سەيسەنبى, 17 مامىر 2022
كۇبىرتكە 5234 11 پىكىر 13 ءساۋىر, 2021 ساعات 19:51

مينيستر رايىمقۇلوۆانىڭ باسى داۋعا قالدى

قازاقستاننىڭ ءبىر توپ ونەر قايراتكەرلەرى پرەزيدەنت توقاەۆتىڭ اتىنا اشىق حات جاريالاپ، قر مادەنيەت جانە سپورت ءمينيسترى اقتوتى رايىمقۇلوۆانىڭ قىزمەتىنە كوڭىلدەرى تولمايتىندىقتارىن ءبىلدىرىپتى.

ەل پرەزيدەنتىنىڭ اتىنا جولدانعان ءۇشبۋ حاتتا اۋەلى اباي اتىنداعى وپەرا جانە بالەت تەاترىنىڭ اينالاسىنداعى جاعداي تۋرالى باياندالعان.

«ءدال وسىنداي قيىن كەزەڭدە ارتىستەر حالىقتىڭ رۋحىن كوتەرۋدىڭ جانە ءوز تالانتتارىن جاڭا قىرىنان كورسەتۋ مەن قوعاممەن بايلانىس ورناتۋدىڭ جاڭا، قىزىقتى فورماسىن تاپتى. ءبىز ءبارىمىز وسى كونەكوز تەاترىمىزدىڭ (اباي اتىنداعى وپەرا جانە بالەت تەاترى) تانىمالدىلىعى مەن ونلاين باعدارلامالارىنىڭ ارقيلىلىعى جاعىنان تمد تەاترلارى اراسىندا ۇزدىك ۇشتىككە ەنگەنىنە قۋاندىق، ماقتاندىق. ءبىزدىڭ تەاترىمىز تەك، رەسەي مەن بەلارۋستىڭ «ۇلكەن تەاترلارىنا» عانا ەسە جىبەردى. ەدس جىلدارىنداعىداي، تەاتر ۇلتتىڭ رۋحاني جانە ەموتسيونالدىق رۋحىن كوتەرۋدىڭ الدىڭعى شەبىندە تۇردى.

تەاتردى تۆورچەستوۆولىق تۇراقتى جاعداي قالىپتاستىرىپ، ىسكەرلىك جۇمىسىن توقتاتپاي، ايتارلىقتاي بيىك ناتيجەلەرگە جەتكىزۋدە ۇجىمنىڭ ءبىرىنشى جەتەكشىسى ايا قاليەۆانىڭ وراسان زور ەڭبەگى بار ەكەنىنە قوعامشىلىق تا كەلىسەدى دەپ ەسەپتەيمىز. ونىڭ پروفەسسيوناليزمى، جەدەل شەشىمدەر قابىلداي ءبىلۋى، ۇيىمشىلدىعى مەن ءوز ۇجىمىن جىگەرلەندىرە ءبىلۋى، تۆورچەستۆولىق جاڭا تاسىلدەردى ىزدەي الاتىندىعى مەن ءار ءىستىڭ گەنەراتورى بولا ءبىلۋى ءوز الدىنا بولەك ءسوز»، - دەي كەلە تەاتردىڭ كارانتين كەزىندەگى قىزمەتى مەن جەتكەن جەتىستىكتەرى تۋرالى ءسوز ەتكەن.

ءسوز اياعىندا: «الايدا ءبىزدى مادەنيەت سالاسىنداعى سوڭعى بولىپ جاتقان وقيعالار الاڭداتادى. ول ءبىزدىڭ سۇيىكتى تەاترىمىزعا قاتىستى. وسى جىلدىڭ 18 اقپانىندا ديرەكتور ايا قاليەۆانى اياق-استىنان، ەشقانداي ءتۇسىندىرۋسىز قىزمەتىنەن بوساتتى. مادەنيەت جانە سپورت مينيسترلىگىنىڭ بۇل شەشىمى تەاتر ۇجىمى مەن قوعامشىلىقتا تالقى تۋدىردى.

