سەيسەنبى, 24 قاراشا 2020
COVID-19 قازاقستاندا. جۇقتىرعاندار — 126860. جازىلعاندار — 113646. قايتىس بولعاندار — 1945
506 3 پىكىر 21 قازان, 2020 ساعات 11:26

نۇر-سۇلتاندا كوپ بالالى انالار مەملەكەتتەن كومەك سۇرادى

20 قازاندا نۇر-سۇلتاندا بىرنەشە ايەل بيلىكتەن كومەك سۇراپ، اقورداعا بارماق بولدى. ايەلدەردىڭ سوزىنە قاراعاندا، ەلدە كارانتين كۇشەيگەلى تۇرمىسى ناشارلاپ كەتكەن. "پاتەراقى قارىزى كوبەيىپ، قينالىپ كەتتىك" دەگەن ايەلدەر "بالا-شاعامىزبەن دالادا قالامىز با" دەپ الاڭدايدى.

ءتورت بالانىڭ اناسى اقبايان جالمىرزاەۆا استانادا ءبىر بولمەلى پاتەردى 85 مىڭ تەڭگەگە جالداپ تۇراتىنىن ايتادى. كارانتين كەسىرىنەن جۇمىس توقتاپ، پاتەراقىسىن تولەي الماي قالعان.

– كۇيەۋىم جالدامالى جۇمىس ىستەيدى. ايلىعى 50-60 مىڭ تەڭگە. كارانتيندە جۇمىسى توقتاپ، ۇيدە وتىردى. تاپقانى پاتەراقىعا جەتپەيدى. سوندىقتان كەيدە كەشكىسىن مەيرامحانا جاعالاپ، گۇل ساتام. بىراق قازىر شەكتەۋگە بايلانىستى ول دا جوق. ءۇش ايدىڭ پاتەراقىسىن تولەي المادىق. بەرەشەگىم 250 مىڭعا جەتتى. بار قۇجاتىم مەن بالالاردىڭ مەتىركەسىنە دەيىن قوجايىنعا كەپىلگە بەرىپ قويعام. "ەرتەڭ شىق" دەسە، قايدا بارام؟ قاتتى قينالىپ كەتتىك. امالسىز وسى جەرگە ۇكىمەتتەن كومەك سۇراپ، كەلىپ تۇرمىن، - دەيدى كوپ بالالى ايەل.

ءوزىن جانار بيدايبەكوۆا دەپ تانىستىرعان نۇر-سۇلتان تۇرعىنى التى جىلدان بەرى ۇكىمەتتەن كومەك سۇراپ جۇرگەنىن ايتادى. سوزىنشە، 2014 جىلى ءۇيى ورتەنىپ، كامەلەتكە تولماعان ءۇش بالاسى قايتىس بولعان. كەيىن كۇيەۋى جۇرەك تالماسىنان كوز جۇمعان. ەكى قىزىمەن پاتەر جالدايتىن جالعىزباستى انا "كارانتين جاعدايىمدى قيىنداتىپ جىبەردى" دەپ شاعىندى.

– ۇنەمى كەلەمىن. كەلگەن سايىن ءوتىنىش جازدىرىپ، قايتارادى. ەشكىم شىقپايدى. بيلىك وكىلدەرى قايدا سوندا؟ ءبىز سەكىلدى انالاردى قاڭعىرتىپ قويىپ، نە ىستەپ ءجۇر؟ مىناداي قاعازدىڭ مىڭىن جازدىم. ەشكىمگە جەتپەيدى. سوندا نەسىنە جازدىرادى؟ قازىر بارادى، بارعان جەرىندە قالادى. ونى قابىلداپ، شەشەتىن جان جوق. جاۋاپ تا كەلمەيدى. كەلسەك وسى ارى وتكىزبەيدى. نە جوعارىداعىلاردىڭ وزدەرى تۇسپەيدى. اندا بار، مىندا بار دەپ شىر اينالدىرىپ قويادى، - دەپ ناليدى ول.

ايەلدەر پرەزيدەنت اكىمشىلىگىنە وتە المادى. ارنايى جاساقتان اق پاراق پەن قالام سۇراپ الىپ، ارىزدارىن ۇكىمەت ۇيىنە باراتىن جولداعى اسفالتتە وتىرىپ جازدى. شاعىمدانعان تۇرعىنداردى بىرنەشە ارنايى جاساق وكىلى مەن پوليتسيا قىزمەتكەرى سىرتتاي باقىلاپ تۇردى.

ەكى ساعاتتاي تۇرىپ، ەشكىم شىقپاعان سوڭ نارازى انالار ەڭبەك مينيسترلىگىنە باردى. ازاتتىق تىلشىسىنە مينيسترلىكتىڭ ءبىر قىزمەتكەرى شىعىپ، شاعىمدانعان ايەلدەردىڭ "اتى-ءجونى مەن جەكە دەرەكتەرىن جازىپ العانىن" حابارلادى. ال كوپ بالالى ايەلدەر "ماسەلەمىز شەشىلمەيىنشە ەشقايدا كەتپەيمىز" دەپ وتىر.

كوكتەمدە قازاقستاندا كوروناۆيرۋس ىندەتىنە بايلانىستى توتەنشە جاعداي ەنگىزىلىپ، كارانتين جاريالانعان. تج كەزىندە كوپتەگەن كاسىپورىندار، كومپانيالار جۇمىسىن توقتاتىپ، ۇكىمەت ۋاقىتشا تابىسسىز قالعاندارعا ناۋرىز-ءساۋىر، كەيىن شىلدە ايىنا - 42 500 تەڭگەدەن، تامىز ايىنا 21 500 تەڭگەدەن جاردەماقى بەرگەن. دەگەنمەن كوپتەگەن ادام قۇجات راسىمدەۋدىڭ قيىندىعىنا، كومەكتىڭ ازدىعىنا شاعىمدانعان.

ساراپشىلاردىڭ ايتۋىنشا، كارانتين ەلدە ميلليونداعان ادامنىڭ الەۋمەتتىك جاعدايىن السىرەتىپ، ايلىعى شايلىعىنان اسپايتىندار ەسەلەپ ارتقان: كەيبىرىنىڭ كاسىبى توقتاسا، كوبى جۇمىسسىز قالعان.

Abai.kz

3 پىكىر