دۇيسەنبى, 19 ءساۋىر 2021
الاڭ 3443 27 پىكىر 3 ناۋرىز, 2021 ساعات 11:51

ەسكەرتكىش قويۋ ناۋقاندىق شاراعا اينالىپ بارادى

ەسكەرتكىشتەر ەل تاريحىن بەينەلەۋمەن قاتار، سول قويىلعان قالا مەن اۋىلعا ەرەكشە كورىك بەرىپ تۇراتىن ساۋلەت ونەرى دەسەك، قاتەلەسە قويماسپىز. الايدا ءبىز وسى كەيىنگى كەزدەرى تاۋەلسىزدىك دەگەندى تەك جاپپاي ەسكەرتكىش ورناتا بەرۋ دەگەن شولاق ويدان ارىلا الماي جۇرگەندەيمىز. ارينە، ورنىمەن، سول تاريحي تۇلعاعانىڭ وبرازىن تولىق اشاتىن بەينەلەرگە ەش قارسىلىعىمىز جوق. الايدا بىزدەگى ەسكەرتكىش قويۋداعى ءبىر سارىندىلىق پەن ءبىرىن-ءبىرى قايتالاۋشىلىق بۇل باستامالاردىڭ قۇنىن ءتۇسىرىپ بارا جاتقان سەكىلدى.

ماسەلەن، حالقىمىزدىڭ باسىنا قيىن زامان تۋعاندا، ونى اتا جاۋدان قورعاپ، اسقان ەرلىك كورسەتكەن دۋلىعالى باتىرلاردىڭ ەسكەرتكىشتەرىنە كوز سالىپ بايقاڭىزشى. ەگىز قوزىداي، ءبىر-بىرىنەن ەش اۋمايدى. استىندا اتى، قولىندا نايزاسى، باسىندا دۋلىعاسى. ءبىتتى. ەسكەرتكىش اۆتورىنىڭ بارلىق فانتازياسى وسىمەن عانا شەكتەلەدى. وزگەشە ءبىر، قالىڭ جۇرتتى «عاجاپ ەكەن»، دەپ باس شايقاماسا دا، وزىندىك جاڭاشا ساۋلەتتىك شەشىمىمەن ەلەڭ ەتكىزەتىندەرى ىلۋدە بىرەۋ يا بولماسا جوق.

ال، ەڭ سوراقىسى، كەيبىر ەسكەرتكىشتەر بەلگىلى ءبىر داتاعا لايىقتالىپ، اسىعىس-ۇسىگىس جاسالادى دا، كوپشىلىكتىڭ ويىنان شىقپاق تۇگىلى، ونى جۇرتقا كورسەتۋگە ۇيالاتىنداي جاعدايعا جەتەدى. كەزىندە سەمەي قالاسىندا اباي مەن ميحاەليسكە دەپ ورناتىلعان ەسكەرتكىشسىماق ۇلى ابايدى ەرگەجەيلى ەتىپ، ونى ميحاەليسكە قاراپ، بىردەڭە كۇتكەندەي حالگە جەتكىزۋى ماداق ەمەس، مازاق دەپ ۇقتىق. ول سوندىقتان دا قالىڭ جۇرتتىڭ اشۋ-ىزاسىن تۋعىزدى. اقىرى، اكىمدىكتىڭ شەشىمىمەن سيىقسىز دا ءساتسىز ەسكەرتكىش ءبىر تاۋلىككە جەتەر-جەتپەس ۋاقىتتا الىنىپ تاستالىپ، ءبىر ابىرويسىزدىقتان امان قالدىق. بۇنىڭ سىرتىندا اناۋ نۇر-سۇلتان قالاسىنداعى سۋىقتان ساقتانعانداي، شاپانىنا ورانىپ تۇرعان ابايدى دا ءساتتى شىقتى دەپ ايتا الماس ەدىك.

اباي مەن ميحاەليس ەسكەرتكىشى كوپتىڭ نارازىلىعىن تۋعىزدى: 23 ماۋسىم 2014, 19:31 - جاڭالىقتار Tengrinews.kz