ءبىز تەاتر ۇجىمىنىڭ وسى ەكى جىلدا ءىلدالدالاپ ءجۇرىپ قالىپتاسقان تۆورچەستۆولىق جىگەرى بۇلىنبەسە ەكەن دەيمىز. تەاتر باسشىلىعىنا ايا قاليەۆانىڭ كەلۋىمەن تەاتر توڭىرەگىندەگى داۋ باسىلىپ، ۇجىم جۇمىسى قالىپقا تۇسكەن بولاتىن»، - دەگەن ونەر قايراتكەرلەرى ايا قاليەۆانىڭ قىزمەتىنە كەپىلدەمە رەتىندە اتقارعان جۇمىستارى مەن جەتكەن جەتىستىكتەرىن ءتىزىپ ايتىپ، ءسوز تۇيىنىندە: «بۇگىن ارىپتەستەرى  ايا جاكەنقىزىنا قولداۋ بىلدىرۋدە. ءبىز قازاقستاننىڭ تۆورچەستۆولىق ينتەلليگەنتسياسى ايا قاليەۆا جاعىندامىز»، - دەيدى.  پرەزيدەنت توقاەۆتان اراشا سۇراپ، ىسكە ارالاسۋىن وتىنەدى.

حاتقا بيبىگۇل تولەگەنوۆا، رەنات سالاۆاتوۆ، عافيز ەسىموۆ، ناعيما ەسقاليەۆا، نۇرجامال ۇسەنباەۆا، لاكي كەسوگلۋ، ليۋتسيا تۋلەشوۆا، بەيىمبەت قوجەباەۆ،  مۇرات شالاباەۆ،  تولقىن زابيروۆا، مۇحتار قالداياقوۆ سەكىلدى ەسىم-سويى ەلگە بەلگىلى ادامدار قول قويعان.

اتالعان مازمۇنداعى اشىق حات Abai.kz اقپاراتتىق پورتالىنىڭ رەداكتسياسىنا دا كەلىپ تۇسكەن. اشىق حات ورىس تىلىندە ازىرلەنگەن.

ال كەشە بەلگىلى كينو رەجيسسەر ەرمەك تۇرسىنوۆ اتالعان اشىق حاتتى ءوزىنىڭ «Instagram-داعى» پاراقشاسىندا جاريالاپ، «پرەزيدەنت نەگە شارا قابىلداماي وتىر»، - دەپ جازدى.

«جالپى حالىققا تانىمال مۋزىكانتتاردىڭ پرەزيدەنتكە  حات جازۋىنا نە سەبەپ بولدى؟ سول باياعى... داۋدىڭ ورتاسىنداعى تاعى دا مادەنيەت ءمينيسترى اقتوتى رايىمقۇلوۆا. جۇرت ونىڭ قىزمەتىنە كوڭىلدەرى تولمايدى. پرەزيدەنتتەن وسى ىسكە ارالاسىپ، شەشىم قابىلداۋىن سۇراۋدا.

بۇل ونەر يەلەرىنىڭ مەملەكەتتىڭ ءبىرىنشى تۇلعاسىنا قايرىلىپ، حات جازعان ءبىرىنشى جاعدايى ەمەس. وسىعان دەيىن توقاەۆقا ەسىمى ەلگى بىلگىلى كينوگەرلەر حات جازدى. ونىڭ الدىندا تەاتر قايراتكەرلەرى دە جازعان. ەندى كىتاپحاناشىلار مەن مۋزەي قىزمەتكەرلەرى جازۋى كەرەك شىعار. بالكىم، سوندا ەستىر؟

تاعى كىمدەر وسى مينيسترلىكتىڭ قول استىندا؟ سپورتشىلار؟ اناۋ ۆيتسە-ءمينيستردى ءبىر سومكەمەن اۋەجايدى ۇستاعان جوق پا؟ نە بولدى؟ ەشتەڭە دە بولعان جوق. وتىرعان ورنىندا وتىر.

ال مىنا جاعدايعا قاتىستى، مەنشە، وسىنىڭ بارلىعى بەكەر!  وسى حاتتار، وتىنىشتەر، تالاپتار بوس اۋرەشىلىك. ەشقانداي دا رەاكتسيا بولمايدى!

