جاڭاوزەندە جالاقى ءوسىرۋدى تالاپ ەتىپ، وتكەن اپتادان بەرى ەرەۋىلدەتكەن "مۇنايفيلدسەرۆيس" پەن "بۇرعىلاۋ" كومپانيالارىنا مەردىگەرلىك قىزمەت كورسەتەتىن ەكى كومپانيا: "MADIBA" مەن "فيركروفت ينجينيرينگ سەرۆيس ليميتەد قازاقستان" جۇمىسشىلارى تالاپتارىنىڭ ورىندالعانىن حابارلادى.

قالانىڭ ەكى بولىگىندە ەرەۋىلدەتكەن ەكى كومپانيا جۇمىسشىلارى 29 ساۋىردەن باستاپ جۇمىسقا شىققان.

مفس-كە قىزمەت كورسەتەتىن "MADIBA"-نىڭ جيىرما شاقتى جۇمىسشىسى بۇعان دەيىن 80-90 مىڭ تەڭگەلىك ايلىعىن 180-200 مىڭ تەڭگەگە دەيىن ءوسىرۋدى تالاپ ەتىپ، جۇمىسقا شىعۋدان باس تارتقان ەدى.

– بىزگە كەشە اكىمنىڭ ورىنباسارى كەلىپ، مفس باس ديرەكتورى مەن ەڭبەك ينسپەكتسياسى، سوسىن كەڭەسشىسى بار، تورتەۋى كەلىپ، جينالىس جاساپ، جينالىستا بارلىعى تولەنەتىنىن ەسكەرتىپ ايتتى. جۇمىسقا شىعۋ كەرەكتىگىن ەسكەرتتى. ءسۇيتىپ، بۇگىننەن باستاپ جۇمىسقا شىقتىق. سول جونىندە پروتوكول الدىق، – دەدى ەرەۋىلشىلەردىڭ ءبىرى جەڭىس بوپيلوۆ ازاتتىق تىلشىسىنە.

"MADIBA" كومپانياسىنىڭ ديرەكتورى عالىمجان قارجاۋبايۇلى دا جۇمىسشىلاردىڭ تالاپتارى ورىندالعانىن راستادى.

– جالاقى مولشەرى "قازمۇنايگازدىڭ" يندەكساتسياسىنا بايلانىستى. قمگ كەلىستى. قازىر ەسەپتەپ جاتىر، – دەدى كومپانيا باسشىسى 29 ساۋىردە تۇستەن كەيىن ازاتتىق تىلشىسىنە. ونىڭ سوزىنە قاراعاندا كومپانيادا 27 جۇمىسشى بار. سولاردىڭ بارلىعىنىڭ جالاقىسى كوبەيەدى.

"فيركروفت" جۇمىسشىلارى دا 29 ساۋىردەن باستاپ جۇمىسقا شىققانىن راستادى. ولار ازاتتىققا 28 ءساۋىر كۇنى بولعان ەڭبەك داۋىنا قاتىستى حاتتامانىڭ كوشىرمەسىن دە كورسەتتى.

– قاڭتاردان باستاپ تولەنگەن جالاقىلاردى قايتا ەسەپتەپ، تولەيدى. بۇرعىلاۋداعى تاريفتەرمەن تەڭەستىرىپ بەرەدى. 13-جالاقى، ماتەريالدىق كومەك سياقتى نارسەلەر جۇرمەيدى دە، ايلىق "بۇرعىلاۋ" جۇمىسشىلارىنىكىمەن تەڭ بولادى. بالالار ءماز. بۇگىننەن باستاپ ءبارى جۇمىسقا شىعىپ جاتىر، - دەدى جۇمىسشىلاردڭ ءبىرى ازاتتىق تىلشىسىنە.

بۇعان دەيىن جۇمىس بەرۋشى "فيركروفت" كومپانياسى ەرەۋىلشىلەردى سوتقا بەرگەن ەدى. مۇنايشىلاردىڭ سوزىنە قاراعاندا، "فيركروفت" 50 جۇمىسشىنىڭ ۇستىنەن تۇسىرگەن ارىزدى قايتارىپ العان.

بىلتىر پرەزيدەنت قاسىم-جومارت توقاەۆ ەڭبەك كودەكسىنە ەنەتىن تۇزەتۋلەردى ماقۇلداپ، سوعان سايكەس اۋتسورسينگ كومپانيا قىزمەتكەرلەرى وزدەرىن جالدايتىن كاسىپورىن قىزمەتكەرلەرىمەن تەڭ جالاقى الۋى ءتيىس بولعان. ال جاڭاوزەندىك مۇنايشىلار بۇعان دەيىن كودەكس ەرەجەلەرى ورىندالماي جاتىر دەپ شاعىمدانعان ەدى.

Abai.kz