سەيسەنبى, 9 ناۋرىز 2021
1887 4 پىكىر 25 قاڭتار, 2021 ساعات 16:19

اقتوبەلىك مۇنايشىلار پرەزيدەنتكە ۇندەۋ جولدادى

بۇگىن اقتوبە وبلىسى تەمىر اۋدانى كەڭقياق اۋىلى ىرگەسىندە ورنالاسقان «كمك مۇناي» مەكەمەسىنىڭ جۇمىسشىلارى نارازىلىققا شىقتى. مۇنايشىلار پرەزيدەنتتەن كومپانياعا تەكسەرىس جۇرگىزۋدى تالاپ ەتتى. جۇمىسشىلار جالاقىنى 100 پايىزعا ءوسىرۋدى سۇراپ، جۇمىستى توقتاتتى. 

«كمك مۇناي» مەكەمەسىنىڭ الدىنا جينالعان جۇزگە جۋىق مۇنايشى پرەزيدەنتكە ۆيدەو ۇندەۋ جولدادى.

«قازاقستان رەسپۋبليكاسىنىڭ پرەزيدەنتى، قۇرمەتتى قاسىم-جومارت كەمەلۇلى! ءبىز اقتوبە وبلىسى تەمىر اۋدانىندا ورنالاسقان «كمك مۇناي» كومپانياسىنىڭ قاتارداعى قاراپايىم جۇمىسشىلارىمىز. ءبىز سىزگە بۇل ۆيدەو ۇندەۋدى جولداۋ سەبەبىمىز – ادال ەڭبەكاقىمىزدى 100 پايىزعا ءوسىرىپ بەرۋىڭىزدى سۇرايمىز. 12 قاڭتاردا  «كمك مۇناي» باسشىلارىنا، وبلىس باسشىلارىنا جالاقىمىزدى كوتەرۋ جايلى حات جولدادىق. ءبىزدىڭ تالابىمىزدى ورىنداعىلارى كەلمەي وتىر. سەبەپ جوعىن العا تارتادى.

سەبەپ بار. ءبىزدىڭ كومپانيا اقتوبە وبلىسىنداعى ەڭ وزىق، بەدەلدى كومپانيالاردىڭ ءبىرى. مۇناي وندىرۋدەن جىل سايىنعا جوسپاردى اسىرا ورىنداپ كەلەمىز. ال جۇمىسشىلاردىڭ جالاقىسى باسقا مۇناي كومپانيالارىمەن سالىستىرعاندا وتە از. پاندەميا ۋاقىتىندا ازىق-تۇلىك، كوممۋنالدىق قىزمەتتەر بىرنەشە ەسە قىمباتتاپ كەتتى. ايلىعىمىز نەسيەمىزدى جابۋعا نەمەسە ازىق-تۇلىك الۋدان ارتىلماي وتىر. وزىڭىز بىلەسىز، اقتوبە وبلىسىنىڭ مۇنايشىلارى ەڭ تومەنگى جالاقى الادى. ءبىزدىڭ جالاقىمىز مۇعالىمدەر، دارىگەرلەر مەن زەينەركەرلەردەن دە تومەن. وسى ماسەلەنى شەشىپ بەرۋىڭىزدى سۇرايمىز.

ءبىز 25 قاڭتاردان باستاپ جۇمىسقا شىقپاۋعا بەل بايلادىق. ءبىزدىڭ تالابىمىز بارلىق زاڭ اياسىندا. قۇرمەتتى قازاقستان رەسپۋبليكاسىنىڭ پرەزيدەنتى قاسىم-جومارت كەمەلۇلى، ءبىزدىڭ ۇجىمدىق ماسەلەنى شەشىپ بەرۋدى سۇرايمىز، ءبىزدىڭ كومپانياعا تەكسەرىس جىبەرۋىڭىزدى تالاپ ەتەمىز»، -دەيدى مۇنايشىلار ۇندەۋىندە.

Arasha.kz سايتىنىڭ حابارلاۋىنشا، مۇنايشىلار مەكەمە باسشىلارى مەن جەرگىلىكتى بيلىكتىڭ قۇر ۋادە بەرىپ وتىرعاندارىن ايتادى. جۇمىسشى قۇقىن قورعاۋدى سۇراعان  جۇزدەگەن مۇنايشىمەن كەزدەسۋگە وبلىس ورتالىعىنان ءبىر توپ شەنەۋنىك اتتاندى. ولاردىڭ قاتارىندا وبلىس اكىمىنىڭ ورىنباسارى مەن ەڭبەك ينسپەكتسياسىنىڭ باسشىسى بار.

وبلىس اكىمدىگىنىڭ مالىمەتىنشە،  «كمك مۇناي» جۇمىسشىلارىنىڭ ۇجىمدىق ۇندەۋىنە قاتىستى كوميسسيا قۇرىلدى.

كوميسسيا قۇرامىندا ەڭبەك ينسپەكتسياسى، يندۋستريالىق-يننوۆاتسيالىق​ ​ دامۋ​ باسقارمالارىنىڭ​ باسشىلارى، تەمىر اۋدانى (كەن ورنى تەمىر اۋدانىندا ورنالاسقان) اكىمدىگىنىڭ وكىلدەرى مەن اۋدان پروكۋرورلارى​ بار.

«قازىرگى تاڭدا «كمك مۇناي» اق جۇمىسشىلارىمەن ۇجىمدىق ارىزدا كورسەتىلگەن تالاپتاردى ءتۇسىندىرۋ بويىنشا كەزدەسۋ وتۋدە. كەزدەسۋدىڭ ناتيجەسى قوسىمشا حابارلاناتىن بولادى»،- دەپ حابارلايدى وبلىس اكىمدىگى.

Abai.kz

4 پىكىر