NEET ساناتىنداعى جاستارمەن جۇمىستىڭ ادىستەمەلەرى ءار ايماقتا ەرەكشەلىكتەرىنە بايلانىستى بولادى دەپ حابارلايدى Ruh.kz پورتالى.

بۇگىن قازاقستاننىڭ بارلىق ايماقتارىنداعى جاستار رەسۋرستىق ورتالىقتارى وكىلدەرىنىڭ قاتىسۋىمەن جاستار رەسۋرستىق ورتالىقتارىن دامىتۋ جونىندەگى ۇيلەستىرۋ كەڭەسىنىڭ ونلاين وتىرىسى ءوتتى.

ءىس-شارانى قر اقدم جاستار جانە وتباسى ىستەرى كوميتەتىنىڭ قولداۋىمەن «جاستار» عىلىمي-زەرتتەۋ ورتالىعى ۇيىمداستىردى.

كەڭەس شەڭبەرىندە جاستار رەسۋرستىق ورتالىقتارى قىزمەتىندەگى NEET ساناتىنا جاتاتىن جاستاردى ايماقتاردىڭ الەۋمەتتىك-ەكونوميكالىق ومىرىنە تارتۋعا باعىتتالعان ادىستەمەلەرىن جەتىلدىرۋ ماسەلەلەرى تالقىلاندى.

جيىندا، سونداي-اق، NEET ساناتىنداعى جاستارمەن جۇمىس جونىندەگى رەسپۋبليكالىق جوبالىق كەڭسەنىڭ ىسكە قوسىلاتىندىعى، «تاۋەلسىزدىك ۇرپاقتارى» ۇلتتىق جوباسىن ازىرلەنىپ جاتقاندىعى جانە جاستاردىڭ دامۋ يندەكسىنىڭ ەنگىزىلۋى تۋرالى ايتىلدى.

«بۇگىنگى كۇن تارتىبىندەگى نەگىزگى ماسەلە – NEET ساناتىنداعى جاستارمەن جۇمىستى ۇيىمداستىرۋداعى جاڭا ادىستەرىن ازىرلەۋ. بۇل – ءبىلىمى بار، بىراق ءارتۇرلى سەبەپپەن جۇمىسقا تۇرماعان جاستار. ولارمەن جۇمىس ىستەۋدە ءبىز ءوزىمىز ءۇشىن نەگىزگى باعىتتاردى دا ايقىنداپ الدىق. سول باعىتتاردىڭ ىشىندە NEET ساناتىنداعى جاستارمەن جۇمىس جونىندەگى رەسپۋبليكالىق جوبالىق كەڭسەنى، وڭىرلەردە وسى ساناتتاعى جاستارمەن جۇمىس جونىندەگى بولىمدەردى اشۋ بار. بۇگىنگى شارا بارىسىندا الدىمىزعا قويعان مىندەتتەردى قالاي جۇزەگە اسىراتىنىمىزدى، جاستار رەسۋرستىق ورتالىقتارىنىڭ وكىلدەرى ۇسىنعان جاڭا ادىستەمەلەردى بولاشاقىتا قالاي قولدانا الاتىنىمىزدى تالقىلادىق. جاستار رەسۋرستىق ورتالىقتارى ماماندارىنىڭ ۇسىنىستارىن ءبىلۋ ءبىز ءۇشىن اسا ماڭىزدى. ويتكەنى ولار جاستارمەن تىكەلەي بايلانىسقا تۇسەدى، جاستارمەن جۇمىس ىستەيدى. سونداي-اق، بىزگە ارىپتەستەر رەتىندە اتالمىش باعىتتاعى ءىس-شارالاردى جۇزەگە اسىرۋعا يۋنيسەف قورىنىڭ وكىلدەرى كومەكتەسەتىن بولادى.

