بۇگىن ءماجىلىس سپيكەرى نۇرلان نىعماتۋليننىڭ توراعالىعىمەن وتكەن جالپى وتىرىستا «ەرەكشە تاۋارلاردى باقىلاۋ تۋرالى» زاڭ جوباسى I وقىلىمدا ماقۇلداندى.

زاڭ جوباسىندا ەرەكشە تاۋارلاردى باقىلاۋدىڭ ماقساتتارى، قاعيداتتارى مەن ادىستەرى بەلگىلەنگەن.

قۇجاتتىڭ ماقساتى – ۇلتتىق قاۋىپسىزدىكتى قامتاماسىز ەتۋ، جاپپاي قىرىپ-جويۋ قارۋىن تاراتپاۋ جانە قارۋ-جاراقتىڭ زاڭسىز ساۋداسىنا جول بەرمەۋ جونىندەگى حالىقارالىق مىندەتتەمەلەردى ساقتاۋ.

وتىرىس بارىسىندا دەپۋتاتتار تاۋارلار مەن قىزمەتتەردى زاڭسىز يمپورتتاۋعا بايلانىستى جاۋاپكەرشىلىك ەنگىزۋدى ۇسىندى.

ءماجىلىس توراعاسى نۇرلان نىعماتۋلين دەپۋتاتتاردى قولداي وتىرىپ:

- مەنىڭشە، دەپۋتاتتاردىڭ جۇمىس توپتارىندا ەنگىزگەن تۇزەتۋلەرى ماڭىزدى جانە وزەكتى. ەگەر اتالعان ماسەلە بويىنشا ۇكىمەتتىڭ نۇسقاسىن باسشىلىققا الاتىن بولساق، وندا ءبىزدىڭ شەكارامىز ارقىلى كەز-كەلگەن تاسىمال تەحنولوگيالارعا، عىلىمي-تەحنيكالىق قۇجاتتامالارعا باعدارلامالىق قامتاماسىز ەتۋگە تىيىم سالىنعان. الايدا، قىلمىستىق كودەكستىڭ 275-بابىنا سايكەس، تەك قانا زاڭسىز ەكسپورتقا جازا قولدانىلادى. سوندىقتان، دەپۋتاتتار تەك زاڭسىز ەكسپورتقا عانا ەمەس، سونىمەن قاتار ەرەكشە تاۋارلاردىڭ زاڭسىز يمپورتى ءۇشىن دە جازا بەلگىلەۋ تۋرالى وڭتايلى ۇسىنىس ەنگىزدى دەپ ەسەپتەيمىن، - دەدى نۇرلان نىعماتۋلين.

ايتا كەتۋ كەرەك، زاڭ جوباسى ەرەكشە تاۋارلاردىڭ ەكسپورتىن، كەرى ەكسپورتىن، يمپورتىن، ءترانزيتىن، ەكساۋماقتىق كەرى ەكسپورتىن، ەكساۋماقتىق دەلدالدىق قىزمەتتەر كورسەتۋدى نەمەسە تەحنيكالىق كومەكتى جۇزەگە اسىرۋ كەزىندەگى قاتىناستاردى رەتتەۋگە باعىتتالعان.

Abai.kz