مۇنداي ساتسىزدىكتەر مەن شالاعايلىقتار اشىعىن ايتقاندا، ناۋقاندىق اۋرۋدان تاراپ جاتىر. قانداي دا تۇلعاعا ونىڭ مەرەكەلىك داتاسى جاقىنداعاندا ەسكەرتكىش ورناتۋ كەرەك دەپ جانتالاسامىز دا، سودان كەلىپ، الگىندەي قولايسىزدىققا ۇشىرايمىز. ال، دۇرىسى، قانداي دا ءبىر ەسكەرتكىش ورناتۋعا ارنايى شىعارماشىلىق كونكۋرس جاريالانۋى قاجەت. سول ەسكەرتكىشتىڭ بولاشاق نوبايى مامانداردىڭ قاتاڭ سۇزگىسىنەن ءوتىپ، سودان سوڭ عانا رۇقسات ەتىلۋى كەرەك. ايتپەسە، تىرشىلىگىمىزدىڭ وزگە دە سالالارىنداعىداي، مۇندا دا تامىر-تانىستىق پەن جەڭ ۇشىنان جالعاسۋ سەكىلدى جامان ادەتتىڭ بەلەڭ الىپ كەتەرى ءسوزسىز. مۇمكىن، ءبىزدىڭ ايتىپ وتىرعان جايىمىز دا وسى تەرەڭدەپ كەتكەن اۋرۋدىڭ ءبىر كورىنىسى بولار. ايتپەسە، ءبىز قانداي دا ءبىر ەسكەرتكىشتىڭ اۆتورى كىم ەكەنىن، ونىڭ بۇرىن قانداي بەينەلەردى دۇنيەگە كەلتىرىپ، قانداي بيىككە كوتەرىلگەندىگى جايلى اقپاراتتان نەگە مۇلدەم حابارسىزبىز؟ جۇرتتىڭ ءبارى بىردەي حاكىمجان ناۋرىزباەۆ ەمەس قوي، اتىنىڭ ءوزى-اق شىنايى شىعارماعا كەپىلدىك بەرەتىن...

ال ىزدەسە، شىن كوڭىلمەن جاقسى ەسكەرتكىش قويايىق دەپ نيەتتەنسە، قۇدايعا شۇكىر، ەلىمىزدە شىن تالانتتار جەتىپ ارتىلادى. ماسەلەن، وتكەندە ءباسپاسوز بەتىنەن ساۋلەتشى-گيپەررەاليست ايدوس ەسماعامبەتوۆ جايلى ماتەريالدى وقىپ، ىزدەگەنىمىزدى تاپقانداي بولىپ، ءسۇيسىنىپ قالدىق. ونىڭ جاساعان مۇسىندەرى اسا ءبىر شىنايىلىعىمەن، ومىرگە دەگەن جاڭاشا كوزقاراسىمەن، جۇرەككە جىلى تيەتىندەي تارتىمدىلىعىمەن ەرەكشەلىنەدى. جاقىندا ول ءوز ينستاگرامىندا ابايدىڭ جاڭا مۇسىنەىن جاريالانىپ، وقىرمانداردى ءبىر ءسۇيسىندىردى.

مۇندا اباي حاكىم بەينە ءبىر ءتىرىلىپ كەلگەندەي، ءوزى ساعىنىپ قالعان وقىرماندارمەن تىلدەسۋگە اسىعىپ، كوپشىلىكتىڭ كوكەيىندە جۇرگەن جايتتاردى مۇقيات تىڭداعىسى كەلگەن نيەتپەن، ۇيىنە شاقىرعانداي اسەر قالدىرادى. شىنايىلىعى سونشالىقتى، جانىنا بارىپ، «اسسالاۋماعالايكۋم، اباي اعا!»، - دەپ سالەم بەرگىڭ كەلەتىندەي...

- مەن بۇل وبرازدى جاساۋعا ءتورت اي جۇمسادىم. شەبەرحانامدا تالاي ۇيقىسىز تۇندەر وتكىزدىم. الايدا ناتيجەسى وعان تۇرارلىق دەگەن ويدامىن. گيەپررەالديزمدە بارلىق دۇنيەلەردى وتە ءدال بەرىلۋى كەرەك. ۇلى اقىننىڭ بىزگە تەك ەكى عانا سۋرەتى جەتتى. ونىڭ ءبىرى - اقىننىڭ ءوز بالالارىمەن بىرگە تۇسكەن سۋرەتى ەكەن. مەن وسىنى نەگىزگە الدىم. بۇل جۇمىسىمدى مەن ابايدىڭ 175 جىلدىق مەرەكەسىنە ارناعان ەدىم، - دەپ اعىنان جارىلادى جاس تالانت.

مىنە، جاڭا وبرازداردى ىزدەۋدە نەگە وسى ايدوس سەكىلدى تالانتتى جاستاردىڭ شەبەرلىگىن شىڭداۋعا كومەكتەسپەسكە؟  وسىنداي جاستاردىڭ اراسىنان عانا جاڭاشا ويلاي بىلەتىن، ۇلى اباي سەكىلدى تۇلعالارعا وزگەشە ءمان-ماعىنا بەرەتىندەرىنىڭ كەزدەسەتىندىگى ءسوزسىز. سولارعا ارنايى تاپسىرما بەرىپ، شەبەرلىك سىنىنان وتكىزىپ، ونەر تارازىسىنا تارتساق، بىلايعى جۇرتقا ۇيالماي-اق كورسەتەتىندەي تۋىندىلاردىڭ دۇنيەگە كەلەرى انىق.

جايبەرگەن بولاتوۆ

Abai.kz

27 پىكىر