سەنبى, 27 اقپان 2021
1568 0 پىكىر 21 قاڭتار, 2021 ساعات 12:05

قازاقستاندا جۇرگىزۋشى كۋالىگىن كورسەتۋ مىندەتتى بولمايدى

بۇگىن پارلامەنت سەناتىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جول ءجۇرىسى ماسەلەلەرى بويىنشا وزگەرىستەر مەن تولىقتىرۋ ەنگىزۋ تۋرالى» زاڭى ەكى وقىلىمدا قارالىپ، قابىلداندى.

«زاڭ جوباسىندا قازاقستان رەسپۋبليكاسىندا بەرىلگەن جۇرگىزۋشى كۋالىگى مەن كولىك قۇرالىن تىركەۋ تۋرالى كۋالىكتى وزىمەن بىرگە الىپ ءجۇرۋدى تالاپ ەتەتىن نورمانى قولدانىستاعى زاڭنامادان الىپ تاستاۋ كوزدەلىپ وتىر. ياعني اۆتوكولىك يەسىن پوليتسيا توقتاتقان كەزدە، ول جەكە كۋالىگىن ۇسىنىپ، سول جەكە كۋالىكپەن پوليتسيا قىزمەتكەرى پلانشەت ارقىلى ەلەكتروندىق بازادا ونىڭ قاجەتتى قۇجاتتارى بويىنشا تەكسەرۋ جۇرگىزە الادى»، - دەدى سەنات دەپۋتاتى نۇرلان بەكنازاروۆ.

سونىمەن قاتار، اكىمشىلىك قۇقىق بۇزۋشىلىق تۋرالى كودەكستەن، قازاقستان رەسپۋبليكاسىندا بەرىلگەن جۇرگىزۋشى كۋالىگى مەن كولىك قۇرالىن تىركەۋ تۋرالى كۋالىكتى وزىمەن بىرگە الىپ ءجۇرۋدى تالاپ ەتەتىن نورمالاردىڭ ساقتالماعانى ءۇشىن اكىمشىلىك جاۋاپكەرشىلىكتى الىپ تاستاۋ ۇسىنىلدى.

«زاڭ جوباسىنداعى وزگەرىستەر مەن تولىقتىرۋلار شەتەلدىك جۇرگىزۋشىلەر مەن شەتەلدىك كولىك قۇرالدارىنا قولدانىلمايدى، ياعني ولار وزىمەن بىرگە بارلىق قاجەتتى قۇجاتتاردى الىپ جۇرۋگە مىندەتتى»، - دەپ ناقتىلادى سەناتور.

ەكى وقىلىمدا بولعان تالقىلاۋدان كەيىن دەپۋتاتتار زاڭدى قابىلدادى.

«ەندى كولىك جۇرگىزگەندە جۇرگىزۋشى كۋالىگىن جانە كولىكتىڭ تەحنيكالىق پاسپورتىن بىرگە الىپ ءجۇرۋ مىندەتى الىنىپ تاستالادى. بۇل تسيفرلاندىرۋ جۇمىستارىنىڭ ناقتى ناتيجەسى ەكەنى ءسوزسىز»، – دەدى سەنات توراعاسى م. اشىمباەۆ.

Abai.kz

0 پىكىر