سارسەنبى, 3 ناۋرىز 2021
ەل ءىشى... 6307 28 پىكىر 10 قاڭتار, 2021 ساعات 13:56

ۇكىمەت وتستاۆكاسى. جاڭا ۇكىمەتتى كىم باسقارادى؟

بۇگىن مەملەكەت باسشىسى قاسىم-جومارت توقاەۆ ەلورداداعى وقۋشىلار سارايىندا ورنالاسقان №58 سايلاۋ ۋچاسكەسىندە داۋىس بەرگەننەن كەيىن باق وكىلدەرىنە سۇحبات بەردى.

ۇكىمەت وتستاۆكاعا كەتەدى

توقاەۆتىڭ ايتۋىنشا، سايلاۋ وتكەننەن كەيىن زاڭعا سايكەس ۇكىمەت وتستاۆكاعا كەتۋى ءتيىس.

«ۇكىمەتكە قاتىستى ايتار بولسام، ءبىزدىڭ زاڭنامامىزعا سايكەس، ول وتستاۆكاعا كەتۋى ءتيىس. سايلاۋ اياقتالعاننان كەيىن، تاياۋ ۋاقىتتا پرەمەر-ءمينيستردىڭ، سونىمەن قاتار ۇكىمەت مۇشەلەرىنىڭ كانديداتۋرالارى بويىنشا دەپۋتاتتاردىڭ جاڭا قۇرامىمەن، فراكتسيا باسشىلارىمەن كەڭەسۋ ءۇشىن پارلامەنتكە بارامىن. سىزدەر جەدەل اقپارات الاسىزدار دەپ ويلايمىن»، - دەدى قر پرەزيدەنتى.

پارلامەنتتە ءارتۇرلى پارتيالار بولۋى ءتيىس

ودان بولەك مەملەكەت باسشىسى پارلامەنتتە ءارتۇرلى پارتيالار بولۋى ءتيىس ەكەنىدىگىنە توقتالعان.

«ءار سايلاۋ - ازاماتتىق باتىلدىققا ماڭىزدى ەمتيحان. ءبىزدىڭ پارلامەنتتە ءار ءتۇرلى پارتيا بولادى دەپ قاتتى ۇمىتتەنەمىن. ەلىمىزدىڭ بولاشاعى، تاعدىرى تۋرالى پارلامەنتتە پىكىرتالاستار بولۋى كەرەك، بۇل ءبىرىنشى. ەكىنشىدەن، پارلامەنت وتە ساپالى زاڭدار قابىلداۋى كەرەك»،- دەدى ول.

ايتا كەتەيىك، بۇل ساياسي دوداعا 5 پارتيا قاتىسىپ جاتىر. ولار: ەكس-پرەزيدەنت ن.نازارباەۆ توراعالىق ەتەتىن «نۇر وتان» پارتياسى، ازات پەرۋاشەۆ باسشىلىق ەتەتىن  «اق جول» پارتياسى، ءالي بەكتاەۆتىڭ «اۋىل» پارتياسى، سەرىك سۇلتانعالي باسقاراتىن «ادال» پارتياسى  جانە ايقىن قوڭىروۆتىڭ «قازاقستان حالىق پارتياسى».

پرەزيدەنتتىڭ ايتۋىنشا بۇل سايلاۋدا بارلىق كانديداتقا تەڭدەي مۇمكىندىك بەرىلگەن.

نارازىلىققا شىققاندارعا ەشقانداي رەپرەسسيۆ شارالار قابىلدانبايدى

سونىمەن قاتار توقاەۆ سايلاۋعا قارسى نارازىلىق بىلدىرگەن ازاماتتار تۋرالى دا ويىن ايتتى.

«مەنىڭ ويىمشا، نارازى كوڭىل-كۇيلەر الەمنىڭ بارلىق ەلىندە بار. سوندىقتان پوليتسياعا كەلەتىن بولساق، ول زاڭعا سايكەس قاتاڭ ارەكەت ەتەدى. ءسىز ايتقانداي، نارازىلىق كوڭىل-كۇيىنە قاتىستى ەشقانداي رەپرەسسيۆ شارالار قابىلدانبايدى. تاعى دا قايتالايمىن: ءبىزدىڭ قۇقىق قورعاۋ ورگاندارىمىز ءبىزدىڭ زاڭناماعا سايكەس جۇمىس ىستەيدى», - دەدى پرەزيدەنت.

توقاەۆ 15 قاڭتاردا ۇندەۋ جاسايدى

ونىڭ ايتۋىنشا، ساياسي رەفورمالار ءالى دە جالعاسادى. سوندىقتان دا ول 15 قاڭتار كۇنى پارلامەنتتە ۇندەۋ جاساماق.