NEET ساناتىنداعى جاستارمەن جۇمىس جونىندەگى رەسپۋبليكالىق جوبالىق كەڭسە جۇمىسىنا جۋىردا كىرىسەدى. ونىڭ قىزمەتى وڭىرلەردەگى جەرگىلىكتى اتقارۋشى ورگاندارعا NEET ساناتىنداعى جاستار سانىن انىقتاۋدىڭ جاڭا ادىستەمەلەرىن قالىپتاستىرۋدا، اتالمىش ساناتتاعى جاستارمەن جۇمىستىڭ جاڭا الگوريتمدەرىن دايىنداۋدا ادىستەمەلىك قولداۋ كورسەتۋگە باعىتتالعان. كەڭسە جۇمىسىنا مەملەكەتتىك ورگانداردىڭ، قوعامدىق ۇيىمدار تارتىلماق. كەڭسەنى ءبىز جاستار ماسەلەلەرىن شەشۋدە ۆەدومستۆوارالىق ىنتىماقتاستى، ارەكەتتەستىكتى كۇشەيتۋ ءۇشىن قۇرىپ وتىرمىز. بىرلەسكەن جۇمىس بارلىق مەملەكەتتىك ورگانداردا جۇرگىزىلەتىن بولادى. NEET ساناتىنداعى جاستارمەن جۇمىس جونىندەگى رەسپۋبليكالىق جوبالىق كەڭسە ورتالىق دەڭگەيدە جۇمىس ىستەسە، وڭىرلەردە بۇل ىسپەن اكىمدىكتەر، بىرقاتار مەملەكەتتىك ورگاندار، جاستار رەسۋرستىق ورتالىقتارى اينالىسادى», - دەيدى «جاستار» عىلىمي-زەرتتەۋ ينستيتۋتىنىڭ ديرەكتورى ايان ساكوشەۆ.

ول سونداي-اق، NEET ساناتىنداعى جاستاردىڭ الەۋمەتتىك ۇستانىمدارى تۋرالى زەرتتەۋ ناتيجەلەرىن ۇسىنىپ، NEET-جاستار سياقتى الەۋمەتتىك ستراتانىڭ قالىپتاسۋىنىڭ نەگىزگى سەبەپتەرىنە جانە سول ساناتتاعى جاستاردى الەۋمەتتەندىرۋ بويىنشا جۇمىس ادىستەرىنە توقتالدى.

مۇنىمەن قوسا، ۇيلەستىرۋ كەڭەسىنىڭ وتىرىسى اياسىندا NEET ساناتىنداعى جاستارمەن جۇمىس ىستەۋدىڭ ايماقتىق تاجىريبەسى تانىستىرىلدى. اتاپ ايتقاندا، جامبىل وبلىسىنىڭ جاستار رەسۋرستىق ورتالىعىنىڭ ديرەكتورى ايبەك تاۋتەن NEET-جاستارمەن جۇمىس ىستەۋ ءبولىمىن قۇرۋ تاجىريبەسىمەن ءبولىستى.

ءوز كەزەگىندە يۋنيسەف-ءتىڭ جاسوسپىرىمدەر مەن جاستاردى دامىتۋ باعدارلاماسىنىڭ ۇيلەستىرۋشىسى ايگۇل قادىروۆا جاستار رەسۋرستىق ورتالىقتارىنىڭ پراكتيكالىق تاجىريبەسىنە سۇيەنە وتىرىپ، جاستار اراسىندا «softskills» دامىتۋ مودەلىن ۇسىندى.

كەزدەسۋ سوڭىندا NEET ساناتىنداعى جاستارمەن جۇمىس ىستەۋ ادىستەمەلەرىن ايماقتىق ەرەكشەلىكتەردى ەسكەرە وتىرىپ جەتىلدىرۋ بويىنشا ناقتى ۇسىنىستار ازىرلەندى.

ايتا كەتەيىك،  قازاقستاندا جىل سايىن جۇمىسسىز نەمەسە جارتىلاي جۇمىسپەن قامتىلعان جاستار كورسەتكىشتەرىنىڭ سانى ارتىپ كەلەدى. بۇل كورسەتكىشكە پاندەميا دا اسەرىن تيگىزبەي قويمادى. سوڭعى ستاتيستيكالىق مالىمەتتەر بويىنشا NEET جاستارىنىڭ قازاقستانداعى ۇلەسى 6,9% قۇرايدى.

Abai.kz