جەكسەنبى, 5 جەلتوقسان 2021
ساياسات 19778 24 پىكىر 23 اقپان, 2021 ساعات 09:50

مۇحتار تىلەۋبەردى ەلباسى جولىمەن جۇرەدى

قازاقستاننىڭ سىرتقى ىستەر ءمينيسترى ءھام پرەمەر-ءمينيستردىڭ ورىنباسارى مۇحتار تىلەۋبەردى بۇۇ ادام قۇقىقتارى جونىندەگى كەڭەستىڭ 46-شى سەسسياسىنا ونلاين رەجيمدە قاتىسقان. بۇل تۋرالى قر ءسىم رەسمي سايتى حابارلادى.

وتكەندەگى ەۋروپارلامەنتتىڭ قازاقستانداعى ادام قۇقىقتارى ماسەلەسىنە قاتىستى سىنىنان كەيىن وتكەن بۇل جيىندا مينيستر ءھام ۆيتسە-پرەمەر مۇحتار تىلەۋبەردى ەلىمىزدە ادام قۇقىقتارى ساقتالىپ جاتقانىن ايتىپ، ءسوز سويلەپتى.

«ءىس-شاراعا بۇۇ-نىڭ ادام قۇقىقتارى جونىندەگى جوعارعى كوميسسارى ميشەل باچەلەت، 150-دەن استام ەلدىڭ ۇكىمەت باسشىلارى مەن مينيسترلەرى، سونداي-اق حالىقارالىق ۇيىمداردىڭ وكىلدەرى قاتىستى.

م.تىلەۋبەردى ءوز سوزىندە تاۋەلسىزدىگىمىزدىڭ 30 جىلدىعىندا ەل دامۋىنىڭ نەگىزگى باسىمدىقتارىنىڭ ءبىرى تۇڭعىش پرەزيدەنت - ەلباسى نۇرسۇلتان نازارباەۆتىڭ ادام قۇقىقتارى سالاسىنداعى ۇلتتىق جانە حالىقارالىق ستاندارتتاردى ساقتاۋعا ارنالعان باعىتى بولىپ قالا بەرەتىنىن اتاپ ءوتتى»، - دەلىنگەن مينيسترلىك اقپاراتىندا.

سىرتقى ساياسي ۆەدومستۆوسىنىڭ باسشىسى ءوز سوزىندە پرەزيدەنت توقاەۆتىڭ «حالىق ۇنىنە قۇلاق اساتىن مەملەكەت» تۇجىرىمداماسى مەن ادام قۇقىقتارىن قورعاۋ، دەموكراتيالىق قوعام قۇرۋ باستامالارى جانە ساياسي رەفورمالار پاكەتى تۋرالى ايتقان.

«اتاپ ايتقاندا، بەيبىت جيىندار تۋرالى جاڭا زاڭنىڭ قابىلدانۋى، جالا جابۋدى قىلمىستىق سيپاتتان ارىلتۋ، قىلمىستىق كودەكستىڭ جەكەلەگەن باپتارىن ىزگىلەندىرۋ، ايەلدەر مەن جاستار ءۇشىن 30% سايلاۋ كۆوتاسىن ەنگىزۋ، سونداي-اق قازاقستاننىڭ ءولىم جازاسىنىڭ كۇشىن جويۋ تۋرالى ەكىنشى فاكۋلتاتيۆتىك حاتتاماسىنا قوسىلۋى وزەكتى جەتىستىكتەر قاتارىندا اتاپ ءوتىلدى.

م. تىلەۋبەردى قازاقستاننىڭ بەيبىتشىلىكتى، كەلىسىمدى نىعايتۋ جانە ادامنىڭ ىرگەلى قۇقىقتارىن قامتاماسىز ەتۋ بويىنشا ۇجىمدىق جاھاندىق كۇش-جىگەرگە بارىنشا ۇلەس قوسۋعا بەيىلدىلىگىن راستادى. وسىعان بايلانىستى ول قازاقستاننىڭ 2022-2024 جىلدارعا ارنالعان بۇۇ اقك مۇشەلىگىنە ءوتىنىمىن جاريالاپ، ونىڭ حالىقارالىق قوعامداستىقتىڭ تاراپىنان قولداۋىنا ءۇمىت ءبىلدىردى»، - دەلىنگەن مينيسترلىك اقپاراتىندا.

ايتا كەتەيىك، 12 اقپان كۇنى باق-تا ەۋروپارلامەنت دەپۋتاتتارىنىڭ قازاقستانداعى ساياسي جاعدايدى قاتاڭ سىناپ، سانكتسيا ەنگىزۋدى ۇسىنعانى حابارلانعان بولاتىن. ولار قازاقستاندا تاۋەلسىز ۇيىمدار مەن ساياسي بەلسەندىلەرگە قىسىم كۇشەيگەنىن ايتىپ، «قازاقستانداعى ادام قۇقىقتارى ماسەلەسىنە قاتىستى» ارنايى رەزوليۋتسيا قابىلداعان.

ال 13 اقپاندا قازاقستاننىڭ سىرتقى ىستەر مينيسترلىگى ەۋروپارلامەنت دەپۋتاتتارىنىڭ بۇل ايتقاندارىنا جاۋاپ بەرىپ، سىننىڭ ورىنسىز ەكەنىن ايتتى.

«وندا قازاقستان رەسپۋبليكاسىنداعى ادام قۇقىقتارىنا قاتىستى احۋالعا بىرجاقتى، وبەكتيۆتى ەمەس سىن-پىكىرلەر بار دەپ ەسەپتەيمىز. ءبىزدىڭ پىكىرىمىزشە، قاراردىڭ ءماتىنى ەلىمىزدەگى ىستەردىڭ ناقتى جاعدايىن بۇرمالايدى جانە بۇل دەسترۋكتيۆ توپتاردىڭ جالعان اقپاراتىن ازىق قىلعان بوتەن نيەتتى ساياساتكەرلەردىڭ باستاماسىمەن جاسالعان»، - دەگەن ەدى ءسىم-ءنىڭ رەسمي وكىلى ايبەك سمادياروۆ.

Abai.kz

24 پىكىر