جۇما, 29 ناۋرىز 2024
بيلىك 2175 0 پىكىر 25 قازان, 2020 ساعات 22:07

كوپۆەكتورلىلىق. سىرتقى ساياساتتا قازاقستاننىڭ ۇپايى تۇگەل مە؟..

قازاقستاننىڭ 2020-2030 جىلدارعا ارنالعان سىرتقى ساياسات تۋرالى تۇجىرىمداماسى بار، بىلەسىزدەر. ونى بيىل جىل باسىندا پرەزيدەنت قاسىم-جومارت توقاەۆتىڭ ءوزى بەكىتكەن.

وندا مەملەكەتتىك دامۋدىڭ جاڭا ساتىسىنا شىعۋ ءۇشىن جاڭا ەكونوميكالىق باعىتتى قالىپتاستىرۋ قاجەتتىگى، ول ءۇشىن كوپۆەكتورلى ءارى بەلسەندى سىرتقى ساياساتتى جۇرگىزۋى، مەملەكەتارالىق بايلانىستاردىڭ قاۋىپسىز امالدارىن ىزدەي وتىرىپ، حالىقارالىق نارىقتار مەن ينۆەستيتسيالار ءۇشىن مەملەكەتارالىق باسەكەلەستىكتى كۇشەيتۋى، الەمدىك قاۋىمداستىقتىڭ بەلسەندى مۇشەسى بولا وتىرىپ، ەۋرازيا جانە وا وڭىرىدەگى گەوساياسي ءھام گەوەكونوميكالىق ويىنشىعا اينالۋى كەرەكتىگى ايتىلعان.

بۇل باعىتتاعى جۇمىستاردىڭ ايقىن كورىنىسى رەتىندە ەل پرەزيدەنتىنىڭ شەتەل باسشىلارىمەن بولعان كەزدەسۋلەرىن ايتۋعا ابدەن بولادى. ويتكەنى، اتالمىش كەزدەسۋلەردە قازاقستاننىڭ سىرتقى ەلدەرمەن ينتەگراتسيالارى اقىلداسىلىپ، مەملەكەتتىك ماڭىزدى شەشىمدەر قابىلدانادى.

وسى رەتتە ءبىز قازاقستان پرەزيدەنتى قاسىم-جومارت توقاەۆتىڭ قازان ايىنداعى شەتەلدىك ارىپتەستەرىمەن بولعان كەزدەسۋلەرى مەن تەلەفون ارقىلى جاسالعان تالقىلارىنا شولۋ جاساعاندى ءجون كوردىك. سونىمەن، پرەزيدەنت توقاەۆ قازان ايىندا كىمدەرمەن جولىقتى؟ قاراڭىز:

1 قازان. قازاقستان پرەزيدەنتى قاسىم-جومارت توقاەۆ بىرقاتار مەملەكەتتىڭ ەلشىلەرىن اقوردادا قابىلدادى. كەزدەسۋ بارىسىندا شەت مەملەكەتتەردىڭ جاڭا تاعايىندالعان ەلشىلەرى پرەزيدەنت توقاەۆقا سەنىم گراموتالارىن تاپسىردى.

اتاپ ايتقاندا: بەلارۋس ەلشىسى پاۆەل ۋتيۋپين، فينليانديا ەلشىسى سويلي مياكەلياينەن-بۋحانيس، اۆستريا ەلشىسى ۆيللي كەمپەل، ماجارستان ەلشىسى ماتياش گالوشفاي سەنىم گراموتالارىن ۇسىندى.

5 قازان. پرەزيدەنت توقاەۆ تاجىكستان پرەزيدەنتى ەمومولي راحمونمەن سويلەستى. مەملەكەت باسشىسى ق-ج. توقاەۆ تاجىك ليدەرىن تۋعان كۇنىمەن قۇتتىقتاپ، قازاقستان مەن تاجىكستاننىڭ مەملەكەتارالىق سەرىكتەستىگىنىڭ پەرسپەكتيۆالارى جايلى ءسوز ەتكەن.

7 قازان. پرەزيدەنت توقاەۆ رف پرەزيدەنتى ۆلاديمير پۋتينمەن تەلەفون ارقىلى سويلەسكەن.

مەملەكەت باسشىلارى قازاقستان مەن رەسەي اراسىنداعى ەكىجاقتى قارىم-قاتىناستار جايىن ءسوز ەتكەن. اڭگىمە بارىسىندا كوروناۆيرۋس پاندەمياسىمەن كۇرەستەگى بىرلەسكەن ءىس-قيمىلدار مەن تاۋلى قاراباقتاعى قاقتىعىستى ءھام قازاقستان مەن رەسەيگە دە ورتاق وداقتاس سانالتىن قىرعىزستانداعى وقيعالاردى رەتتەۋ ماسەلەلەرىن تالقىلاعان. اڭگىمە بارىسىندا قازاقستان پرەزيدەنتى رەسەيلىك ارىپتەسىن تۋعان كۇنىمەن قۇتتىقتاپ، ەكى ەل اراسىنداعى ىنتىماقتاستىقتى دامىتۋعا قوسقان ۇلەسى ءۇشىن ريزاشىلىعىن بىلدىرگەن.

