتىنان كەلىپ وتىرىپ، قازىر الماتىنى «قاشپاعان سيىردىڭ ۋىزىنا قارىق قىلامىن»، دەپ وتىرسىز.

ءسىز مىنا «جينالۋىمىزعا باستى سەبەپ بولىپ وتىرعان ميتينگ»، دەپ وتىرسىز. «ميتينگ زاڭسىز ءوتتى»، - دەدىڭىز. ءسىزدىڭ وعان باعا بەرەتىن قۇزىرىڭىز جوق. اۋىزدان شىققان ءار ءسوزدى بايقاپ سويلەۋ كەرەك. ايتىلعان ءسوز اتىلعان وقپەن تەڭ. الەۋمەتتىك جەلىدە وزىڭىزگە پيار جاسايمىن دەپ، قازىر جۇمىس ىستەپ وتىرعان 300-گە جۋىق كاسىپكەردى اشىندىرىپ وتىرسىز. وسى داۋدىڭ باسى-قاسىندا جۇرگەن مەنىڭ ىشىمدەگى بۇرقانىستى قازىر ەموتسيامەن جەتكىزگىم كەلمەيدى.

ءبىز اكىمدىككە ەسكەرتۋىمىزدى بەردىك! بەسىنشىسىنە كەلىسىم الدىق. الماتى قالاسى اكىمىنىڭ 2 مارتتاعى قاۋلىسى بويىنشا، بىزگە 10 مارتتا بەيبىت شەرۋ وتكىزۋگە رۇقسات بەرگەن.

ەكىنشىدەن، جەرگىلىكتى اتقارۋ ورگاندارىنىڭ سالعىرتتىعىنان ورىن الىپ وتىرعان داۋ دەدىم. بىزگە «2018 جىلى جەر تەلىمىن جالعا الۋشىلارعا ۇزارتۋعا بولمايدى»، دەپ يسمايلوۆتىڭ قولىمەن قاعاز بەرىلگەن. جەردىڭ قايدا تۇرعانى، ماقساتى، ەشتەڭە وزگەرگەن جوق. بۇل 2018 جىلى 27 ساۋىردە بەرىلگەن جاۋاپ. جەر كوميسسياسىنىڭ وتىرىسى 24 ساۋىردە ءوتتى. 3 كۇننەن سوڭ، بىزگە قاتىستى نەگىزسىز قورىتىندى ورىن الدى.

ال ەندى «الماتى CPS-تە» سول جەردىڭ فۋنكتسيونالدى باعىتى وزگەرگەن جوق. بىراق: «جيھاز فابريكاسىن پايدالانۋ ءۇشىن جانە قىزمەت كورسەتۋ ءۇشىن قالا قۇرىلىسىنىڭ ماقساتىن يگەرۋگە جەر بەرۋگە بولادى»، - دەيدى. ءبىز وسى ماسەلە بويىنشا سوتتاسىپ جاتىرمىز. سوتتاعى ەكى تاراپ – ءبىز جانە جەرگىلىكتى اتقارۋ ورگانى.

مىناۋ الەۋمەتتىك جەلىدەگى قول جەتىمدى اقپارات. «تكم» جشس 2015 جىلدان بەرى ۇكىمەتكە قۇيعان سالىق مولشەرى – 38 ميلليون 873 مىڭ 494 تەڭگەنى قۇرايدى. ونىڭ ىشىندە، سوتتاسىپ جۇرگەن 2018-2019 جىلدارى قۇيعان اقشالاردىڭ ءوزى ميلليوننان اسىپ وتىر.

«الماتى CPS» 2015 جىلى 23 قازاندا قۇرىلعان سەرىكتەستىك. وسى كۇنگە دەيىن قۇيعان سالىق مولشەرى – 638 مىڭ 68 تەڭگە. بۇل جەر سالىعى نەگىزىنەن. ال باسقا كورسەتكىشتەرىىڭ بارلىعى - ءنول. دەمەك،  ولار جۇمىس ىستەمەيتىن ورىن.

