سەيسەنبى, 19 قاڭتار 2021
46 - ءسوز 2426 3 پىكىر 23 قاراشا, 2020 ساعات 13:25

اسسامبلەياعا 9 دەپۋتاتتىق ورىن بەرۋ كەرەك پە؟

اناۋ قازاقستان پارلامەنتىنىڭ ەڭ ەگدە جاستاعى دەپۋتاتى، كرەمىلدەگى كورتوسەكتە (كور ەمەس، كورمەدە) كورىنگەننىڭ كوزسۇزگىسى ءۇشىن ەكسپونات بوپ جاتقان (بۇرىن سولاي ەدى، قازىر ناقتى بىلمەيدى ەكەم) پرولەتاريات كوسەمى لەنين شالدىڭ سۇيەگىن ءبىزدىڭ ەلگە اكەلگىسى كەلىپ الەك بوپ، ماجىلىستەن مىڭق-مىڭق ەتكەن ۆلاد اتا كوسارەپ الگىندە ءوز پارتيالاستارىنا ولەردەي بوپ وكپەلەپ قاپتى. شالەكەڭنىڭ كوڭىلى قالعانى سونشالىق، پارتيالاستارىنا قاراتا سويلەپ: "سەندەر كوممۋنيستىك دەگەن اتتان بەكەر بەزىندىڭدەر، ەندى مەنەن جاۋاپ كۇتىڭدەر", دەپ ءوزى بولەك كوممۋنيستىك پارتيا اشاتىنىن ايتىپتى. ال كومپارتيا توراعاسى قوڭىرىپ بولسا، ەل-جۇرتتىڭ كوڭىل-كۇيىن اڭعاردى ما، الدە ەندىگىدە "كوممۋنيزم" دەگەن تىركەسى بار كەز كەلگەن اڭگىمەنىڭ وزىنە تيتتەي دە بولسا ۇپاي اپەرمەيتىنىن كەش تە بولسا ءتۇسىندى مە، ايتەۋىر پارتيا ىشىندە ەدەل-جەدەل جيىن وتكىزىپ، پارتيا اتاۋىنان "كوممۋنيستىك" دەگەن ءسوزدى الىپ تاستاپتى.

بۇل قىزىق جاڭالىقتى اۋەلى باكۋدە جاتىپ ەستىدىك. وي-ءپالى. بۇل رەبرەندينگ ءدال سايلاۋدىڭ الدىندا، انە-مىنە دەگەندە جاسالعانىن جۇرت ءسوزسىز، كوممۋنيستەردىڭ ۇپايى ازايعانداعى اقىرعى امالى دەپ قابىلدادى. جاسىرارى جوق، مەندە... ايتپەسە، وسىعان دەيىن سازارعان بەتى سازارىپ، "نە دەسەڭدەر، و دەڭدەر، كوممۋنيزمنەن كەرەمەتتى كورگەن جوقپىزعا" سالىپ، وتىرىپ العاندار ءبىر-اق، كۇندە اقىلدارى كىرىپتى دەگەنگە ءوز باسىم ولسەم دە سەنبەيمىن. قوش، رەبرەندينگ پارتيانىڭ اتىنا عانا ەمەس، زاتىنا دا جاسالسا جانە ماقۇل دەر ەك. قۇرامى وزگەرسە... بىراق، وتكەن اپتالاردىڭ بىرىندە دەپۋتات احمەتبەكوۆ مىرزانىڭ: "قازىرگى دەپۋتاتتاردىڭ بارلىعى، ءتىپتى جاسىنىڭ ەگدەلىگىنە قاراماي، كوسارەپ تا سايلاۋعا تۇسەدى", دەگەن اۋانداعى پىكىرىن وقىپ قالعانمىن. سوندىقتان، بۇل رەبرەندينگتەن اسا ءبىر وزگەرىس كۇتپەيمىن، جانە ونىڭ قانشالىقتى ءساتتى جاسالعانىنا كۇمانمەن قارايمىن... ال ەكىنشى جاعىنان دە-فاكتو، ەندى قازاقستاندا كوممۋنيستىك پارتيا اتىمەن جوق! ايتپاعىم ول دا ەمەس ەدى... فب-دا كوسارەپتىڭ سۋرەتى بار سول ماتەريالدىڭ سىلتەمەسى كولبەڭدەپ شىعا بەرگەن سوڭ...

جالپى، بۇل ناۋقان قىزىق باستالدى. بيلىك پارتياسى جۇرتتان بۇرىن شابا جونەلدى. ەكى پارتيا ات اۋىستىرىپ امالدادى، تاعى بىرەۋلەرى قۇرامىنا ەسىم-سويى ەلگە ءماشھۇر ازاماتتاردى تارتتى. تاعى باسقالارى باتىل-باتىل سويلەي باستادى. قىسقاسى سولاي... وسىنىڭ بارلىعى ۇپاي ءۇشىن عانا ەكەنى ەكىباستان بەلگىلى دۇنيە... ەڭ ابسۋردتى اڭگىمە - بۇل تالاس بىرىنشىلىككە ەمەس، ەكىنشى ورىن ءۇشىن وتەتىن تالاس ەكەنىن ءبارى ىشتەي بىلەدى، تۇسىنەدى، مويىندايدى... ايتەۋىر مەيلىنشە، كوبىرەك ورىن الۋ ءۇشىن ارەكەتتەنەدى. سوندىقتان، بۇل سايلاۋدا كىم جەڭەدى دەگەن سۇراقتان گورى پارلامەنتكە قاي پارتيالار وتەدى دەگەن سۇراق دۇرىسىراق شىعار. ماقۇل، بالكىم ءۇش، بالكىم ءتورت پارتيا پارلامەنتكە بارادى دەيىك. بۇلار سايلاۋدان ءوتىپ بارادى. ال بۇلارعا ىلەسىپ اسسامبلەيا دەگەن ۇيىمنان 9 دەپۋتاتقا ماندات بەرىلەدى عوي... ۋوت، گاپ وسىدا... بۇل قوعامدىق ۇيىم عانا. ونىڭ قىزمەتىنىڭ ەففەكتيۆتىلىگى تۋرالى ءسوز مۇلدە باسقا... وسى ءبىر قوعامدىق ۇيىمنان ەرەكشەلەپ نەگە 9 دەپۋتاتتىق ورىن بەرىلەدى؟ ەگەر ولار قازاقستانداعى دياسپورا وكىلدەرى اتىنان وتىرۋى كەرەك دەسەك، سايلاۋعا قاتىساتىن كەز كەلگەن پارتيا ءوز ءتىزىمى مونوەتنيكالىق بوپ كەتپەسى ءۇشىن ونسىز دا دياسپورا وكىلدەرىن ىلەستىرىپ قوسىپ جاتقان جوق پا؟! ەندەشە نە تىراشتانۋ؟ ءوز باسىم اسسامبلەياعا ايرىقشالاپ 9 ورىن بەرۋ دەگەندى مۇلدە قابىلداي المايمىن! ءوز ويىم... سوسىن اسسامبلەيادان بارعان قازىرگى 9 دەپۋتتىڭ قاي پارتيانىڭ وكىلدەرى ەكەنىن كورسەڭىز، تاعى ءبىر گاپ!

نۇرگەلدى ابدىعانيۇلىنىڭ الەۋمەتتىك جەلىدەگى جازباسى

Abai.kz

3 پىكىر