جۇما, 22 قاڭتار 2021
كورشىنىڭ كولەڭكەسى 2537 8 پىكىر 1 جەلتوقسان, 2020 ساعات 11:55

رەسەيلىك باق ارانداتۋىن قاشان قويادى؟

سايلاۋ جاقىنداعان سايىن رەسەيدىڭ كەيبىر باسىلىمدارى ەتنيكالىق سلاۆياندار مەن ورىس ءتىلدى وزگە ۇلتتاردىڭ قولتىعىنا سۋ بۇركەتىن «ورىس تىلدىلەر مەن ورىس ءتىلى قازاقستاندا قۋدالانىپ جاتىر» دەگەن تاقىرىپتى وزەكتى ەتە ءتۇستى. جاقىندا رەسەيلىك ءبىر سايت «قازاقستان بيلىگى مۇقىمورىستىققا قارسى، بىراق رف بۇعان بەيجاي قارامايدى//ۆلاستي كازاحستانا پروتيۆ ۆسەگو رۋسسكوگو، نو رف ەتو بەزرازليچنو» اتتى ءۇزدىم-جۇلدىم ماقالاسىماقتى جاريا ەتتى.

اۆتورى بەلگىسىز ۇجىمدىق ماقالاسىماقتا تاۋەلسىز ۋكراينانى الاتايداي بۇلدىرگەن بۇگىن «ۋكراينتسى روسسي» ۇيىمىنىڭ باسقارما مۇشەسى بولىپ تابىلاتىن پەتر كولومەتس ساياسي ساراپشى رەتىندە ءوز پىكىرىن ءبىلدىرىپتى. 

 ۇلتى بولەك پەتر كولومەتستىڭ اۋزىنا ءسوز سالىپ، ۋكراينعا كەتكەن ەسەسىن مونوۇلتقا اينالا باستاعان قازاقستاننان قايتارۋدىڭ ارام پيعىلى بۇعىپ جاتقانداعى بىردەن سەزىلەدى. 

باسىلىمىنىڭ ويىنشا ەلىمىزدەگى ورىس الەمى ءۇشىن كۇرەسەتىن جالعىز جان ءوزى مۇسىلمان، ءوزى ەتنيكالىق قازاق رەسەيشىل بلوگەر ەرمەك تايچيبەكوۆ قانا ەكەن، قالعاندارى ورىس الەمىن ساتقان ساناتىنا جاتادى. بۇل تۋراسىندا پيعىلى پاسىق باسىلىم بىلاي دەپ اشىنا جازادى:

«ساراپشىنىڭ ايتۋىنشا، ءدال قازىر قازاقستاندا ورىس جانە كارىس دياسپورالارىنىڭ وكىلدەرى زاڭ بويىنشا وزدەرىن قازاق دەپ اتاۋ قۇقىعىن بەرۋ ءۇشىن شىر-پىر بولۋدا. وسى يدەيانىڭ باستاۋ كوزىندە قازاقستانداعى كارىس دياسپورالارىنىڭ وكىلدەرى تۇر. ءارى ولار بۇنىسىمەن قويماي، ورىس ءتىلىن ۇلتارالىق قاتىناس ءتىلى قۇقىعىنان ايىرۋدى تالاپ ەتۋدە دەگەن ساراپشى: «بىراق ولاردىڭ بۇل ىسىنە قازاق ۇلتشىلدارى قارسى. ولاردا «كۇماندى قازاق» دەگەن تەرمىن بار، - دەگەندى قاداپ ايتادى».

بار ماسەلە ەرمەك تايچيبەكوۆتەردىڭ سانىن كوبەيتىپ، قازاق ەلىن قاققا جارۋ ەكەندىگىن اشىق بىلدىرگەن مىنا دوق كورسەتۋدەن انىق اڭعارامىز:

«رەسمي قازاقستان مۇقىمورىستىققا قانى قارسى، امال نە، مىنە وسى قازاق بيلىگى ورتەپ جىبەرگەن الاڭداعى جالعىز جاۋىنگەر تايچيبەكوۆ قانا. ول قازىر قاتتى قىسىم كورىپ، قايدا ەكەنى مۇلدەم بەلگىسىز. قازاقتىڭ تامىرىن باسقىزبايتىن اقپاراتتىق بلوكادا رەسەي تاراپىنان تاس-تالقان بولۋعا ءتيىس. باق بەتتەرىندە رەسەي جاعىنداعى وسىنداي تۇلعالار تۋرالى اقپاراتتار جاريا ەتىلسە جاقسى بولار ەدى... ولار ءبىز ءۇشىن وتە قۇندى. رەسەي ەرمەككە قولىن سوزىپ، زاڭگەر جالداپ، تۇيتكىلدى ءىستى ءبىر جاقتى ەتۋگە ءتيىس...

ەڭ دۇرىسى تاپ وسىنداي تۇلعالار ءۇشىن حالىقارالىق قۇقىق قورعاۋ ۇيىمدارىن قۇرعانىمىز. ەگەر ءبىز وسىنى ىستەمەسەك، پوستكەڭەستىك كەڭىستىكتەگى ءبىزدىڭ مۇددەمىزدى قورعاۋشىلارعا قولىمىزدى قۋسىرىپ  بەي-جاي قارايتىندىعىمىزدى تانىتادى»، - دەپ، پەتر كولومەتس اسىرەورىستىق پيعىلىن تانىتادى.

بىزدەگى ورىن الىپ جاتقان مونوۇلتتانۋ پروتسەسى رەسەيگە ۇنامايدى. ۇنەمى ىشكى ىسىمىزگە ارالاسۋىن توقتاتپاق تۇگىل، اشىق ارالاسۋعا كىرىسەتىن پيعىلى بارىن ءار قازاق سەزىنە ءتۇستى.

بۇنداي ارانداتۋلارعا سايلاۋعا ءتۇسىپ جاتقان پارتيالار ءوز نوتالارى مەن شاعىمدارىن رەسەي ەلشىلىگى الدىندا اشىق تانىتا الا ما؟؟؟

ءابىل-سەرىك الياكبار

Abai.kz

8 پىكىر