«رەفورمالار دايىندالىپ جاتىر. رەفورمالار توقتاپ قالماۋى ءتيىس. 15 قاڭتاردا پارلامەنتتە ءسوز سويلەپ، ونىڭ ىشىندە ءماجىلىستىڭ جاڭا قۇرامىنا دا ۇندەۋ جاسايمىن. ودان كەيىن ۇلتتىق قوعامدىق سەنىم كەڭەسىنىڭ وتىرىسى ءوتىپ، وندا رەفورمالار ماسەلەسىنە قاتىستى وتە بايىپتى اڭگىمە بولادى»، - دەدى مەملەكەت باسشىسى.

تاقىرىپقا تۇزدىق:

بۇگىن پرەزيدەنت توقاەۆ سايلاۋدان كەيىن ۇكىمەت وتستاۆكاعا كەتۋى كەرەكتىگىن ايتتى. اسىلىندە، زاڭ بويىنشا دا سولاي بولۋى كەرەك-ءتى.

سونىمەن، ۇكىمەتتىڭ قازىرگى قۇرامى قانداي؟

اسقان مامين، قر پرەمەر-ءمينيسترى،

ءاليحان سمايلوۆ، پرەمەر-ءمينيستردىڭ ءبىرىنشى ورىنباسارى،

ەرالى توعجانوۆ، پرەمەر-ءمينيستردىڭ ورىنباسارى،

رومان سكليار، پرەمەر-ءمينيستردىڭ ورىنباسارى،

عالىمجان قويشىباەۆ، پرەمەر-مينيستر كەڭسەسىنىڭ باسشىسى،

مۇحتار تىلەۋبەردى، قر سىرتقى ىستەر ءمينيسترى،

ەرلان تۇرعىمباەۆ، قر ىشكى ىستەر ءمينيسترى،

نۇرلان ەرمەكباەۆ، قر قورعانىس ءمينيسترى،

ايدا بالاەۆا، قر اقپارات جانە قوعامدىق دامۋ ءمينيسترى،

ساپارحان وماروۆ، قر اۋىل شارۋاشىلىق ءمينيسترى،

مارات بەكەتاەۆ، قر ادىلەت ءمينيسترى،

اسحات ايماعامبەتوۆ، قر ءبىلىم جانە عىلىم ءمينيسترى،

الەكسەي تسوي، قر دەنساۋلىق ساقتاۋ ءمينيسترى،

ءبىرجان نۇرىمبەتوۆ، قر ەڭبەك جانە حالىقتى الەۋمەتتىك قورعاۋ ءمينيسترى،

بەيبىت اتامقۇلوۆ، قر يندۋستريا جانە ينفراقۇرىلىمدىق دامۋ ءمينيسترى،

ەرۇلان جاماۋباەۆ، قر قارجى ءمينيسترى،

اقتوتى رايىمقۇلوۆا، قر مادەنيەت جانە سپورت ءمينيسترى،

باقىت سۇلتانوۆ، قر ساۋدا جانە ينتەگراتسيا ءمينيسترى،

يۋري يلين، قر توتەنشە جاعدايلار ءمينيسترى،

رۋسلان دالەنوۆ، قر ۇلتتىق ەكونوميكا ءمينيسترى،

باعدات مۋسين، قر تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى،

ماعزۇم مىرزاعاليەۆ، قر ەكولوگيا، گەولوگيا جانە تابيعي رەسۋرستار ءمينيستورى،

نۇرلان نوعاەۆ، قر ەنەرگەتيكا ءمينيسترى.

بۇگىن ءماجىلىس جانە ءماسليحات دەپۋتاتتارىنىڭ سايلاۋى اياقتالادى. قورىتىندى ەسەپ جاريالانادى. سودان كەيىن، ۇكىمەت تولىق قۇرامدا وتستاۆكاعا كەتىپ، ورنىنا جاڭا ۇكىمەت جاساقتالۋى ءتيىس.

تالقى ءۇشىن سۇراق: ۇكىمەت قۇرامى قالاي وزگەرەدى؟ ۇكىمەتتى ەندى كىم باسقارۋى مۇمكىن؟ جاڭا ۇكىمەتتىڭ قۇرامىنا جۋىردا وتستاۆكاعا كەتەتىن ۇكىمەتتىڭ مۇشەلەرى قايتىپ ورالا ما؟ ءسىز نە دەيسىز، مارتەبەلى وقىمان؟

Abai.kz

28 پىكىر