«زيراتتىڭ سانيتارلىق قورعاۋ ايماعىن» قايدا جەبەرەمىز؟ «وزەننىڭ سۋ قورعاۋ ايماعىن» قايدا جىبەرەمىز؟ جيھاز فابريكاسىن سالعاندا زيراتتى ءبىر جاققا كوشىرىپ تاستايمىز با؟ سول كۇيىندە قالادى. ويتكەنى باس جوسپار ءالى بەكىتىلگەن جوق. ءنورماتيۆتى اكتىلەر شىققان جوق.

«الەۋمەتتىك جوبادا جۇمىسشىلاردىڭ جاعدايىن جاساپ وتىرامىز»، دەيسىز. 490 ادامنىڭ جۇمىسىن، ولاردىڭ الەۋمەتتىك جاعدايىن مويىنعا الۋ – مەملەكەت ءۇشىن دە وتە جاۋاپتى ءىس بولىپ تۇرعاندا ءسىزدىڭ جاۋاپكەرشىلىكتى موينىڭىزعا الىپ وتىرعان باتىلدىعىڭىزعا تاڭ قالامىن. قاراسام، 94 مىڭ 160 تەڭگە سالىق قارىزدارىڭىز تولەي الماي وتىرىپ، قالاي وسىنشاما ادامدى قامتيمىن دەپ ايتاسىزدار؟

قازىر «راحات» بازارىندا جۇمىس ىستەپ وتىرعان 300-گە جۋىق كاسىپكەردىڭ بارلىعى الەۋمەتتىك توپ. وزدەرىن-وزدەرى جۇمىسپەن قامتىپ، وتباسىن اسىراپ، سونىمەن قوسا، ءوز جۇمىستارىن زاڭدى بەكىتىپ، ۇكىمەتكە ءتيىستى سالىعىن تولەپ وتىرعان كاسىپكەرلەر. سىزدەر سەكىلدى ءبىز دە ۇكىمەتتىڭ الدىندا  قۇقىعىمىز تەڭ.

باسا نازار اۋدارىپ كەتەتىن جايت – سىزدەر «ينۆەستيتسيالىق جوبا» دەپ وتىرسىزدار. بۇل جوبا سوتتا قالاي قالقىپ شىقتى، سوعان قول قويعان كىسىلەر، شەنەۋنىكتەر، بۇلاردىڭ بارلىعىنىڭ باسىندا تەك قانا اكىمشىلىك جاۋاپكەرشىلىك ەمەس، قىلمىستىق جاۋاپكەرشىلىككە تارتىلاتىن ۇلكەن سالماق جاتىر. ويتكەنى، بىردە-ءبىر زاڭدا جوبانى مىناداي جولمەن «ينۆەستيتسيالىق» دەپ تانىپ، بەكىتۋ تۋرالى نورما جوق.

بازاردىڭ ءوزى الەۋمەتتىك ورتا. ول – الەۋمەتتىك داۋدىڭ وشاعى. ونداعىلار لاپ ەتىپ جانىپ كەتەتىن توپتىڭ بىرىنە جاتادى. ءبىز سول جەردەگى داۋدى ءارى قاراي ورشىتپەس ءۇشىن، ءوز ەركىمىزبەن ميتينگتەن باس تارتتىق. ءبىزدىڭ جانايقايىمىزدىڭ مەمورگاننىڭ قۇلاعىنا جەتكەنىنە قۋانىپ وتىرمىن»، - دەيدى.

اتالعان جيىنعا قاتىسقان مەملەكەتتىك ساتىپ الۋ باسقارماسىنىڭ وكىلى «تكم» كومپانياسى تاراپىنان سالىق تولەۋگە قاتىستى زاڭ بۇزۋشىلىقتار تىركەلمەگەنىن راستاپ سويلەگەن.

