سارسەنبى, 21 ءساۋىر 2021
بيلىك 2371 1 پىكىر 4 قاراشا, 2020 ساعات 12:41

2021 جىلدان باستاپ زەينەتاقى جيناعىن قولدانۋعا بولادى

ءماجىلىس توراعاسى نۇرلان نىعماتۋلين پالاتانىڭ جالپى وتىرىسىندا مەملەكەت باسشىسىنىڭ بيىلعى پارلامەنتتىك سەسسيانىڭ اشىلۋىندا جۇكتەگەن تاپسىرمالارىن ورىنداۋعا باعىتتالعان زاڭنامالىق نورمالارعا نازار اۋداردى.

اتاپ ايتقاندا، حالىقتىڭ زەينەتاقى جيناقتارىنىڭ ءبىر بولىگىن پايدالانۋ، سونداي-اق قوعامدىق كەڭەستەردىڭ ءرولىن كۇشەيتۋ.

وسىعان وراي، ءماجىلىس دەپۋتاتتارى ەكونوميكالىق ءوسۋدى قالپىنا كەلتىرۋ، سونداي-اق قوعامدىق كەڭەستەردىڭ قىزمەتىنە قاتىستى تۇزەتۋلەردى قامتيتىن زاڭ جوبالارىن ءبىرىنشى وقىلىمدا ماقۇلدادى.

وتىرىس بارىسىندا ءماجىلىس توراعاسى قوعامدا قىزۋ تالقىلانعان زەينەتاقى جيناقتارىنىڭ ءبىر بولىگىن پايدالانۋعا مۇمكىندىك بەرۋگە باعىتتالعان نورمالار تۋرالى ايتتتى.

نۇرلان نىعماتۋلين اتالعان زاڭ جوباسىنىڭ قابىلدانۋىمەن وسى ماسەلەنى شەشۋ بويىنشا زاڭنامالىق بازا قۇرىلاتىنىن اتاپ ءوتىپ:

- 2021 جىلدىڭ باسىنان باستاپ زەينەتاقى قورىنىڭ سالىمشىلارى ءوز جيناقتارىنىڭ ءبىر بولىگىن تۇرعىن ءۇي ساتىپ الۋعا، ەمدەلۋگە نەمەسە قارجى كومپانيالارىنىڭ باسقارۋىنا بەرۋ ءۇشىن پايدالانا الادى، - دەدى ءماجىلىس سپيكەرى.

وسى نورمانى تالقىلاۋ كەزىندە ءماجىلىس دەپۋتاتتارى زاڭ جوباسىندا كوزدەلگەن زەينەتاقى جيناقتارىنىڭ «جەتكىلىكتىلىك شەگىن» بەلگىلەۋ ادىستەمەسىنە قاتىستى ماسەلەنى كوتەردى.

ەڭبەك جانە حالىقتى الەۋمەتتىك قورعاۋ مينيسترلىگىنىڭ وكىلدەرى تۇسىندىرگەندەي، زەينەتاقى جيناقتارىنىڭ «جەتكىلىكتىلىك شەگىن» ايقىنداۋ ادىستەمەسىن ۇكىمەت انىقتايتىن بولادى. «جەتكىلىكتىلىك شەگىن» بەلگىلەۋدىڭ باستى ماقساتى - ازاماتتاردى زەينەتكەرلىك جاسقا تولعان كەزدە بولاشاقتا لايىقتى زەينەتاقىمەن قامتاماسىز ەتۋ مۇمكىندىگى.

سونىمەن قاتار، ءماجىلىس سپيكەرى زەينەتاقى جيناقتارىن پايدالانۋ تەتىگى قولجەتىمدى ءارى تۇسىنىكتى بولۋى ءتيىس ەكەنىن اتاپ ءوتىپ، الداعى ۋاقىتتا مەملەكەتتىك ورگاندار وسى تالاپتاردىڭ جۇزەگە اسىرۋدىڭ ناقتى تەتىكتەرىن قالىپتاستىرۋى كەرەك دەدى.

سونداي-اق، بۇگىنگى جالپى وتىرىستا قوعامدىق كەڭەستەردىڭ قىزمەتىنە قاتىستى نورمالار تالقىلاندى.

اتاپ ايتقاندا، دەپۋتاتتار قوعامدىق كەڭەستەر قازىرگى ۋاقىتتا مەملەكەتتىك ورگانداردا عانا ەمەس، كۆازيمەملەكەتتىك سەكتورعا دا قاتىستى  تۇزەتۋلەر ەنگىزدى.

بۇدان باسقا، دەپۋتاتتار قوعامدىق كەڭەستەرگە كۆازيمەملەكەتتىك سەكتور سۋبەكتىسىنىڭ دامۋ ستراتەگيالارى مەن جوسپارلارىنىڭ جوبالارىن، بيۋدجەتىنىڭ اتقارىلۋىن، ساتىپ الۋ كوميسسيالارىنىڭ قىزمەتىنە قاتىسۋمەن قاتار تالقىلاۋ فۋنكتسياسىن بەرۋدى ۇسىنادى.

وسىعان قاتىستى پىكىر بىلدىرگەن نۇرلان نىعماتۋلين بۇل ماسەلەلەر ءاردايىم قوعامنىڭ نازارىندا ەكەنىن ايتىپ، اتالعان نورما قوعامدىق كەڭەستەردىڭ قىزمەتىندەگى ەلەۋلى ىلگەرىلەۋشىلىكتى بىلدىرەتىنىن جەتكىزدى.

سونىمەن قاتار، ءماجىلىس دەپۋتاتتارى زاڭ جوباسىن ازىرلەۋشىلەردىڭ ۋاكىلەتتى ورگاننىڭ قوعامدىق كەڭەستەرگە «باسشىلىق ەتۋدى» جۇزەگە اسىرۋىن كوزدەيتىن تۇجىرىمىنا قاتىستى الاڭداۋشىلىقتارىن ءبىلدىردى.

ءماجىلىس سپيكەرى اتاپ وتكەندەي، قوعامدىق كەڭەستەردە مەملەكەتتىك ورگاننان باسشىلىق بولماۋى ماڭىزدى. سوندا عانا ولاردىڭ جۇمىسىنىڭ دەربەستىك قاعيداتتارى ساقتالادى.

ەكىنشى وقىلىم الدىندا جۇمىس توبى وسى نورمانىڭ تۇجىرىمداماسىن ناقتىلاۋى كەرەك.

وسىعان قاتىستى ءسوزىن قورىتىندىلاعان ءماجىلىس توراعاسى:

- وسى قوعامدىق كەڭەستەر  قۇرىلعان كۇننەن باستاپ، رەسپۋبليكالىق، جەرگىلىكتى دەڭگەيدە بارلىق ماسەلەلەردى تاۋەلسىز جانە اشىق شەشۋگە زور ىقپال ەتىپ كەلەدى. سوندىقتان، بۇگىن ءبىز ماقۇلداعان زاڭ جوباسى، ەڭ الدىمەن، قوعامدىق كەڭەس جۇمىستارىن ودان ءارى كۇشەيتۋگە سەرپىن بەرەدى.  سونىمەن بىرگە، قوعامدىق ديالوگتىڭ جاڭا ۇلگىسىن قالىپتاستىرۋعا جول اشادى دەپ سەنەمىز، - دەدى.

Abai.kz

1 پىكىر