جۇما, 29 ناۋرىز 2024
جاڭالىقتار 4187 1 پىكىر 26 قازان, 2020 ساعات 11:01

«ارمانىم – كوركەم سۋرەت ونەرىنىڭ شىڭىن باعىندىرۋ»

تاراز قالاسىنىڭ تۇرعىنى داريا نۇرلانوۆا نەبارى 15 جاستا. بىراق شىعارماشىلىق قابىلەتى، كوركەمدىك جانە ەستەتيكالىق تالعامى كاسىبي سۋرەتشىدەن كەم ەمەس. ول كەز-كەلگەن ادامنىڭ كوزىنە كورىنە بەرمەيتىن ناقىشتاردى تانيدى. اينالاسىنداعى ايشىقتى، قانىقتى تۇستەردەن الاتىن سەزىمىن شىعارماشىلىعى ارقىلى جەتكىزەدى.

تالانتتى قىز سۋرەت ونەرىندە ءبىرتالاي جەتىستىكتى باعىندىرىپ ۇلگەردى. داريانىڭ ۇلى ابايدىڭ «جاز» اتتى ولەڭىنىڭ جەلىسىمەن سالعان شىعارماسى ماسكەۋدە وتكەن بايقاۋدا توپ جاردى. قازاقستاننىڭ رەسەيدەگى، رەسەيدىڭ ءبىزدىڭ ەلدەگى ەلشىلىكتەرى ۇيىمداستىرعان جوبا «اباي-175» دەپ اتالعان بولاتىن.

ال، جاس سۋرەتشىنىڭ ۇلى وتان سوعىسىنىڭ 75 جىلدىعىنا ارناپ سالعان شىعارماسى رەسەي پوشتاسىنىڭ ماركالارىنا باسىلدى. كورشى مەملەكەت ۇيىمداستىرعان «مەنىڭ وتباسىم – ماڭگىلىك پولك» اتتى سايىسقا قازاقستاننىڭ تۇپكىر-تۇپكىرىنەن 130 وقۋشى ءوز جۇمىستارىن جولداعان ەدى. قازىلار القاسى 15 پەن 17 جاس ارالىعىنداعى جاسوسپىرىمدەر ۇسىنعان شىعارمالاردىڭ ىشىنەن داريا نۇرلانوۆانىڭ سۋرەتىن ەڭ ۇزدىك دەپ تانىدى.

«مەن دارياعا 5-ءشى سىنىپتان باستاپ سۋرەتتەن ساباق بەردىم. ول كىشكەنتاي كەزىنەن ءۇي تاپسىرمالارىن وتە ساپالى ورىندايتىن. تاۋەلسىز جۇمىس ىستەگەندى قالايتىن ناعىز شىعارماشىلىقتىڭ ادامى. سۋرەت سالۋ بويىنشا قوسىمشا ۇيىرمەلەرگە قاتىستى. ۇلى جەڭىس، تاۋەلسىزدىك، تۋعان جەر تاقىرىپتارىنا قاتىستى ءتۇرلى بايقاۋلارعا قاتىستى. قانداي تاقىرىپ بەرسەڭ دە ەمىن ەركىن جۇمىس ىستەي الادى. تۇستەرى، كولوريتى وتە ۇيلەسىمدى، شىعارماشىلىق قابىلەتى دامىعان. كومپوزيتسيا، ۇيلەستىرۋ، كومپونوۆكا ونىڭ ءبارىن ۇيرەنگەن دايىن سۋرەتشى، - دەيدى ونىڭ كوركەمدىك جەتەكشىسى ينديرا ماحامبەتكەرىموۆا.

داريا نۇرلانوۆا جۋىقتا «شىعارماشىل جاستاردى قولداۋ جونىندەگى ءىس-شارالاردى ۇيىمداستىرۋ» الەۋمەتتىك جوباسىنىڭ گرانتىن ۇتىپ الدى. بۇل جوبانى قر اقپارات جانە قوعامدىق دامۋ مينيسترلىگىنىڭ قولداۋىمەن «ازاماتتىق باستامالاردى قولداۋ ورتالىعى» كەاق مەملەكەتتىك گرانتىنىڭ شەڭبەرىندە «لوگوس-قاراعاندى» مۇگەدەكتەردى وڭالتۋ ورتالىعى جۇزەگە اسىردى. جاس سۋرەتشى گرانتتىڭ قاراجاتىنا شىعارماشىلىققا قاجەتتى جابدىقتار مەن بوياۋلار ساتىپ الدى. داريا نۇرلانوۆا ەندى اقش-تىڭ دەترويت قالاسىندا ءوتىن حالىقارالىق بايقاۋعا دايىندالىپ جاتىر.

«مەنىڭ بولاشاقتاعى ماقساتىم - قىلقالام شەبەرى اتانۋ. ارمانىم – كوركەم سۋرەت ونەرىنىڭ شىڭىن باعىنۋ»، - دەيدى جاس تالانت يەسى.

Abai.kz

1 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1569
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2264
عيبىرات

قايسار رۋحتى عازيز جان

مۇحتار قۇل-مۇحاممەد 3558