الماتى قالاسىنىڭ جايلى ورتا باسقارماسىنىڭ باسشىسى ساپار نۇراشەۆ جانە Bi-Industrial كومپانياسىنىڭ ديرەكتورى كوروناۆيرۋس جۇققانداردى ەمدەيتىن مودۋلدىك ينفەكتسيالىق اۋرۋحانا قۇرىلىسىنا بولىنگەن 3,9 ميلليارد تەڭگە (9,3 ملن دوللار) قاراجاتتى جىمقىردى دەگەن كۇدىككە ءىلىندى.

18 قاڭتاردا سىبايلاس جەمقورلىققا قارسى ءىس-قيمىل قىزمەتى وسىلاي دەپ حابارلادى. ۆەدومستۆونىڭ ءباسپاسوز قىزمەتىنىڭ ايتۋىنشا، "سەنىپ تاپسىرىلعان مۇلىكتى يەمدەنۋ نەمەسە تالان-تاراجعا سالۋ" بابى بويىنشا ءىس قوزعالعان.

كەيبىر جەرگىلىكتى باق نۇراشەۆتىڭ ۇستالعانىن جازدى. بىراق الماتى اكىمدىگى اقپاراتتى جوققا شىعارىپ، نۇراشەۆتىڭ "جۇمىس ورنىندا ەمەس" ەكەنىن ايتتى.

"تەرگەۋگە دەيىنگى تەكسەرۋ امالدارىنا بايلانىستى قالا اكىمدىگى قاجەتتى اقپاراتتى تاراتىپ، تۇسىندىرۋگە دايىن" دەلىنگەن 18 قاڭتار كۇنگى اكىمدىك حابارلاماسىندا.

ساپار نۇراشەۆ الماتى قالاسىنىڭ جايلى ورتا باسقارماسىنىڭ جەتەكشىسى قىزمەتىنە 2020 جىلى ماۋسىم ايىندا تاعايىندالعان.

بىلتىر ءساۋىر ايىندا الماتىدا كوروناۆيرۋس جۇققاندارعا ارنالعان جاڭا ينفەكتسيالىق اۋرۋحانا اشىلعان. 18 كۇن ىشىندە دايىن بولعان مەديتسينالىق مەكەمەگە 5,5 ميلليارد تەڭگە (13,1 ملن دوللار) قاراجات جۇمسالدى دەپ ايتىلدى. قاراشا ايىندا گوسپيتال "دەزينفەكتسياعا بايلانىستى" رەزەرۆكە الىنعان. سول كەزدە مەكەمەنىڭ ايازعا توزبەيتىندىگى دە ايتىلدى. پاتسيەنتتەر مەن مەديتسينا قىزمەتكەرلەرى باسقا ورتالىققا كوشىرىلگەن.

Bi-Industrial - تۇرعىن ءۇي ەمەس عيماراتتاردى سالۋمەن اينالىساتىن كومپانيا. ول ىقپالدى كاسىپكەرلەردىڭ ءبىرى 48 جاستاعى ايدىن راقىمباەۆقا تيەسىلى BI Group قۇرامىنا كىرەدى. 2020 جىلى Forbes Kazakhstan ونىڭ بايلىعىن 514 ميلليون دوللارعا باعالاعان. كومپانيا سىبايلاس جەمقورلىققا قارسى ءىس-قيمىل اگەنتتىگىنىڭ تەرگەۋىنە بايلانىستى تۇسىنىكتەمە بەرمەدى.

Abai.kz