بەيسەنبى, 24 ماۋسىم 2021
ساڭلاق 4020 1 پىكىر 25 قاڭتار, 2021 ساعات 15:55

ەرماحان يبرايموۆتىڭ ۇستىنەن پوليتسياعا ارىز ءتۇستى

25 قاڭتاردا بەلسەندى ايگەرىم تىلەۋجان قۇقىق قورعاۋشى ەرلان قاليەۆپەن بىرگە الماتى قالالىق پوليتسيا دەپارتامەنتىنە بارىپ، بوكستان سيندەي وليمپياداسىنىڭ چەمپيونى ەرماحان يبرايموۆتىڭ ۇستىنەن ارىز ءتۇسىردى.

وعان 10 قاڭتاردا - ورتالىق الاڭدا پوليتسيا ءادىل سايلاۋدى تالاپ ەتكەن بەلسەندىلەردى قورشاپ تۇرعان كەزدە سپورتشىنىڭ "ۇساق بۇزاقىلىق جاساپ، نارازىلاردىڭ پلاكاتىن جىرتۋى" سەبەپ بولعان.

- ونىڭ ارەكەتى زاڭسىز. اكىمشىلىك كودەكستە ەكى باپ بار. ءبىرى - 73-1-2-باپ ("دەنساۋلىققا جەڭىل زيان كەلتىرۋ جانە ۇرىپ-سوعۋ"). اۋىر سالماقتاعى بوكسشىنىڭ قولى باسقالارعا جۇدىرىعىن سەرمەيمىن دەگەن كەزدە بەلسەندىگە (ايگەرىم تىلەۋجان) ءتيىپ كەتتى. ەكىنشىسى - 434-باپ ("ۇساق بۇزاقىلىق"). پلاكات جىرتىپ، بەلسەندىلەرگە ءتيىسىپ، بالاعاتتاعانى ءۇشىن جازالاۋىن تالاپ ەتەمىز، - دەدى قۇقىق قورعاۋشى ەرلان قاليەۆ.

ايگەرىم تىلەۋجاننىڭ سوزىنشە، 10 قاڭتاردا دەموكراتيالىق پارتيا قۇرعىسى كەلەتىن باستاما توپ وكىلدەرى پوليتسيا قورشاۋىندا قالعان كەزدە ول توپ مۇشەلەرى مەن سپورتشى اراسىندا توبەلەس شىعىپ كەتپەسىن دەپ ورتادا تۇرعان. ەرماحان يبرايموۆ اشۋلانىپ "بەلسەندىلەردى ۇرماقشى بولعان كەزدە" قولى بەتىنە ءتيىپ كەتىپ، اۋىرعان.

- ول ەشكىم وتە الماعان قورشاۋدان وپ-وڭاي ءوتىپ، بىزبەن سويلەستى. ونىڭ كەلىپ بەلسەندىلەردى بالاعاتتاپ، پلاكاتتارىن جىرتۋعا پوليتسيانىڭ ءوزى جول اشىپ بەرىپ وتىر. مۇنداي ارەكەت جازاسىز قالماسىن دەپ شاعىم ءتۇسىرىپ وتىرمىز، - دەدى ايگەرىم تىلەۋجان.

الماتى قالالىق پوليتسيا دەپارتامەنتى بەلسەندىنىڭ ارىزىن قابىلداپ، وزىنەن سۇراق-جاۋاپ الاتىنىن ايتتى. ال سپورتشىنىڭ ءوزى ارىزعا بايلانىستى تۇسىنىكتەمە بەرمەدى.

Abai.kz

1 پىكىر