جۇما, 5 ناۋرىز 2021
4987 13 پىكىر 26 قاڭتار, 2021 ساعات 14:05

جەر كودەكسىنە تۇزەتۋلەر ەنگىزىلەدى

بۇگىن مەملەكەت باسشىسى قاسىم-جومارت توقاەۆ ۇكىمەتتىڭ كەڭەيتىلگەن وتىرىسىندا جەر كودەكسىنە ەنگىزىلگەن ءموراتوريدىڭ مەرزىمى اياقتالاتىنىن ايتتى. 

پرەزيدەنت وسىعان بايلانىستى جەر ماسەلەسى جونىندە كوميسسيا جۇمىسىن قايتا قولعا الۋ كەرەكتىگىنە توقتالدى. سونىمەن قاتار، 2021 جىلدىڭ قاراشا ايىنا دەيىن ۇكىمەت جەر كودەكسىنە تۇزەتۋلەر ەنگىزۋى ءتيىس.

«بيىل جەر كودەكسىنىڭ جەكەلەگەن نورمالارىنا جاريالانعان ءموراتوريدىڭ مەرزىمى اياقتالادى. وسىعان وراي، جەر جونىندەگى كوميسسيانىڭ جۇمىسىن قايتا جانداندىرۋ قاجەت. ۇسىنىستار بايىپپەن تالقىلانىپ، تۇبەگەيلى شەشىم قابىلدانۋعا ءتيىس.

ۇكىمەتكە بيىلعى قاراشا ايىنا دەيىن جەر كودەكسىنە تۇزەتۋلەر ەنگىزىلۋىن قامتاماسىز ەتۋدى تاپسىرامىن»،- دەدى مەملەكەت باسشىسى.

سوندا-اق، پرەزيدەنت توقاەۆ جايىلىم جەرلەردىڭ تاپشى ەكەنىن ايتىپ، وعان جەرگىلىكتى اكىمدىكتەردىڭ سالعىرتتىعى سەبەپ بولعانىن اتاپ ءوتتى.

«جايىلىمدار ماسەلەسىنە ارنايى توقتالعىم كەلەدى. بۇل جەرلەر، ەڭ الدىمەن، اۋىل تۇرعىندارىنا قولجەتىمدى بولۋى كەرەك. جەرگىلىكتى اكىمدىكتەر جۇمىستى دۇرىس ۇيىمداستىرماي وتىر. سونىڭ سالدارىنان، اۋىل تۇرعىندارى مال جاياتىن جايىلىم تاپپاي قينالۋدا»،- دەدى ول.

پرەزيدەنتتىڭ ايتۋىنشا، بوس جاتقان جەرلەردىڭ 36 پايىزىندا عانا مال جايىلادى، ال، قالعان جەردىڭ بارلىعى شارۋا قوجالىقتارىنىڭ مەنشىگىندە.

«جايىلىمداردىڭ 99 پايىزى شارۋا قوجالىقتارىنىڭ يەلىگىندە. الايدا، ونىڭ 36 پايىزىندا عانا مال جايىلادى. قالعان 46 ميلليون گەكتار جايىلىمدىق جەر بوس جاتىر. ۇكىمەتكە باس پروكۋراتۋرامەن بىرلەسىپ، بيىلعى جىلدىڭ سوڭىنا دەيىن وسىنداي جايىلىمداردى قايتارىپ الۋدى تاپسىرامىن»،- دەدى توقاەۆ.

ودان بولەك پرەزيدەنت اگروونەركاسىپ كەشەنى تۋرالى ۇلتتىق جوبا ازىرلەنىپ جاتقانىن ايتتى. بۇل ماسەلە الداعى بەس جىلدا شەشىلەدى دەپ جوسپارلانعان.

«اۋىل حالقى ەكونوميكا، وڭىرلىك دامۋ جانە تەڭ مۇمكىندىك بەرۋ تۇرعىسىنان جاڭا ءارى سەرپىندى شەشىمدەر كۇتىپ وتىر. مەنىڭ تاپسىرماممەن اگروونەركاسىپ كەشەنى تۋرالى ۇلتتىق جوبا ازىرلەنىپ جاتىر. الداعى بەس جىلدا بۇل ماسەلەنى شەشۋگە ءتيىسپىز»،- دەدى ول.

Abai.kz

13 پىكىر