دۇيسەنبى, 19 ءساۋىر 2021
2735 0 پىكىر 2 ناۋرىز, 2021 ساعات 13:36

استانادا كرانشىلار جالاقى ماسەلەسىنە شاعىمداندى

1 ناۋرىزدا نۇر-سۇلتاندا جۇزدەن استام كرانشى جالاقى ءوسىرۋ تۋرالى تالابىنىڭ ورىندالماعانىن ايتىپ، جۇمىسقا شىعۋدان باس تارتتى. بۇل تۋرالى Centralasian مالىمدەدى.

بۇل اقپاراتتى حابارلاعان جەرگىلىكتى بەلسەندى ساۋلە سەيداحمەتوۆانىڭ اقپاراتىنا قاراعاندا، قالاداعى شامامەن 300-گە تارتا كرانشىنىڭ جارتىسىنان استامى جۇمىس باسىندا بولسا دا، جۇمىس ىستەۋدەن باس تارتقان.

نارازىلاردىڭ ءبىرى جانبوتا ۇسەنوۆا ەسىمدى جۇمىسشى ازاتتىققا جۇمىس بەرۋشى كومپانيانىڭ وسىعان دەيىن جىبەرىلگەن تالاپتارعا نە ء"يا", نە "جوق" دەپ جاۋاپ بەرمەگەنىن ايتتى. ونىڭ سوزىنە قاراعاندا، قازىر وزىمەن بىرگە ءبىر نىساندا بىرگە جۇمىس ىستەيتىن 5 كرانشى جالاقىنى 500 مىڭعا دەيىن ءوسىرۋدى تالاپ ەتىپ وتىر. "قازىر بىزگە ساعاتىنا 1250 تەڭگەدەن تولەيدى، ءبىز ونى 2 مىڭعا دەيىن ءوسىرسىن دەپ وتىرمىز. بۇعان قوسا، ەڭبەك جاعدايىن جاقسارتۋدى تالاپ ەتەمىز" دەيدى ول.

- ءبىزدىڭ جۇمىسىمىز قاۋىپ-قاتەرگە تولى. مىسالى، ءاربىر كراننىڭ جەكە جۋرنالى بار. ءبىزدىڭ تەك ءبىر كرانعا عانا شىعۋعا قۇقىعىمىز بار. سول تەحنيكاعا، سول كراننىڭ استىندا جۇرگەن ادامدارعا عانا جاۋاپ بەرەمىز. ءبىر كرانعا قول قوياسىڭ. بىراق كرانشىلارعا "سەنىڭ جۇمىسىڭ از، انا كرانعا شىق" دەپ ءجيى ايتادى. بىراق ول كراننىڭ جۋرنالىنا قول قويعىزبايدى. ەگەر قول قويعىزسا، وعان جەكە تولەۋى كەرەك. وسىلايشا كرانشىلاردى ۇنەمدەيدى. ودان كەيىن عيمارات وسكەن سايىن كراندار دا وسە بەرەدى. تايعاناق. تۇندە تەحنيكا قاۋىپسىزدىگى مۇلدە جوق. ەشكىم جاۋاپ بەرمەيدى. تۇندە بىردەڭە بولسا، جۇمىسشىلاردى قيناپ شىعارىپ جۇرگەن پروراب "مەن ايتقان جوقپىن، ءوزى شىققان عوي" دەي سالادى، ءبىتتى، - دەيدى جانبوتا ۇسەنوۆا.

27 اقپاندا ءارتۇرلى قۇرىلىس كومپانيالارىندا جۇمىس ىستەيتىن مۇنارالى كران وپەراتورلارى ەڭبەك جاعدايىن جاقسارتۋدى تالاپ ەتكەن ارىزدارىن ەڭبەك مينيسترلىگىنە تاپسىرعان.

ارىز يەلەرى بيلىكتەن:

- ەڭبەكاقىنى 800 مىڭ تەڭگەگە دەيىن ۇلعايتۋدى;

- جۇمىس بەرۋشى مەن جۇمىسشى اراسىندا ەڭبەك كەلىسىم-شارتى جاسالۋىن;

- وندىرىستە ەڭبەك قاۋىپسىزدىگىن، كران وپەراتورلارىن قاۋىپسىزدىك قۇرالدارى جانە جۇمىس كيىمىمەن قامتاماسىز ەتۋدى;

- كۇنىنە 8 ساعاتتان، اپتاسىنا 40 ساعاتتان اسپايتىن جۇمىس ءتارتىبىن بەلگىلەۋدى جانە ارتىق جۇمىس ىستەگەنى ءۇشىن ەكى ەسە ەڭبەكاقى تولەۋدى;

- كراندا جۇمىس ىستەۋ قاۋىپتى سانالاتىنداقتان ەڭبەكاقىعا 1,5 كوەففيتسيەنت قوسۋدى;

- زاڭعا ەرلەر 60 جاستان، ايەلدەر 55 جاستان زەينەت دەمالىسىنا شىعاتىنداي ەتىپ وزگەرىس ەنگىزۋدى تالاپ ەتكەن.

بىراق نارازىلار بيلىكتىڭ جاۋابىنا قاناعاتتانباعان.

نۇر-سۇلتاندا 12 اقپاننان بەرى ءارتۇرلى كومپانيادا كراندا جۇمىس ىستەيتىن ازاماتتار ەڭبەك جاعدايىنا بايلانىستى نارازىلىعىن ءبىلدىرىپ ءجۇر. ولاردىڭ تالابى جازىلعان ۆيدەولار الەۋمەتتىك جەلىلەردە جاريالاندى. كەيىن بىرنەشە ادامنىڭ جۇمىستان شىعارىلعانى تۋرالى اقپارات تاراعان.

ساۋلە سەيداحمەتوۆا مەن جانبوتا ۇسەنوۆانىڭ ايتۋىنشا، نۇر-سۇلتاندا كەيبىر كومپانيالار جۇمىسشىلاردىڭ جالاقىسىن ورىنداعاننان كەيىن ونداعى كرانشىلار جۇمىسىن جالعاستىرىپ جاتىر.

نۇر-سۇلتانداعى كران وپەراتورلارىنىڭ تالابىن اقتاۋ، اقتوبە، شىمكەنت پەن تۇركىستان قالالارىنداعى قۇرىلىس كومپانيالارىندا ىستەيتىن ارىپتەستەرى قولداعان.

جىل باستالعالى بەرى قازاقستاننىڭ ءار ايماعىندا ەڭبەك جاعدايىن جاقسارتۋدى، جالاقىنى كوبەيتۋدى تالاپ ەتكەن جۇمىسشىلار نارازىلىعى جيىلەدى.

Abai.kz

0 پىكىر