سەنبى, 27 اقپان 2021
1469 1 پىكىر 21 قاڭتار, 2021 ساعات 11:10

WhatsApp-تاعى «جاڭا ەرەجەلەر» تۋرالى اقپارات جالعان

قازاقستاندىقتار اراسىندا كەڭ تارالعان WhatsApp مەسسەندجەرىنىڭ «جاڭا ەرەجەلەرى» تۋرالى اقپارات جالعان. بۇل تۋرالى stopfake.kz مالىمدەدى.

2020 جىلعى جەلتوقساندا WhatsApp دەرەكتەردى وڭدەۋدەگى وزگەرىستەر تۋرالى مالىمدەمە جاسادى. بىراق وندا پايدالانۋشىلاردىڭ جەكە اقپاراتىن ءۇشىنشى تۇلعالارعا بەرۋ قاراستىرىلماعان.

دەگەنمەن، پايدالانۋشىلار جاڭا ەرەجەلەردى قابىلداۋعا ءتيىس ەكەندەرىنە الاڭداۋشىلىق تانىتتى. ويتكەنى، كەلىسپەگەندەر مەسسەندجەردە بۇعاتتالاتىن بولدى. 

بۇل نارازىلىق تۋدىرىپ، ادامدار قوسىمشانى پايدالانۋدان جاپپاي باس تارتتى. مۇنداي رەاكتسيانىڭ ناتيجەسىندە WhatsApp يەسى Facebook اكىمشىلىگى جاڭاشىلدىقتى ەنگىزۋدى كەيىنگە قالدىردى.

WhatsApp بلوگىنداعى اقپاراتقا سايكەس، 8 اقپاندا، بۇرىن حابارلانعانداي، كەلىسپەگەن پايدالانۋشىلاردىڭ اككاۋنتتارى بۇعاتتالمايدى.

«ءبىز WhatsApp-تاعى قۇپيالىلىق پەن قاۋىپسىز قاتىناس قاعيدالارى تۋرالى شىندىققا جاناسپايتىن قاۋەسەتتەردى جويۋ ءۇشىن بەلسەندى جۇمىس ىستەيمىز. سودان كەيىن كومپانيالار ءۇشىن جاڭا مۇمكىندىكتەر پايدا بولا باستاعان كەزدە پايدالانۋشىلارىمىزعا بىرتىندەپ 15 مامىرعا دەيىن جاڭا ساياساتپەن تانىسۋدى ۇسىنامىز»، – دەلىنگەن حابارلامادا.

قورىتا ايتقاندا، ءۇشىنشى تاراپتاردىڭ WhatsApp قولدانۋشىلارىنىڭ جەكە حات-حابارلارىنا زاڭدى تۇردە قولجەتكىزە الاتىندىعى تۋرالى حابارلامالار جالعان.

Abai.kz

1 پىكىر