ماجىلىستە پالاتا توراعاسى نۇرلان نىعماتۋلين قازاقستانعا العاش رەت مەملەكەتتىك ساپارمەن كەلگەن قىرعىز رەسپۋبليكاسىنىڭ پرەزيدەنتى سادىر جاپاروۆپەن كەزدەستى.

نۇرلان نىعماتۋلين، ەڭ الدىمەن، سادىر جاپاروۆتى قىرعىز رەسپۋبليكاسىنىڭ پرەزيدەنتى بولۋىمەن قۇتتىقتاپ، قىرعىز ەلىنىڭ دامۋى مەن وركەندەۋىنە باعىتتالعان ساياسي جۇيەنى رەفورمالاۋعا قاتىستى الدا تۇرعان ماڭىزدى مىندەتتەرىن تابىستى ورىنداۋ ءۇشىن ساتتىلىك تىلەدى.

سونىمەن قاتار، ءماجىلىس توراعاسى قىرعىز پرەزيدەنتىنىڭ مەملەكەتتىك ساپارى قازاقستان مەن قىرعىزستان ەلدەرى تاۋەلسىزدىگىنىڭ 30 جىلدىعىندا ءوتىپ جاتقانىنا باسا نازار اۋداردى.

نۇرلان نىعماتۋلين باستى ماقسات - تاريحي بايلانىستى ساقتاپ، ودان ءارى نىعايتۋ ەكەنىن جەتكىزدى. سونداي-اق، بارلىق باعىتتا، سونىڭ ىشىندە پارلامەنتتىك ىنتىماقتاستىق ارقىلى باۋىرلاس ەكى ەلدىڭ دوستىعىن ودان ءارى تەرەڭدەتۋ ءۇشىن ءتيىستى جۇمىستاردى جالعاستىراتىنىن اتاپ ءوتتى.

كەزدەسۋدە قوس مەملەكەت اراسىندا ساياسي كەلىسپەۋشىلىكتەر جوق ەكەنىن جانە ەكىجاقتى قارىم-قاتىناستار جۇيەلى دامىپ كەلە جاتقانىن العا تارتقان پالاتا سپيكەرى بۇنىڭ ءبارى ەلباسى نۇرسۇلتان ءابىشۇلى نازارباەۆتىڭ ەڭبەگى ەكەنىن جانە قازاقستان رەسپۋبليكاسىنىڭ تۇڭعىش پرەزيدەنتى ءاردايىم قىرعىزستانمەن ءوزارا ءىس-قيمىلدىڭ ەرەكشە ماڭىزدىلىعىن اتاپ كورسەتەتىنىنە توقتالدى.

سونىمەن بىرگە، مەملەكەت باسشىسى قاسىم-جومارت كەمەلۇلى توقاەۆ قىرعىزستانمەن ىنتىماقتاستىققا ۇلكەن ءمان بەرەتىنىن ايتقان ءماجىلىس توراعاسى قازاقستان مەن قىرعىزستاننىڭ قارىم-قاتىناسى جاڭا دەيگەيگە كوتەرىلەتىنىنە نازار اۋداردى.

كەزدەسۋ بارىسىندا نۇرلان نىعماتۋلين مارتەبەلى مەيمانعا VII شاقىرىلىمداعى پارلامەنت ءماجىلىسىنىڭ قىزمەتىمەن تانىستىرىپ، پارلامەنتارالىق ىنتىماقتاستىقتى نىعايتۋ مەن كەڭەيتۋدىڭ ماڭىزدىلىعى تۋرالى ايتىپ قالىپتاسقان ءداستۇرلى ارىپتەستىك قارىم-قاتىناستاردى جالعاستىراتىنىنا توقتالدى.

ءوز كەزەگىندە مارتەبەلى مەيمان ءبىزدىڭ ەلىمىزدىڭ جاڭا پارلامەنتتىك قۇرامىنىڭ جۇمىسىنا ساتتىلىك تىلەدى. سونداي-اق، قازاقستاننىڭ تۇڭعىش پرەزيدەنتى نۇرسۇلتان ءابىشۇلى نازارباەۆتىڭ ەكى ەل اراسىنداعى ىنتىماقتاستىقتى نىعايتۋ جولىنداعى تاريحي ءرولىن جوعارى باعالايتىنىن جانە ءوزارا تۋىستىق جانە دوستىق قۇندىقتاردى ودان ءارى وركەندەتۋگە ۇلەس قوساتىنىن ايتتى.

Abai.kz