ادەتتەگىدەي، الدىمەن اقپاراتتىڭ قايدان شىققانىن انىقتايدى. سوسىن، اتاقتى ادامدارعا كىمدەردىڭ قول قويدىرعانىن ىزدەۋگە كوشەدى. سوسىن قول قويعانداردى كەزەك-كەزەك ايىپتاي باستايدى. بىرەۋىنە - قول قويۋدان باس تارتۋىن وتىنەدى، ەندى بىرەۋىنە - ءۇيىپ-توگىپ ۋادە بەرەدى. ال بىرەۋلەرىن - قورقىتىپ-ۇركىتەدى. بارلىعى دا تەكسەرىلگەن، تانىمال ادىستەر. بىراق، ەڭ اقىرىندا ەڭ ماڭىزدىسى ۇمىت قالادى. جۇرت مۇنداي مينيستردەن قۇتقارۋدى سۇرادى ەمەس پە؟»، - دەپ جازدى ەرمەك تۇرسىنوۆ. تۇرسىنوۆتىڭ تولىق جازباسىن ونىڭ Facebook-تەگى پاراقشاسىنان وقۋعا بولادى.

 

«Nege.kz» سايتى اباي اتىنداعى قازاق مەملەكەتتىك وپەرا جانە بالەت تەاترىنىڭ كوركەمدىك جەتەكشىسى شاحيماردان قايدارۇلىنىڭ پىكىرىن جاريالاپتى. وندا شاحيماردان قايدارۇلى: «بىرەۋدىڭ اتىنان اشىق حات دايىنداۋ – ناعىز باسسىزدىق»، - دەپتى.

«ءبىز نەگە ءبىر-ءبىرىمىزدىڭ ارتىمىزعا ءتۇسىپ الامىز؟ بۇل ادامگەرشىلىك قاسيەتكە جاتا ما؟ ءبىز ابايدىڭ جولىمەن جۇرسەك، بۇلاي بولماس ەدى. ءوز باسىم مينيستر اقتوتى رايىمقۇلوۆانى وتە جاقسى بىلەمىن. قۇرمانعازى اتىنداعى كونسەرۆاتوريادا 35 جىل جۇمىس ىستەدىم. دەكان بولدىم. ونى مينيستر ەتىپ تاعايىنداعاندا قۋاندىم. بىزگە بىرلىك كەرەك. مۇنى باسقا ەل-جۇرت كورسە كۇلەدى. ءار نارسەنىڭ ولشەمى بار. ال كسرو حالىق ءارتىسى بيبىگۇل احمەتقىزى ەشقاشان مۇنداي جالا ارىزعا قول قويمايدى. ولاردىڭ اتىنان اشىق حات دايىنداۋ – ناعىز باسسىزدىق. اۋەلى ءمينيستردىڭ جۇمىسىنا باعا بەرۋ كەرەك قوي»، - دەيدى تەاتردىڭ كوركەمدىك جەتەكشىسى.

وسى جازبادان كەيىن الەۋمەتتىك جەلىدە مينيستر اقتوتى رايىمقۇلوۆانى اقتاۋ «وپەراتسياسى» باستالىپ كەتكەنگە ۇقسايدى. مادەنيەت مينيسترلىگىنە قاراستى ءتۇرلى مەكەمەلەردىڭ رەسمي پاراقشالارى «ءبىز اقتوتى رايىمقۇلوۆانى قولدايمىز» دەگەن ماعىناداعى جازبالار جاريالاي باستادى. قاراڭىز:

ق.قوجامياروۆ اتىنداعى مەملەكەتتىك اكادەميالىق ۇيعىر مۋزىكالىق كومەديا تەاترى: «بءىز اقتوتى راحمەتوللاقىزىن قولدايمىز!» اتتى جازبا جاريالادى.

