باتىس قازاقستان وبلىسىندا «كيىك» جەدەل الدىن الۋ شارالارى باستالدى.

بقو پوليتسيا دەپارتامەنتىنىڭ ءباسپاسوز قىزمەتى ءمالىم ەتكەنىندەي، 1-31 جەلتوقسان ارالىعىندا وتكىزىلەتىن شارا ماقساتى – كيىكتەرگە قاتىستى براكونەرلىك دەرەكتەردى انىقتاۋ جانە ولاردىڭ الدىن الۋ، كيىك مۇيىزدەرىنىڭ زاڭسىز اينالىمىنا توسقاۋىل قويۋ.

جىل باسىنان بەرى وڭىردە 37 قىلمىستىق ءىس تىركەلسە، سونىڭ التاۋى زاڭسىز اۋلاۋ، 31-ءى سيرەك كەزدەسەتىن جانە قۇرىپ كەتۋ قاۋپى تونگەن، سونداي-اق پايدالانۋعا تىيىم سالىنعان وسىمدىكتەر مەن جانۋارلار تۇرلەرىن، ولاردىڭ بولىكتەرىن نەمەسە دەريۆاتتارىن زاڭسىز قولدانعانى ءۇشىن قوزعالدى.

قىلمىستىق ىستەردى سوتتا قاراۋ بارىسىندا 8 ادام قىلمىستىق جاۋاپكەرشىلىككە تارتىلدى، ولاردىڭ جەكەلەگەنى باس بوستاندىعىنان ايىرۋ ورىندارىندا جازاسىن وتەۋدە.

قۇقىق بۇزۋشىلاردان 2,5 مىڭنان استام ءمۇيىز تاركىلەنىپ، 480-نەن استام اتىلعان كيىك ۇشاسى تابىلدى.

بۇعان دەيىن بقو-دا زاڭسىز كيىك اۋلاۋمەن اينالىسقان ەكى قىلمىستىق توپ ۇستالعان.

Abai.kz