دەنساۋلىق ساقتاۋ ۆيتسە-ءمينيسترى – قازاقستاننىڭ باس مەملەكەتتىك سانيتار دارىگەرى ەرلان قياسوۆ پەن دەنساۋلىق ساقتاۋ ۆيتسە-ءمينيسترى اجار عينيات كوروناۆيرۋسقا قارسى رەسەيلىك ۆاكتسينانىڭ ەكىنشى دوزاسىن الدى.

ولار ۆاكتسينانىڭ العاشقى دوزاسىن 1 اقپان كۇنى العان بولاتىن.  ارادا ءۇش اپتا وتكەندە جالپى نۇسقاۋلىققا ساي ەكىنشى رەت ەكپە ەگىلۋ ءتيىس ەدى.

رەسەيلىك «سپۋتنيك V» ۆاكتسيناسىنىڭ ەكىنشى دوزاسىن سالدىرۋ ءساتى 24 kz ارناسىنىڭ تىكەلەي ەفيرىنەن كورسەتىلدى. بۇل پروتسەس نۇر-سۇلتان قالاسىنداعى №6 قالالىق ەمحانادا جۇزەگە اسىرىلعان.

ايتا كەتەيىك، دەنساۋلىق ساقتاۋ مينيسترلىگى جىل اياعىنا دەيىن 6 ميلليون ادامعا ەكپە سالۋدى جوسپارلاپ وتىر. ءبىرىنشى كەزەكتە اۋرۋحانا قىزمەتكەرلەرى، ەكىنشى كەزەكتە جالپى ءبىلىم بەرەتىن مەكتەپتەر مەن جوعارى وقۋ ورىندارى، مەديتسينا مەكەمەلەرى قامتىلادى. ولارعا ەكپە ناۋرىز ايىنان سالىنا باستايدى. ءساۋىر ايىنان مەكتەپ-ينتەرنات، مەكتەپكە دەيىنگى ءبىلىم بەرۋ ۇيىمدارى، سوزىلمالى اۋرۋى بار ستۋدەنتتەردىڭ كەزەگى باستالادى.

وتكەن اپتاداعى اقپارات بويىنشا ەلىمىزگە 22 مىڭ ۆاكتسينا جەتكىزىلىپ، 17 مىڭ ادامعا ەكپە سالىنعان.

Abai.kz