سارسەنبى, 25 قاراشا 2020
COVID-19 قازاقستاندا. جۇقتىرعاندار — 126860. جازىلعاندار — 113646. قايتىس بولعاندار — 1945
602 1 پىكىر 23 قازان, 2020 ساعات 12:36

قىرعىزستاندا پارلامەنت سايلاۋى كەيىنگە قالدى

قىرعىزستان پارلامەنتى – جوگوركۋ كەڭەش دەپۋتاتتار 22 قازاندا ءۇش وقىلىم وتكىزبەي-اق "قىرعىزستان پرەزيدەنتى مەن جوگوركۋ كەڭەش دەپۋتاتتارىن سايلاۋ تۋرالى" كونستيتۋتسيالىق زاڭعا وزگەرىستى قابىلدادى.

دەپۋتاتتار قابىلداعان زاڭ جوباسىنان سوڭ كونستيتۋتسيالىق رەفورما وتكەنگە دەيىن زاڭداعى 38 جانە 63-باپ كۇشىن جويادى. ياعني، سايلاۋ وتكىزۋ مەرزىمى بويىنشا نورما جۇزەگە اسپايدى.

جوباداعى تاعى ءبىر باپقا ساي، كونستيتۋتسيالىق رەفورما 2021 جىلدىڭ 10 قاڭتارىنا دەيىن ءوتۋى ءتيىس. تاعى ءبىر باپ جوگوركۋ كەڭەش سايلاۋى كونستيتۋتسيالىق رەفورمادان كەيىن وتكىزۋدى بەكىتەدى. ال كونستيتۋتسيالىق رەفورما 2021 جىلدىڭ 1 شىلدەسىنە دەيىن جاسالۋى ءتيىس.

زاڭ جوباسىن ۇسىنعان دەپۋتات اكىلبەك جاپاروۆتىڭ سوزىنشە، ءۇش ايدىڭ ىشىندە پارلامەنت، پرەزيدەنت جانە رەفەرەندۋم وتكىزۋ قارجى جاعىنان قيىنعا تۇسەدى. ول قازىرگى جوگوركۋ كەڭەش رەفورما وتكەنگە دەيىن جۇمىس ىستەي بەرەتىنىن دە ايتتى.

جوگوركۋ كەڭەش مۇشەلەرى بۇل زاڭ جوباسىن تالقىلاماي بىردەن داۋىس بەرىپ، 83 دەپۋتات قولدادى.

4 قازاندا وتكەن پارلامەنت سايلاۋىنان كەيىن جوگوركۋ كەڭەشكە وتپەي قالعان وپپوزيتسيالىق پارتيالار مەن جۇرت جاپپاي نارازىلىققا شىعىپ، قايتا سايلاۋ وتكىزۋدى، سوورونباي جەەنبەكوۆتىڭ پرەزيدەنتتىكتەن كەتۋىن تالاپ ەتتى. نارازى جۇرت "سايلاۋدا بيلىككە جاقىن پارتيالار جەڭدى، ولار اكىمشىلىك رەسۋرستاردى پايدالاندى، جۇرتقا اقشا بەرىپ داۋىس ساتىپ الدى" دەپ ايىپتاعان. 6 قازاندا ورتالىق سايلاۋ كوميسسياى سايلاۋ ناتيجەسىن جويدى.

15 قازاندا جەەنبەكوۆ "تاريحتا ءوز حالقىنا وق اتقان پرەزيدەنت بولعىسى كەلمەيتىنىن" ايتىپ، پرەزيدەنتتىكتەن كەتتى. ال ەكس-دەپۋتات سادىر جاپاروۆ پرەمەر-مينيستر جانە ۋاقىتشا پرەزيدەنت بولىپ تاعايىندالدى. وسك سايلاۋدى 20 جەلتوقسان وتەدى دەگەن. ال دەپۋتاتتار پرەزيدەنت سايلاۋىن 10 نە 17 قاڭتارعا تاعايىنداۋدى ۇسىنعان.

بۇعان دەيىن ۋاقىتشا پرەزيدەنت سادىر جاپاروۆ پارلامەنت كونستيتۋتسياعا وزگەرىس ەنگىزسە، سايلاۋعا قاتىساتىنىن ايتقان.

قىرعىزستان كونستيتۋتسياسىنا ساي، ۋاقىتشا پرەزيدەنت بولعان ادام پرەزيدەنت سايلاۋىنا قاتىسا المايدى. ال ەلدە كونستيتۋتسيانى وزگەرتۋ ءۇشىن حالىقتىق رەفەرەندۋم ءوتۋى ءتيىس.

Abai.kz

1 پىكىر