بەيسەنبى, 28 ناۋرىز 2024
3253 2 پىكىر 5 ءساۋىر, 2021 ساعات 16:24

بيىلعى ۇبت قالاي وتەدى؟

قر ءبىلىم جانە عىلىم ۆيتسە-ءمينيسترى ميراس داۋلەنوۆ، قر بعم جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى ادىلەت تويباەۆ، قر بعم ۇلتتىق تەستىلەۋ ورتالىعىنىڭ ديرەكتورى ديدار سماعۇلوۆ بيىل ۇلتتىق بىرىڭعاي تەستىلەۋ قالاي وتەتىنىن ءتۇسىندىردى،- دەپ جازادى Tengrinews.kz.

بيىل ۇبت ەلەكتروندى فورماتتا وتەدى. جالپى 2004 جىلدان باستاپ تەستىلەۋ قاعاز فورماتىندا وتكىزىلگەن. بۇگىندە تەست مەملەكەتتىك گرانتتى جەڭىپ الۋ كونكۋرسىنا قاتىسۋ ءۇشىن عانا تاپسىرىلادى. بيىل تەست تاپسىراتىن 120 مىڭنان اسا وقۋشى بار.

ەندى ۇبت بۇرىنعىداي 7-10 كۇن ارالىعىندا ەمەس، ءۇش اي بويى جۇرگىزىلەدى. بيىلعى تەستىلەۋدىڭ ەرەكشەلىگى - تەستتى قاي كۇندە، قاي ۋاقىتتا جانە قاي جەردە تاپسىراتىنىن وقۋشىنىڭ ءوزى تاڭدايدى. 

سونىمەن قاتار، تەست ناتيجەسى جۇمىس كۇنىنىڭ سوڭىندا ەمەس، تەست تاپسىرعاننان كەيىن بىردەن شىعادى. وقۋشى ناتيجەمەن كەلىسپەگەن جاعدايدا سول كۇنى 30 مينۋتتىڭ ىشىندە اپەللياتسياعا بەرۋى ءتيىس.

تەست ء"بىر تەستىلەۋشى - ءبىر كومپيۋتەر - ءبىر كامەرا" پرينتسيپى بويىنشا وتەدى. دەمەك ءار وقۋشى جەكە كومپيۋتەرمەن وتىرىپ تەست تاپسىرادى.

تەستتە اقپاراتتىق قاۋىپسىزدىككە ەرەكشە كوڭىل بولىنەدى: تەستىلەۋ پروتسەسى شيفرلاۋ ەلەمەنتتەرى بار ارنايى جابىق VPN جەلىسى ارقىلى وتەدى.

تەست ءۇش اي بويى: ءساۋىر، مامىر، ماۋسىم ايلارىندا وتەدى. بۇل ۋاقىت ارالىعىندا وقۋشىلار ەكى رەت تەست تاپسىرا الادى. تەستتىڭ ەڭ ۇزدىك ناتيجەسىمەن كونكۋرسقا قاتىسۋعا مۇمكىندىك الادى.

پاندەر سانى بۇرىنعىداي: ءۇش مىندەتتى جانە ەكى بەيىندىك ءپان. تەست تاپسىرماسىنىڭ سانى دا، ۋاقىتى دا وزگەرمەيدى - جالپى 120 تاپسىرماعا 4 ساعات بەرىلەدى، ەڭ جوعارى بالل - 140.

سونداي-اق بيىل كوروناۆيرۋس پاندەمياسىنا بايلانىستى سانيتارلىق تالاپتار ساقتالادى: وقۋشىلار ماسكامەن كىرگىزىلىپ، الەۋمەتتىك قاشىقتىق ساقتالىپ، ءار وقۋشى اينەكپەن قورشالىپ وتىرادى.

تەست كەزىندە كالكۋلياتور الىپ كىرۋگە رۇقسات بەرىلەدى. الايدا تاپسىرۋشىدان تىيىم سالىنعان زات تابىلعان جاعدايدا ونىڭ تەستىلەۋ ناتيجەسى جويىلىپ, تەستتى جالعاستىرۋىنا رۇقسات بەرىلمەيدى. سونىمەن قاتار، 25 تامىزعا دەيىن باقىلاۋ كامەرالارى تاعى دا قارالىپ شىعادى. قانداي دا ءبىر ءتارتىپ بۇزۋ بايقالعان جاعدايدا، ەرەجە بۇزعان وقۋشىنىڭ تەست ناتيجەسى جويىلادى.

Abai.kz

2 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2253
عيبىرات

قايسار رۋحتى عازيز جان

مۇحتار قۇل-مۇحاممەد 3515