2020 جىلدىڭ قورىتىندىسى بويىنشا 13 مىڭ ادام تاريحي وتانىنا ورالىپ، قانداس مارتەبەسىن الدى.بۇل تۋرالى قر ەڭبەك جانە حالىقتى الەۋمەتتىك قورعاۋ مينيسترلىگى مالىمدەدى.

1991 جىلدان باستاپ رەسپۋبليكاعا بارلىعى 1 ملن. 70,3 مىڭ ەتنيكالىق قازاق كەلگەن.

وتكەن جىلى قازاقستانعا كەلگەن قانداستاردىڭ جارتىسىنان كوبى (53,1%) قحر-دان، 31,3% – وزبەكستاننان، 8,7% – تۇركىمەنستاننان، 3,7% – موڭعوليادان جانە 3,3% – باسقا ەلدەردەن كەلگەن.

كەلگەن ەتنيكالىق قازاقتار نەگىزىنەن الماتى (51,3%), ماڭعىستاۋ (13,3%) جانە تۇركىستان (5,6%) وبلىستارىندا، سونداي-اق نۇر-Cۇلتان (4,1%) جانە شىمكەنت (3,9%) قالالارىندا قونىستاندى.

2020 جىلدىڭ قورىتىندىسى بويىنشا ەڭبەككە قابىلەتتى جاستاعى قونىس اۋدارۋشىلار سانى 57,1%-دى، ەڭبەككە قابىلەتتى جاستان كىشى 31,9%-دى جانە زەينەتكەرلەر 11%-دى قۇرايدى.

ايتا كەتۋ كەرەك، ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017 – 2021 جىلدارعا ارنالعان «ەڭبەك» مەملەكەتتىك باعدارلاماسى (بۇدان ءارى – باعدارلاما) شەڭبەرىندە قانداستارعا جۇمىس كۇشى تاپشى وڭىرلەرگە ەرىكتى تۇردە قونىس اۋدارۋ ۇسىنىلادى.

2020 جىلى قانداستاردى قابىلداۋدىڭ بەكىتىلگەن وڭىرلىك كۆوتاسىنا سايكەس 1,4 مىڭنان استام ەتنيكالىق قازاق پەن ولاردىڭ وتباسى مۇشەلەرى قر ۇكىمەتى ايقىنداعان وڭىرلەرگە: اقمولا، اتىراۋ، باتىس قازاقستان، شىعىس قازاقستان، سولتۇستىك قازاقستان، قوستاناي، پاۆلودار جانە قاراعاندى وبلىستارىنا تۇراقتى تۇرۋ ءۇشىن كەلدى:

وڭىرلىك كۆوتاعا ەنگىزىلگەن قانداستارعا كوشۋگە (وتباسىنىڭ ءاربىر مۇشەسىنە 35 اەك-تەن) ءبىر رەتتىك جانە تۇرعىن ءۇيدى جالعا الۋعا جانە كوممۋنالدىق قىزمەتتەردى تولەۋگە (وتباسىنا 15-تەن 30 اەك-كە دەيىن) اي سايىنعى شىعىستاردى جابۋ بويىنشا 12 اي ىشىندە سۋبسيديالار بەرۋ تۇرىندە مەملەكەتتىك قولداۋ كورسەتىلەدى.

سونداي-اق، مەملەكەتتىك قولداۋ مىنالاردى:

– قونىس اۋدارۋعا جاردەمدەسەتىن جۇمىس بەرۋشىلەرگە سۋبسيديالار (كەمىندە ءۇش جىل مەرزىمگە تۇراقتى جۇمىسقا قابىلدانعان ءاربىر جۇمىسكەر ءۇشىن جانە كەمىندە بەس باعدارلاماعا قاتىسۋشى جۇمىسقا ورنالاسقان كەزدە 450 اەك مولشەرىندە سۋبسيديالار) بەرۋدى;

– قاجەت بولعان جاعدايدا تەحنيكالىق جانە كاسىپتىك ءبىلىم الۋعا جانە قىسقا مەرزىمدى كاسىپتىك كۋرستارعا (باعدارلامانىڭ ءبىرىنشى باعىتى شەڭبەرىندە) جىبەرۋدى;

– جاڭا بيزنەس-يدەيالاردى ىسكە اسىرۋعا 200 اەك دەيىنگى مولشەردە مەملەكەتتىك گرانتتار بەرۋدى قامتيدى.

Abai.kz