بەيسەنبى, 24 ماۋسىم 2021
2310 2 پىكىر 30 ءساۋىر, 2021 ساعات 13:36

ميتينگ قارساڭىندا بەلسەندىلەردى پوليتسياعا شاقىرا باستادى

1 مامىرعا بەلگىلەنگەن ميتينگ قارساڭىندا قازاقستاننىڭ تۇكپىر-تۇكپىرىندە بەلسەندىلەر وزدەرىن پوليتسياعا جاپپاي شاقىرا باستاعانىن حابارلادى. كەيبىرى اكىمشىلىك جازاعا تارتىلىپ، قامالعان.

29 ساۋىردە الماتى قالاسىنىڭ مامانداندىرىلعان اۋدانارالىق اكىمشىلىك سوتى بەلسەندى راكيلا بەكنازاروۆانى 15 تاۋلىككە قامادى. بۇل تۋرالى بەلسەندى ايجان بايسوۆا Facebook-تاعى پاراقشاسىندا حابارلادى.

سوت كابينەتى سايتىندا راكيلا بەكنازاروۆانىڭ سوتى وتكەنى جايلى اقپارات بولسا دا، قاۋلىسى ازىرگە سالىنباعان. ونىڭ ءىسىن سۋديا عاليا قاسىموۆا حابارلاعان.

اقپاراتقا قاراعاندا، بەكنازاروۆا 2 ءساۋىر قالالىق پوليتسيا دەپارتامەنتى عيماراتى ماڭىندا قىزىلوردالىق بەلسەندى مۇراتباي بايماعامبەتوۆتى قولداعانى ۇشىن اكىمشىلىك قاماۋعا الىنعان. وعان "بەيبىت جيىن وتكىزۋ ءتارتىبىن بۇزدى" دەگەن ايىپ تاعىلعان.

ءبىر كۇن بۇرىن ءدال وسىنداي ايىپپەن الماتىلىق بەلسەندى گۇلميرا احمانوۆا 12 تاۋلىككە قامالعان. سوت قاۋلىسىندا احمانوۆانىڭ 2 ساۋىردە 17 ادامنان قۇرالعان توپپەن بىرگە قىزىلوردالىق بەلسەندى مۇراتباي بايماعامبەتوۆتى قولداپ، پوليتسيا عيماراتى ماڭىندا "رۇقساتسىز اكتسيا" وتكىزگەنى (488-باپ 6-بولىگى، "بەيبىت جيىن وتكىزۋ ءتارتىبىن بۇزۋ") جازىلعان. جينالعاندار "بوستاندىق!" دەپ ايقايلاعان.

ونداعى مالىمەتكە قاراعاندا، گۇلميرا احمانوۆا وزىنە تاعىلعان ايىپتى مويىنداماعان. قاۋلىدا احمانوۆانىڭ "شاراعا بەلسەندى قاتىسقانى" پوليتسيا قىزمەتكەرىنىڭ ءتۇسىرىپ العان ۆيدەوسىمەن دە دالەلدەنگەنى كورسەتىلگەن.

مۇراتباي بايماعامبەتوۆ – "تىيىم سالىنعان ۇيىمنىڭ ىسىنە ارالاستى" دەپ ايىپتالىپ، جاقىندا بوستاندىعى ەكى جىلعا شەكتەلگەن قىزىلوردالىق بەلسەندى. ء(ساۋىر باسىندا ونىڭ تەرگەۋ يزولياتورىندا بەلگىسىز جاعدايدا جاراقاتتانىپ، اۋرۋحاناعا تۇسكەنى، وتانى باستان كەشىرگەنى حابارلانعان. وبلىستىق قاج دەپارتامەنتى بەلسەندى تەرگەۋ امالدارىنا قارسىلىق ءبىلدىرىپ، ء"وزىن جاراقاتتادى" دەگەن. ال رەسمي ورگاننىڭ سوزىنە كۇماندانعان بەلسەندىلەر وعان ومبۋدسمەندى كىرگىزۋدى تالاپ ەتىپ، الماتىدا ءبىر توپ ادام پوليتسيا عيماراتىندا ونى قولداۋ اكتسياسىن وتكىزگەن ەدى).