ءجاميلا تولەنوۆا:

- ءبىزدى شامداندىراتىنى - 2019 جىلدىڭ ءساۋىر ايىندا ءبىز ارىزىمىزبەن بىرگە ەسكيزدىك جوبامىزدى الماتى قالالىق اكىمدىگىنە تاپسىرعان بولاتىنبىز. ءبىز دە بازارلاردى مودەرنيزاتسيالاۋ جوباسىنا قاتىساتىنىمىزدى، ونداعى قىزمەتكەرلەردىڭ بارلىعىنا جۇمىس ورىندارىن بەرىپ، ودان بولەك 2 ءوندىرىس ورنىن اشاتىن بوپ جوسپارلاعانبىز. 2019 جىلدىڭ ساۋىرىندە ءبىزدىڭ جوبامىزدى قاراۋعا العان اكىمدىكتىڭ جاۋابى ءارى قاراي مۇلدەم جوق بولدى. سوڭىندا بىلگەنىمىز، 30 مامىردا ول جەر «الماتى CPS-قا» بەرىلىپتى. ونى «الماتى CPS-تىڭ» العانىن ءبىز 2019 جىلدىڭ جەلتوقسان ايىندا عانا ءبىلىپ وتىرمىز.

جەر كودەكسىنىڭ نورمالارىنا سايكەس، ول جەردە ءبىزدىڭ «ارتىقشىلىق قۇقىعىمىز» بار. ويتكەنى وسى پايدالانىپ كەلگەن ۋاقىتتا ءبىزدىڭ تاراپىمىزدان زاڭ بۇزۋشىلىق وقيعالارى ورىن العان جوق. سوندىقتان، ءبىزدىڭ «ارتىقشىلىق قۇقىعىمىز» جويىلعان جوق. ونى ەشكىم وزگەرتە المايدى.  ءبىزدىڭ «ارتىقشىلىق قۇقىعىمىز» بار ەكەنى جوعارعى سوتتىڭ قاۋلىسىندا 2019 جىلدىڭ ءساۋىر ايىنداعى قاۋلىسىندا دا كورسەتىلگەن.

ءتۇيىن. «راحات» بازارىنىڭ جەرىنە «تالاسقان» استانالىق كومپانياعا الماتى قالاسىنىڭ اكىمدىگى يندۋستاريالدى ايماقتان جەر بەرۋگە دايىن. الايدا جيھاز فابريكاسىن سالامىز دەگەن استانالىق كومپانيا الماتىنىڭ يندۋستريالدى ايماعىنا بارۋدان باس تارتىپ وتىر. الماتى اكىمدىگى وتكىزگەن جيىندا استانالىق كومپانيانىڭ مەملەكەتكە 94 مىڭ تەڭگەگە جۋىق بەرەشەگى بار ەكەنى دە بەلگىلى بولعان.

الداعى اپتادا ەكى كومپانيانىڭ اراسىندا سوت باستالادى. ءبىر قىزىعى ەكى جىلعا سوزىلعان ءىس قۇجاتتارىن بۇرىن استانالىق كومپانياعا شەشىم شىعارىپ بەرگەن سۋديا گ. كازىمبەتوۆا قايتا ءوزى الماق. بۇل تۋرالى «راحات» بازارىنىڭ زاڭگەرى ءجاميلا تولەنوۆا ءوزىنىڭ «Facebook-تاعى» رەسمي پاراقشاسىندا 11 ءساۋىر كۇنى قر جوعارعى سوتىنىڭ توراعاسى جاقىپ اسانوۆتىڭ اتىنا جازىلعان بازار ساۋداگەرلەرىنىڭ ءۇشبۋ ارىزىن جاريالاپتى. كاسىپكەرلەر بۇرىنعى سۋديانىڭ ءىستى وزىنە قايتا الۋى -سوتتا ادىلەتسىز شەشىم شىعادى دەگەندى بىلدىرەدى دەپ سانايدى.

كا مىرزا

Abai.kz

1 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1578
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2273
عيبىرات

قايسار رۋحتى عازيز جان

مۇحتار قۇل-مۇحاممەد 3590