7 قازان. قازاقستان مەن وزبەكستان پرەزيدەنتتەرى تەلەفون ارقىلى سويلەسكەن. اڭگىمە بارىسىندا ەكى ەل اراسىنداعى باۋىرلاستىق، سان عاسىرلاردان بەرى ۇزىلمەي كەلە جاتقان دوستىق پەن مەملەكەتارالىق بايلانىستاردى ودان ءارى دامىتۋ جايىن ءسوز ەتكەن.

ايتا كەتەيىك، جارتى الەمگە جايىلعان كوروناۆيرۋس پاندەمياسى باستالعان العاشقى كەزەڭدە قازاقستان مەن وزبەكستاننىڭ ۇكىمەت باسشىلارى جولىعىپ، ىندەتتى ەڭسەرۋدە ءوزارا تاجىربيە الماسقان. بۇل جولى پرەزيدەنتتەر وسى ءبىر يگىلىكتى ءىستى ەرەكشە اتاپ ءوتتى.

12 قازان. قازاقستان مەن تاجىكستان پرەزيدەنتتەرى تەلەفون ارقىلى سويلەسكەن. پرەزيدەنت قاسىم-جومارت توقاەۆ ەمومولي راحموندى تاجىكستان پرەزيدەنتى بولىپ سايلانۋىمەن قۇتتىقتاعان.

16 قازان. پرەزيدەنت قاسىم-جومارت توقاەۆ رف قورعانىس ءمينيسترى سەرگەي شويگۋدى اقوردادا قابىلدادى.

وسى جولعى كەزدەسۋدە ەكى تاراپ قازاقستان مەن رف اراسىنداعى اسكەري ىنتىماقتاستىقتى نىعايتۋ جايىن تالقىلادى. اتالعان جيىن بارىسىندا قازاقستان مەن رەسەي اراسىندا «اسكەري سەرىكتەستىك» تۋرالى ەكىجاقتى مەموراندۋم قابىلدانعان. رەسەي قورعانىس ءمينيسترى سەرگەي شويگۋ اتالعان كەلىسىمدى قازاقستان ساپارىنىڭ ماڭىزدى ناتيجەلەرىنىڭ ءبىرى دەپ اتادى.

كەزدەسۋ سوڭىندا پرەزيدەنت توقاەۆ رف قورعانىس ءمينيسترى س.شويگۋدى ءى دارەجەلى «دوستىق» وردەنىمەن ماراپاتتادى.

22 قازان. مەملەكەت باسشىسى قاسىم-جومارت توقاەۆ وڭتۇستىك كورەي پرەزيدەنتى مۋن چجە ينمەن سويلەستى. ەكى پرەزيدەنت ەكىارالىق ارىپتەستىكتى، ستراتەگيالىق بايلانىس مەن ونى دامىتۋدىڭ كەلەشەگى جايلى ءسوز ەتتى.

وڭتۇستىك كورەي پرەزيدەنتى 2019 جىلدىڭ ساۋىرىندە قازاقستانعا رەسمي ءىس-ساپارمەن كەلىپ كەتكەن. سول جولى بىرقاتار ەكونوميكالىق جوبالار ماقۇلدانعان. بۇل جولى بىلتىر قابىلداعان شەشىمدەردىڭ جۇزەگە اسىرىلۋى بارىسىن تالقىلادى.

ايتا كەتەيىك، ەكى ەل پرەزيدەنتتەرىنىڭ پارمەنىمەن الماتىدا «Hyundai» جەڭىل اۆتوكولىك شىعاراتىن زاۋىت اشىلعان.

پرەزيدەنت توقاەۆ كوروناۆيرۋس پاندەمياسىنا قاراماستان قازاقستان مەن وڭتۇستىك كورەي اراسىنداعى تاۋار اينالىمىنىڭ قارقىنى باسەڭدەمەگەنىن، دسۇ، ماگاتە سەكىلدى حالىقارالىق ۇيىمدار شەڭبەرىندە ەكى ەلدىڭ ىنتىماقتاستىعى نىعايا تۇسكەنىن اتاپ ءوتتى. ال پرەزيدەنت مۋن چجە ين قازاقستان پرەزيدەنتىن كەلەر جىلى وڭتۇستىك كورەي ەلىنە شاقىردى.

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1578
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2273
عيبىرات

قايسار رۋحتى عازيز جان

مۇحتار قۇل-مۇحاممەد 3590