وندا: «اقتوتى راحمەتوللاقىزى رايىمقۇلوۆانىڭ مينيسترلىك قىزمەتكە تاعايىندالعانىنا ماۋسىمنىڭ 17-جۇلدىزى ەكى جىل تولادى ەكەن. بۇل از ۋاقىتتىڭ ىشىندە ەلىمىزدىڭ مادەنيەت جانە سپورت سالاسىندا كوپتەگەن وڭدى ىستەر اتقارىلدى. ءمينيستردىڭ ىستەرىن ىسكەرلىگىن باعالاماۋ جونسىزدىك، البەتتە. وسى تۇرعىدان، 2018 جىلى تەاترىمىزدا باستالعان كۇردەلى جوندەۋ جۇمىستارى 2020 جىلدىڭ قاراشا ايىندا ءساتتى اياقتالدى. كورەرمەندەرىمىزدى ۇيعىر تەاترىنىڭ جاڭا عيماراتىندا قارسى الدىق، 86 ماۋسىمدى اشتىق. وسىنداي از ۋاقىتتىڭ ىشىندە ۇيعىر تەاترى عيماراتىن قايتا قۇرۋدا قولداۋ كورسەتكەن مادەنيەت مينيسترلىگىنە - اقتوتى راحمەتوللاقىزىنا العىسىمىز شەكسىز! اقتوتى راحمەتوللاقىزىن ءبىلىمدى دە بىلىكتى ءوز ءىسىنىڭ شەبەر مامانى رەتىندە جوعارى باعالايمىز! ق.قوجامياروۆ اتىنداعى مەملەكەتتىك اكادەميالىق ۇيعىر مۋزىكالىق كومەديا تەاترىنىڭ ديرەكتورى لاۋازىمىن ۋاقىتشا اتقارۋشى ساۋتجان سونۋروۆ باسشىلىعىنداعى تەاتر ۇجىمى مينيسترگە ءوز قولداۋىن بىلدىرەدى. ءبىز، اقتوتى راحمەتوللاقىزىنىڭ قىزمەتىنە تەك شىعارماشىلىق تابىس پەن سəتتىلىك تىلەيمىز!»، - دەپ جازىلعان.

«تاڭبالى» مەملەكەتتىك تاريحي-مادەني جانە تابيعي-قورىق مۋزەيى تەاترى: «اقتوتى راحمەتوللاقىزىن جوعارى ءبىلىمدى، ءوز ءىسىنىڭ كəسىبي مامانى رەتىندە باعالايمىز. كوپتەگەن جىلدار بويى مəدەنيەت سالاسىن باسقارۋدا جيناعان تəجىريبەسى - مينيستر دەڭگەيىنەن تومەندەتپەيتىنىنە سەنىمدىمىز. «وزىڭە سەن، ءوزىڭدى الىپ شىعار-اقىلىڭ مەن ءبىلىمىڭ ەكى جاقتاپ»، - دەپ ۇلى اباي وسىندايدا ايتسا كەرەك. ءبىز، اقتوتى راحمەتوللاقىزىنىڭ قىزمەتىنە تەك قانا شىعارماشىلىق تابىس پەن سəتتىلىك تىلەيمىز!»، - دەپ جازدى.

كىتاپ پالاتاسى: «اقتوتى راحمەتوللاقىزى - تىنىمسىز ەڭبەك ەتىپ، قازاقستان رەسپۋبليكاسىنىڭ مادەنيەت، ونەر سالالارىنا ايتارلىقتاي وزگەرىستەر ەنگىزگەن، مينيسترلىككە قاراستى مەكەمەلەردىڭ مۇڭ-مۇقتاجىنا قۇلاق اسىپ، زاڭ اياسىندا بىرنەشە ماسەلەنى جولعا قويعان بىلىكتى باسشى.

جۇمىس ىستەگەن كىسىگە كۇيە جاقپاق بولعانداردىڭ ارەكەتتەرى اشكەرەلەنۋدە. كسرو حالىق ءارتىسى، وپەرا ءانشىسى بيبىگۇل تولەگەنوۆانىڭ ءوزى مۇنداي ۇندەۋگە قول قويماعانىن ايتىپ، اقتوتى رايىمقۇلوۆانىڭ جۇمىسىنا جوعارى باعا بەردى.

ءبىز قر مادەنيەت جانە سپورت ءمينيسترى اقتوتى رايىمقۇلوۆانى جانە ونىڭ ۇستانعان جۇمىس باعىتىن تولىق قولدايمىز!»، - دەپ جازدى.

اقپارات ءۇشىن: اقتوتى راحمەتوللاقىزى رايىمقۇلوۆا 2019 جىلدىڭ ماۋسىمىنان بەرى قازاقستاننىڭ مادەنيەت جانە سپورت ءمينيسترى لاۋازىمىن اتقارىپ كەلەدى. وعان دەيىن 2016-2019 جىلى قر مادەنيەت جانە سپورت ۆيتسە-مينيستر قىزمەتىن اتقارعان.

Abai.kz

11 پىكىر