بۇعان دەيىن قۋعىنداعى بۇرىنعى بانكير، شەتەلدە تۇراتىن اقوردا وپپونەنتى مۇحتار ءابليازوۆ جاقتاستارىن 1 مامىردا جاپپاي نارازىلىققا شاقىرعان ەدى. وسىعان دەيىن ميتينگ تاقىرىبى: ساياسي تۇتقىندارعا بوستاندىق، ەۋروپارلامەنت رەزوليۋتسياسىنىڭ ورىندالۋى، ءماجبۇرلى ۆاكتسيناتسياعا جول بەرمەۋ جانە قىمباتشىلىق بولاتىنى حابارلاندى.

قازاقستاندا وسىعان ۇقساس بەيبىت ميتينگ وتەتىنى حابارلانعان كەزدە جەر-جەردە پوليتسيانىڭ بەلسەندىلەردى بولىمشەگە شاقىرىپ، ۇستاپ، قاماۋى جيىلەي باستايدى. الماتىلىق بەلسەندى سابىرجان حاسەنوۆ 29 ساۋىردە وپەراتسيانى باستان كەشىرىپ، توسەكتە تاڭىلىپ جاتقانىنا قاراماستان پوليتسەيلەردىڭ ادەتىنە باسىپ، ءۇيىن تورۋىلداپ جۇرگەنىنە شاعىمداندى.

بەلسەندىلەردىڭ ايتۋىنشا، ميتينگ قارساڭىندا پوليتسياعا شاقىرتۋ، ءۇيدىڭ الدىن كۇزەتۋ سياقتى وقيعالار قازاقستاننىڭ وزگە ايماقتارىندا دا، ونىڭ ىشىندە پاۆلودار، قوستاناي، شىمكەنت قالالارىندا دا جالعاسىپ جاتىر. كەيبىر بەلسەندىلەر الەۋمەتتىك جەلىدە وزدەرىنىڭ اتىنان جالعان اككاۋنت پەن حابارلامالار پايدا بولىپ، بيلىكتىڭ وزدەرىن سونداي امالمەن قارالاۋعا تىرىسىپ جاتقانىنا شاعىمداندى.

پوليتسيا ازىرگە وقيعاعا تۇسىنىكتەمە بەرمەدى.

مۇحتار ءابليازوۆ قۇرعان "قازاقستاننىڭ دەموكراتيالىق تاڭداۋى" جانە "كوشە پارتياسى" ەلدە "ەكسترەميستىك ۇيىم" رەتىندە تانىلىپ، قىزمەتىنە تىيىم سالىنعان، بىراق جاقتاستارى سوت شەشىمدەرىمەن كەلىسپەيدى. ەۋروپارلامەنت ەكەۋىن دە وپپوزيتسيالىق قوزعالىس دەپ اتاعان.

قازاقستان بيلىگى وپپوزيتسيالىق بەلسەندىلەر مەن بەيبىت شەرۋگە شىققانداردى ۇستاعانى ءۇشىن ءجيى سىنعا ۇشىرايدى. قۇقىق قورعاۋشىلار قازاقستان بيلىگى قابىلداعان بەيبىت جيىن تۋرالى زاڭنىڭ حالىقارالىق ستاندارتقا سايكەس ەمەستىگىن اتاپ وتەدى. بۇل زاڭ ميتينگ وتكىزبەي تۇرىپ جەرگىلىكتى بيلىككە ەسكەرتۋ جاساۋعا مىندەتتەيدى. اكىمدىك ونداعان سەبەپپەن ميتينگ وتكىزۋ تۋرالى ءوتىنىشتى كەرى قايتارا الادى. بەلسەندىلەر بەيبىت جيىن وتكىزۋ ەركىندىگىنە اتا زاڭ كەپىلدىك بەرگەندىكتەن پوليتسيا مەن ىشكى ساياسات، پروكۋراتۋرا وكىلدەرىنىڭ ارەكەتىن زاڭسىز دەپ سانايدى.

Abai.kz

2 پىكىر