مەملەكەت باسشىسى قاسىم-جومارت توقاەۆ قاراعاندى وبلىسىنا جاساعان جۇمىس ساپارى اياسىندا «سارىارقا» ارنايى ەكونوميكالىق ايماعىنىڭ دامۋ پەرسپەكتيۆاسىمەن تانىستى.

وبلىس اكىمى جەڭىس قاسىمبەك پرەزيدەنتكە ارنايى ەكونوميكالىق ايماقتاعى ينۆەستيتسيالىق جوبالاردىڭ جۇزەگە اسىرىلۋ بارىسى، تۇراقتى جۇمىس ورىندارىن اشۋ، جەكە جانە شەتەلدىك ينۆەستيتسيالاردى تارتۋ، سونداي-اق،  قازاقستان مەن گەرمانيانىڭ بىرلەسكەن كاسىپورنىنىڭ جۇمىسى تۋرالى باياندادى.

تەحنيكالىق گاز وندىرۋمەن اينالىساتىن «ليندەگاز قازاقستان» جشس-ءنىڭ، كۇن ەلەكتروستانتسياسى باعىتىندا قىزمەت ەتەتىن «قازسولار-50» جشس-ءنىڭ، جىلۋ وتكىزبەيتىن قۇبىرلار وندىرەتىن «يزوپليۋس» جشس-ءنىڭ جانە شارلى كراندار شىعاراتىن «بيومەر ارماتۋرا» جشس-ءنىڭ جەتەكشىلەرى مەملەكەت باسشىسىنا ءوز زاۋىتتارىنىڭ جۇمىسى جانە ءونىم ءوندىرۋ كولەمىن ۇلعايتۋ جونىندەگى جوسپارلارى جايىندا اقپارات بەردى. سونىمەن قاتار بۇكىل الەمدە قالىپتاسقان ەكونوميكالىق احۋالدى ەسكەرە وتىرىپ، پاندەميا كەزىندەگى جۇمىس جاعدايى، بيزنەستىڭ الەۋمەتتىك جاۋاپكەرشىلىگى مەن قايىرىمدىلىق ىستەرى تۋرالى ەگجەي-تەگجەيلى باياندادى.

قاسىم-جومارت توقاەۆ «قازسولار-50» كومپانياسىنىڭ وكىلىمەن اڭگىمە بارىسىندا جاڭارتىلاتىن ەنەرگيا كوزدەرىنە قاتىستى جوبالاردى جۇزەگە اسىرۋدىڭ ماڭىزدىلىعىنا نازار اۋداردى.

– بالاما ەلەكتر ەنەرگياسى باعىتىن قولدايمىن. جولداۋدا بىرتىندەپ كومىرتەك پايدالانۋدى ازايتۋ ساياساتىن جۇرگىزۋ كەرەك ەكەنىن ايتتىم. بۇل باعىتتىڭ بولاشاعى زور. بۇكىل الەم اتالعان باعىتتا دامىپ جاتىر. مەن گەرمانياعا بارعانىمدا وسى تاقىرىپتا نەمىس كومپانيالارىنىڭ جەتەكشىلەرىمەن سويلەستىم. جالپى ولارمەن ىنتىماقتاستىققا نازار اۋدارۋ كەرەك دەپ سانايمىن. كۇن ەلەكتر ەنەرگياسى بولاشاقتا بىرقاتار پروبلەمانى شەشە الاتىن قۋاتتى كوزگە اينالادى. ول سونىسىمەن تارتىمدى، – دەدى پرەزيدەنت.

سودان كەيىن پرەزيدەنت كانادالىق زاماناۋي تەحنولوگيا بويىنشا ءونىم شىعاراتىن «Steel Manufacturing» جشس-ءنىڭ ءوندىرىس اۋماعىن ارالاپ كوردى. زاۋىت جىلىنا لاتۋننان جاسالعان 30 ميلليون بۇيىم شىعارادى.

Abai.kz