بۇل تۋرالى جامبىل وبلىسى بويىنشا سوتتار اكىمشىسىنىڭ باسشىسى بەرىك قۇلتاسوۆ وڭىرلىك كوممۋنيكاتسيالار قىزمەتىندە وتكەن بريفينگتە ايتتى. بۇل تۋرالى baq.kz  سايتى حابارلادى.

"جامبىل وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى 2021 جىلدىڭ 27 ساۋىرىندە قورداي اۋدانىنداعى جاپپاي تارتىپسىزدىك بويىنشا ۇكىم شىعاردى. 2020 جىلدىڭ 7-8 اقپان ارالىعىندا جامبىل وبلىسى قورداي اۋدانى ماسانشى، بۇعار-باتى جانە اۋقاتتى اۋداندارىندا جاپپاي تارتىپسىزدىك بولدى. وندا ولار زورلىق-زومبىلىق كورسەتىپ، ورتەپ، مۇلىكتى قيراتىپ، اتىس قارۋىن قولداندى. سالدارىنان 10 ازامات قازا تاۋىپ، تاعى ءبىر ادام جانىپ جاتقان عيماراتقا قۇلاپ، قايتىس بولدى", - دەدى ول.

قۇلتاسوۆ ايتقانداي، 158 ازامات پەن 20 پوليتسيا قىزمەتكەرى جاراقات الدى.

"156 تۇرعىن ءۇي مەن ساۋدا نىساندارى، 102 اۆتوكولىك قۇرالى ءبۇلىنىپ، مەنشىك يەلەرىنە كەلتىرىلگەن زالال 829 ملن 848 مىڭ تەڭگە بولدى. جامبىل وبلىسى پوليتسيا دەپارتامەنتىنىڭ 10 اۆتوكولىگى زاقىمدالدى. مەملەكەتكە 3 ملن 291 مىڭ تەڭگە زالال كەلتىرىلدى", - دەدى ول.

ونىڭ ايتۋىنشا، جاپپاي تارتىپسىزدىكتىڭ تۋىنداۋىنا اتالعان اۋىلدار تۇرعىندارىنىڭ اراسىنداعى تۇرمىستىق جاعداي بولدى.

"بۇعان دەيىن سوت ۇكىمى بويىنشا بۇزاقىلىق ارەكەتتەرمەن دەنساۋلىققا زيان كەلتىرىپ، بيلىك وكىلدەرىنە كۇش قولدانعانى ءۇشىن 6 ادام سوتتالعان بولاتىن. بۇگىنگى قىلمىستىق ءىس بويىنشا 2020 جىلدىڭ 8 جەلتوقسانىنان بيىلعى 19 ساۋىرگە دەيىن ءوتتى. وعان ەكى پروكۋرور، 366 جابىرلەنۋشى جانە 16 جابىرلەنۋشى وكىلى، 10 قورعاۋشى جانە 4 اۋدارماشى قاتىستى", - دەدى ول.

قۇلتاسوۆ اتاعانداي، ءىس بويىنشا 51 ادام ايىپتالۋشى رەتىندە سوتقا بەرىلىپ، ونىڭ ىشىندە 33-ءى قاماۋدا، 18 ادام جەكە كەپىلدىك جانە ەشقايدا كەتپەۋ قولحاتى بويىنشا ۇستالدى.

"سوتتالۋشىلارعا ءتۇرلى سونىڭ ىشىندە اۋىر جانە اسا اۋىر قىلمىستار جاسادى دەگەن ايىپ تاعىلدى. سوت زاڭ مەن سوت الدىنداعى تەڭدىك ءپرينتسيپىن باسشىلىققا الىپ، جينالعان دالەلدەمە مەن قىلمىستىق زاڭنامادا كورسەتىلگەن جازا اياسىندا كەلەسى شەشىمدەردى شىعاردى: 50 ادامدى كىنالى دەپ تانىپ، ءبىر ادامنىڭ كانىسىنىڭ دالەلدەنبەۋىنە بايلانىستى ونى اقتادى. سوتتالۋشىلاردىڭ كىنالارى مولەكۋليارلىق، سوت-تەرگەۋ قورىتىندىلارى مەن جاسىرىن بەينەباقىلاۋ دالەلدەمەلەرىمەن تولىق دالەلدەنگەن", - دەدى ول.

Abai.kz