ءماجىلىس سپيكەرءى نۇرلان نىعماتۋلينءنىڭ توراعالىعىمەن وتكەن جالپى وتىرىستا دەپۋتاتتار «سايلاۋ تۋرالى» كونستيتۋتسيالىق زاڭ جوباسىنا ەنگىزىلگەن تۇزەتۋلەردى ماقۇلدادى.

زاڭ جوباسى بويىنشا، اكىمدىككە كانديداتتاردى ساياسي پارتيالارمەن دە، ازاماتتاردىڭ ءوزىن-ءوزى ۇسىنۋ تارتىبىمەن دە كانديداتۋرالاردى بەرۋ كوزدەلەدى.

كانديداتتاردى تىركەۋ، كانديداتۋرانى الىپ تاستاۋ ءتارتىبى، اكىمدى سايلاۋ كەزىندە داۋىستاردى ساناۋ، وسى سايلاۋدىڭ قورىتىندىلارىن انىقتاۋ جانە جاريالاۋ ءتارتىبى بەلگىلەنەدى.

زاڭ جوباسىمەن بارلىق دەڭگەيدەگى سايلاۋدا بەرىلەتىن بيۋللەتەندەرگە «بارلىعىنا قارسى» باعان ەنگىزىلەدى. ساياسي پارتيالار ءۇشىن پارلامەنت ماجىلىسىنە ءوتۋ شەگى تومەندەتىلەدى. سونداي-اق، زاڭ جوباسىندا اۋداندىق ماڭىزى بار قالالاردىڭ، اۋىلداردىڭ، اۋىلدىق وكرۋگتەردىڭ اكىمدەرىن تىكەلەي سايلاۋعا قاتىستى نورمالار قامتىلعان.

وسى رەتتە، ءماجىلىس توراعاسى نۇرلان نىعماتۋلين:

- زاڭ جوباسى تىكەلەي مەملەكەت باسشىسى قاسىم-جومارت كەمەلۇلى توقاەۆتىڭ  تاپسىرماسىنا سايكەس ازىرلەندى. وندا پرەزيدەنتىمىزدىڭ ساياسي پارتيالارعا جانە سايلاۋدا بەرىلەتىن بيۋللەتەنگە قاتىستى ۇسىنىستارى ەنگىزىلدى. سونىمەن بىرگە، اۋىلدىڭ، اۋىلدىق وكرۋگتەردىڭ اكىمدەرىن تىكەلەي سايلاۋدى، قامتاماسىز ەتەتىن جاڭا نورمالار قابىلداندى. وسىنىڭ بارلىعى مەملەكەت باسشىسىنىڭ ساياسي جاڭعىرتۋ باستامالارىن زاڭ جاعىنان قولداۋعا ارنالعان تاعى  ءبىر ناقتى  قادام، - دەۋگە بولادى دەدى.

ءماجىلىس توراعاسىنىڭ ايتۋىنشا، ول ەڭ الدىمەن، مەملەكەتتىك ورگاندار مەن حالىق اراسىنداعى بايلانىستى كۇشەيتۋگە جانە اكىمدەردىڭ تۇرعىندار الدىنداعى جاۋاپكەرشىلىگىن نىعايتۋعا جاڭا  سەرپىن بەرەتىن بولادى. بۇل وتە ماڭىزدى ماسەلە. سەبەبى، جەرگىلىكتى حالىقپەن تىكەلەي بايلانىس ورناتاتىن نەگىزگى تۇلعا ول - ارينە اۋىلدىڭ اكىمى.

سونىمەن بىرگە، بۇل زاڭ جوباسى اۋىل ازاماتتارىنىڭ ساياسي بەلسەندىلىگىن ودان ءارى  ارتتىرۋعا دا زور ىقپال  ەتەتىنى ءسوزسىز.

Abai.kz