قازاقستان رەسپۋبليكاسىنىڭ تۇڭعىش پرەزيدەنتى كۇنى قارساڭىندا ەلوردادا «نۇرسۇلتان نازارباەۆ: جاھاندىق اۋقىمداعى ساياساتكەر» حالىقارالىق كونفەرەنتسياسى ءوتتى. شارانى قر پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتى سىرتقى ىستەر مينيسترلىگىمەن بىرلەسىپ ۇيىمداستىردى.

كەزدەسۋ ارالاس فورماتتا ءوتتى. قازاقستاندىق ساراپشىلارمەن ءارتۇرلى جىلدارى الەمدىك دەرجاۆالاردىڭ مەملەكەتتەرى مەن ۇكىمەتتەرىن باسقارعان، حالىقارالىق ۇيىمداردا جوعارى لاۋازىمداردى اتقارعان جانە اتقارىپ جۇرگەن بەلگىلى ساياساتكەرلەر شەت مەملەكەتتەردەن بايلانىسقا شىقتى. ولاردىڭ بارلىعى ءبىر كەزدەرى نۇرسۇلتان نازارباەۆپەن تىعىز جۇمىس ىستەدى جانە ەڭ ءورشىل يدەيالاردى جۇزەگە اسىرۋدىڭ كۋاگەرى بولدى.

«جاھاندىق اۋقىمداعى ساياساتكەر» - مەملەكەت باسشىسى قاسىم-جومارت توقاەۆ ءوزىنىڭ «ون دەلاەت يستوريۋ» اتتى كىتابىندا قازاقستان رەسپۋبليكاسىنىڭ تۇڭعىش پرەزيدەنتى-ەلباسىنىڭ مەملەكەتتىڭ قالىپتاسۋى مەن نىعايۋىنداعى كورنەكتى ءرولىن اتاپ ءوتىپ، نۇرسۇلتان نازارباەۆتى وسىلاي اتايدى.

قاتىسۋشىلار ءوز سوزدەرىندە تۇڭعىش پرەزيدەنتتىڭ قازاقستان ەگەمەندىگىنىڭ قالىپتاسۋىنداعى، مەملەكەتتىك باسقارۋدىڭ ءتيىمدى جۇيەسىن قۇرۋداعى جانە ۇلتتىق تاريحتىڭ جاڭا كەزەڭىندە ەلدىڭ دامۋ باسىمدىقتارىن ايقىنداۋداعى ءرولى مەن ماڭىزىن اتاپ ءوتتى. سپيكەرلەردىڭ ايتۋىنشا، تاريحي ولشەم بويىنشا قىسقا مەرزىم ىشىندە نۇرسۇلتان نازارباەۆ الەۋمەتتىك جانە ەكونوميكالىق تۇراقتىلىققا نەگىزدەلگەن تابىستى مەملەكەت قۇرىپ قانا قويماي، جاھاندىق قاۋىپسىزدىك پەن دامۋ سالاسىندا بىرقاتار سەرپىندى باستامالار كوتەردى. حالىقارالىق كونفەرەنتسياعا قاتىسۋشىلار سونداي-اق ەلباسىنىڭ قازاقستاننىڭ حالىقارالىق بايلانىستارىن جولعا قويۋ، كوپۆەكتورلى سىرتقى ساياساتتىڭ ستراتەگيالىق باعىتىن قۇرۋ جونىندەگى كۇش-جىگەرى مەن جەتىستىكتەرىن، سىرتقى ساياسي باستامالاردى، ولاردىڭ ىسكە اسىرىلۋ بارىسى مەن قورىتىندىلارىن تالقىلادى.

نۇرسۇلتان نازارباەۆتىڭ وركەنيەتارالىق جانە كونفەسسياارالىق ديالوگتى نىعايتۋ، بەيبىتشىلىك پەن كەلىسىمنىڭ، جاستىقتىڭ، سۇلۋلىقتىڭ، كرەاتيۆتىلىكتىڭ سيمۆولىنا اينالعان قازاقستاننىڭ قازىرگى زامانعى استاناسىن ەۋرازيا ورتالىعىندا سالۋ جونىندەگى جاسامپاز ميسسياسىنا ەرەكشە نازار اۋدارىلدى.

Abai.kz