سەيسەنبى, 9 ناۋرىز 2021
قوعام 2913 3 پىكىر 4 قاڭتار, 2021 ساعات 13:06

تسوي نەگە ۆاكتسينا سالدىرماي ءجۇر؟

وتكەن اپتادا جامبىل وبلىسىنىڭ اكىمى بەردىبەك ساپارباەۆ كوروناۆيرۋسقا قارسى ۆاكتسينا سالدىردى. قازاق بيلىگىندەگى قارت كادرلاردىڭ ءبىرى ساپاراباەۆتان ءسال ەرتەرەك پرەزيدەنت كەڭەسشىسى ەرلان قارينعا دا ۆاكتسينا سالىنعان. ال ءبىلىم جانە عىلىم ءمينيسترى اسحات ايماعامبەتوۆ سوناۋ قارا كۇزدە (25 قىركۇيەك) ۆاكتسينا قابىلداعان.

جوعارىدا اتى اتالعان شەندىلەردىڭ بارىنە قازاقستاندىق QazCovid ۆاكتسيناسى ەگىلدى.

قازىر ەلىمىزدە وتانداق ماماندار دايىنداعان QazCovid ۆاكتسيناسىنان بولەك، رەسەيلىك ۆاكتسينالار دا سىناقتان ءوتىپ جاتىر. سوڭعىسىنىڭ ساپاسى جايلى اڭگىمە كوپ. الەمدىك دەڭگەيدە ءالى مويىندالماعان رەسەي ۆاكتسيناسىن العاشقىلاردىڭ ءبىرى بولىپ قازاقستان ساتىپ العان بولاتىن.

رەسەيلىك ۆاكتسينانى الۋ تۋرالى كەلىسسوزدى جۇرگىزۋ ءۇشىن ماسكەۋگە دەنساۋلىق ساقتاۋ ءمينيسترى الەكسەي تسوي بارعان ەدى. بىراق تسوي مىرزا ءوزى باسى-قاسىندا ءجۇرىپ ساتىپ العان رەسەيلىك ۆاكتسينانى دا، وتاندىق ماماندار جاساعان QazCovid ۆاكتسيناسىن دا سالدىرماعان كورىنەدى.

بۇل تۋرالى 3 قاڭتاردا وتكەن بريفينگ بارىسىندا ءمينيستردىڭ ءوزى ايتتى.

- ازىرشە قازاقستاندىق تا، رەسەيلىك تە ۆاكتسينا سالدىرمادىم. قازىر ءبىز قورىتىندى ناتيجەنى كۇتىپ وتىرمىز. سودان كەيىن العاشقىلاردىڭ ءبىرى بولىپ ۆاكتسينا سالدىرامىن. ۆاكتسينا قازاقستاندا رەسمي تۇردە تىركەلىپ، جاپپاي ۆاكتسيناتسياعا شىققان ساتتە مىندەتتى تۇردە، - دەدى تسوي.

جۋرناليستەردىڭ سۇراعىنا وراي، مينيستر نە ءۇشىن ءالى كوروناۆيرۋسقا قارسى ۆاكتسينانى سالدىرماي جۇرگەنىن ءتۇسىندىردى. ونىڭ ايتۋىنشا، دەنساۋلىق ساقتاۋ ءمينيسترى ۆاكتسينا سالدىرسا، بۇل تۇتاس حالىقتى ۆاكتسينا قابىلداۋعا شاقىرۋ بولىپ سانالادى ەكەن.

- مىنانى ءتۇسىنىپ الۋ ماڭىزدى. دەنساۋلىق ساقتاۋ ءمينيسترى ۆاكتسينا سالدىرسا بۇل حالىقتى ۆاكتسينا سالدىرۋعا شاقىرۋ دەپ ەسەپتەلەدى. بۇل ۆاكتسينا قاۋىپسىز ءارى ءتيىمدى ەكەنى دالەلدەنگەنى. سوندىقتان ءبىز مەديتسينالىق جۇمىسشى رەتىندە، وسى سالاداعى مامان رەتىندە ونىڭ قاۋىپسىز ءارى ءتيىمدى ەكەنىنە كەپىل بولۋىمىز كەرەك. قازىر ول كلينيكالىق سىناقتىڭ ءبىرىنشى جانە ەكىنشى فازاسىندا قاۋىپسىز ءارى ءتيىمدى دەگەن قورىتىندى الدىق. رەتتەۋشى رەتىندەگى ءبىزدىڭ مىندەت - بارلىق قاجەت قورىتىندىنى العان سوڭ ۆاكتسينا سالدىرىپ، ونى كورسەتەمىز. سەبەبى حالىق ونىڭ ءتيىمدى ءارى قاۋىپسىز ەكەنىن ءتۇسىنۋى كەرەك. قازىرگى ۋاقىتتا ۆاكتسينا سالدىرعاندارعا كەلسەك، بۇل ەرىكتى شارا، اركىم ءوزى شەشىم قابىلدايدى، بۇل كلينيكالىق زەرتتەۋ اياسىندا ءجۇرىپ جاتىر. مۇنداي زەرتتەۋگە قاتىسۋ ءۇشىن كۇن سايىن دەنە قىزۋىن ولشەپ، قوسىمشا بارىپ، تەكسەرىلۋ كەرەك. (...) سوندىقتان ءبىز جاپپاي ۆاكتسيناتسيالاۋ باستالعاندا ارەكەت ەتەمىز، - دەدى مينيستر.

مينيستر تسوي قازاقستاندىق جانە رەسەيلىك ۆاكتسينا ناقتى تىركەلۋدەن ءوتىپ، ءتيىمدى ءارى قاۋىپسىز ەكەنى تەكسەرستەن وتكەنىن كۇتىپ وتىرعانىن ايتادى. ونىڭ سوزىنشە، ەكى ۆاكتسينا دا قاۋىپسىز ەكەنىن دالەلدەۋ ءۇشىن مينيسترلىك قىزمەتكەرلەرىنىڭ جارتىسى رەسەيلىك، ال جارتىسى قازاقستاندىق ۆاكتسينا سالدىرادى ەكەن.

Abai.kz

3 پىكىر