دۇيسەنبى, 23 قاراشا 2020
COVID-19 قازاقستاندا. جۇقتىرعاندار — 126182. جازىلعاندار — 112806. قايتىس بولعاندار — 1945
انىق 2610 15 پىكىر 29 قازان, 2020 ساعات 12:13

ءجىو: رەسەي 5 جىلدان كەيىن تۇركىمەنستانمەن تەڭەسەدى

حالىقارالىق ۆاليۋتا قورى رەسەي ءومىر ءسۇرۋ دەڭگەيى بويىنشا الەمدىك رەيتينگتە تومەن قاراي جىلجي بەرەدى دەپ سانايدى. 2020 جىلدىڭ سوڭىندا رەسەي فەدەراتسياسى جان باسىنا شاققانداعى ءجىو كولەمى بويىنشا الەمدە 68-ءشى ورىن الادى.

رەسەي ەكونوميكاسى ورتا ەسەپپەن ءبىر ادامعا شاققاندا 9,97 مىڭ دوللاردى قۇرادى. بۇل وتكەن جىلمەن سالىستىرعاندا 1,6 مىڭ نەمەسە 14%-عا از. حالىقتىڭ ورتاشا تابىسىنىڭ كورسەتكىشى بولىپ سانالاتىن، دوللارمەن قايتا ەسەپتەلگەن جان باسىنا شاققانداعى ءجىو رەسەيدە 2016-17 جىلدارداعى دەڭگەيىنە ءتۇستى.

2025 جىلعا قاراي رەسەي جان باسىنا شاققانداعى ءجىو بويىنشا الەمدىك رەيتينگتە تاعى ەكى پوزيتسياسىن جوعالتادى جانە 12,97 مىڭ دوللار كورسەتكىشىمەن 70-ءشى ورىنعا قايتا تۇسەدى، دەپ بولجايدى حۆق. ناتيجەسىندە رەسەيدىڭ ءومىر دەڭگەيى ءىس جۇزىندە تۇركىمەنستانمەن (12,85 مىڭ دوللار) تەڭەسەدى. قازىر رەسەي تۇركىمەنستاننان 20%-عا الدا تۇر. بىراق بۇل الشاقتىق الداعى 5 جىلدا تولىعىمەن جويىلاتىن بولادى، دەپ حابارلادى قور.

حۆق-نىڭ ەسەپتەۋلەرى بويىنشا قازاقستان دا رەسەيدى باسىپ وزا الادى. قازاقستان جان باسىنا شاققانداعى ءجىو بيىل 8,78 مىڭ دوللار كولەمىندە (74-ءشى ورىن). ال 2025 جىلعا قاراي 13,09 مىڭدىق كورسەتكىشپەن 69-ءشى ورىنعا كوتەرىلۋى مۇمكىن.

قىتاي رەسەيدى 2020 جىلى باسىپ وزدى. حۆق-نىڭ باعالاۋى بويىنشا، ولاردىڭ جان باسىنا شاققانداعى ءجىو 10,84 مىڭ دوللاردان 2025 جىلى 16,28 مىڭعا دەيىن وسەدى.

قازىر حۆق-نىڭ ەسەپتەۋلەرى بويىنشا، رەسەي ءومىر ءسۇرۋ دەڭگەيى بويىنشا دامىعان ەلدەردەن 4,5 ەسە ارتتا قالدى. جان باسىنا شاققاندا ءجىو دامىعان ەلدەردە - 46,35 مىڭ دوللارعا جەتتى. 2025 جىلعا قاراي بۇل كورسەتكىش 58,65 مىڭ دوللارعا دەيىن وسەدى، ال ايىرماشىلىق 5 ەسەگە جۋىقتايدى.

كەرىمسال جۇباتقانوۆ،

Abai.kz

15 پىكىر