پرەزيدەنت قاسىم-جومارت توقاەۆقا پرەمەر-مينيستر اسقار مامين ەلىمىزدىڭ سانيتارلىق-ەپيدەميولوگيالىق احۋالى مەن الەۋمەتتىك-ەكونوميكالىق دامۋىنىڭ وزەكتى ماسەلەلەرى جايىندا ەسەپ بەردى.

ۇكىمەت باسشىسى رەسپۋبليكاداعى سانيتارلىق-ەپيدەميولوگيالىق احۋال باقىلاۋدا ەكەنىن، كۇندەلىكتى جاڭادان ىندەتكە شالدىققانداردىڭ سانى 0,4 پايىزعا ءوسىپ وتىرعانىن، ەلىمىز بويىنشا كوروناۆيرۋستىڭ ءورشۋ دەڭگەيىنىڭ كورسەتكىشى 0,9 پايىزدى قۇرايتىنىن ايتتى. جۇقپالى اۋرۋلار اۋرۋحانالارىنىڭ 28 پايىزىندا، جانساقتاۋ بولىمدەرىنىڭ 20 پايىزىندا ادامدار ەمدەلىپ جاتىر.

قازىرگى ۋاقىتتا COVID-19 ىندەتىنىڭ تارالۋ قارقىنى بويىنشا اتىراۋ وبلىسى «قىزىل ايماقتا»، قوستاناي، اقمولا، پاۆلودار جانە سولتۇستىك قازاقستان وبلىستارى «سارى ايماقتا»، قالعان وڭىرلەردىڭ بارلىعى «جاسىل ايماقتا» تۇر.

بيىلعى 19 جەلتوقساندا وتاندىق QazCovid-in ۆاكتسيناسىن كلينيكالىق سىناقتان وتكىزۋدىڭ سوڭعى ءىىى ساتىسى باستالدى. ونىڭ شەڭبەرىندە 3 مىڭ ەرىكتى ازاماتقا ەكپە ەگىلۋدە.

2021 جىلى ناۋرىز ايىندا جامبىل وبلىسى قورداي اۋدانىندا جىلىنا قۋاتى 60 ميلليون مولشەردە ۆاكتسينا شىعارۋعا جەتەتىن بيوفارماتسەۆتيكالىق زاۋىت پايدالانۋعا بەرىلەدى.

سونىمەن بىرگە قاراعاندى قالاسىندا رەسەيلىك «سپۋتنيك V» ۆاكتسيناسىن شىعارۋ ءوندىرىسىن ىسكە قوسۋعا دايىندىق جۇمىستارى ءجۇرىپ جاتىر.

مەملەكەت باسشىسىنا ينۆەستيتسيا تارتۋ، وڭىرلەردى دامىتۋ جوبالارىن جۇزەگە اسىرۋ، حالىقتى جۇمىسپەن قامتۋ جانە ەلىمىزدىڭ الەۋمەتتىك-ەكونوميكالىق دامۋىنىڭ وزگە دە وزەكتى ماسەلەلەرى جونىندە باياندالدى.

Abai.kz