قازاقستانداعى ەكىنشى ادام كىم؟ مۇنداي ساۋالنامانى ۇكىمەتتىڭ شتاتتان تىس كەڭەسشىسى ەربول ەدىلوۆ «تelegram» كانالىندا جاريالاعان. 

15 - 22 ناۋرىز ارالىعىندا وتكەن ساۋالناماعا 10 368 ادام قاتىسىپتى. ال، «ەكىنشى ادام» بولۋعا كارىم ءماسىموۆ، تيمۋر قۇلىباەۆ، سامات ءابىش، قايرات ساتىبالدى، باۋىرجان بايبەك سەكىلدى لاۋازىمدى ادامدار تاڭداپ الىنعان.

ناتيجەسىندە، داۋىس بەرۋشىلەردىڭ 33 پايىزى ۇقك توراعاسى كارىم ءماسىموۆتى «ەكىنشى ادام» سانايتىندارىن ايتىپتى.

ال، «اتامەكەن» كاسىپكەرلەر پالاتاسىنىڭ باسشىسى تيمۋر قۇلىباەۆ 20 پايىز داۋىس جيناعان. ودان كەيىنگى ورىندى ەكس-پرەزيدەنتتىڭ كومەكشىسى اباي بيسەمباەۆ جيناپتى.

ۇقك توراعاسىنىڭ ورىنباسارى سامات ءابىش - 9 پايىز، ۇكىمەت باسشىسى اسقار مامين - 8 پايىز، ءماجىلىس توراعاسى نۇرلان نىعماتۋللين  - 7 پايىز، «Alatau Capital invest» باسقارما توراعاسى قايرات ساتىبالدى - 4 پايىز، «نۇر وتان» پارتياسى توراعاسىنىڭ ورىنباسارى باۋىرجان بايبەك - 4 پايىز، قاۋىپسىزدىك كەڭەسىنىڭ حاتشىسى اسەت يسەكەشوۆ - 3 پايىز، «سامرۇق-قازىنانىڭ» بۇرىنعى توراعاسى احمەتجان ەسىموۆ - 2 پايىز داۋىس العان.

سونىمەن، ەدىلوۆ مىرزا ەلدەگى «ەكىنشى ادامدى» انىقتاعىسى كەلىپتى. ەدىلوۆ ساۋالناماسىنا قاتىسقان 10 مىڭنان اسا ادام قازاقستانداعى ەكىنشى ادام – ءماسىموۆ دەپتى.  ال، «ءبىرىنشى ادام» كىم؟ سۇراقتى بۇلاي قويۋىمىزدىڭ سەبەبى دە جوق ەمەس. وسىدان ەكى جىل بۇرىن قازاقستاندا بيلىك ءترانزيتى بولىپ، ەكس-پرەزيدەنت نۇرسۇلتان نازارباەۆ قىزمەتىنەن كەتكەندە، ونىڭ ورنىن سول كەزدەگى سەنات توراعاسى قاسىم-جومارت توقاەۆ باسقان. كەيىن توقاەۆ مىرزا پرەزيدەنتتىك سايلاۋعا ەكس-پرەزيدەنت ن.نازارباەۆ توراعالىق ەتەتىن «نۇر وتان» پارتياسى اتىنان قاتىسىپ، جەڭىسكە جەتتى. الايدا، باتىستىق باسىلىمدار قازاقستاندا بيلىك ءترانزيتى تولىق جۇزەگە اسپاعانىن ايتىپ، «ەلدەگى ەڭ ىقپالدى ادام – نۇرسۇلتان نازارباەۆ» دەپ اتاعان. سوندىقتان دا، قازاقستانداعى №1 ادام (لاۋازىم يەسى) كىم دەگەن سۇراق ءبىرازدان بەرى ەلىشىلىك تالقىنىڭ تاقىرىبىنا اينالعان.

نۇربيكە بەكسۇلتانقىزى

Abai.kz