اتىراۋ وبلىسى، ماحامبەت اۋدانى، بەيبارىس اۋىلىندا قاسيەتتى جۇما كۇنى سالتاناتتى جاعدايدا اشىلعان مەشىتتىڭ سىيىمدىلىعى 300 ادامعا شاقتالعان.

مەشىتتىڭ اشىلۋ راسىمىنە ارنايى قاتىسقان باس ءمۇفتي ناۋرىزباي قاجى تاعانۇلى قۇلشىلىق ورداسى – تاربيەنىڭ، رۋحانياتتىڭ مەكەنى ەكەندىگىن اتاپ ءوتتى.

«البەتتە، اللاعا جانە اقىرەتكە شىنايى يمان كەلتىرگەندەر مەشىتتى كوركەيتەدى. مەشىتتىڭ بايلىعى ونىڭ جاماعاتىمەن ولشەنەدى. بەس ۋاقىت ازان شاقىرىلعان جەردە بەرەكە بولادى. اللا تاعالا سول قۇت-بەرەكەنى اۋىلدارىڭىزعا ءناسىپ ەتكەي» دەدى باس ءمۇفتي ناۋرىزباي قاجى تاعانۇلى.

مەشىتتىڭ اشىلۋ ءراسىمى بارىسىندا باس ءمۇفتي ناۋرىزباي قاجى تاعانۇلى بيىل قازاقستان مۇسىلماندارى ءدىني باسقارماسىنىڭ قۇرىلعانىنا 30 جىل تولىپ وتىرعانىن دا تىلگە تيەك ەتتى.

«وسىناۋ مەرەيلى داتا اياسىندا ءمۇفتيات تاريحىمىزدا وتكەن حان، سۇلتان، اۋليە-امبيەلەردىڭ اتىن مەشىتتەرگە بەرۋدى ۇيعاردىق. قاسىم حان بابامىز قازاق حالقىنىڭ ەلدىگىنىڭ باستاۋىندا تۇرعان تاريحي تۇلعا. ءبىز بابامىزعا مەشىت اتىن بەرۋ ارقىلى، جاس ۇرپاققا تاريحي تۇلعالارىمىزدىڭ ەسىمىن دارىپتەپ وتىرمىز» دەدى ناۋرىزباي قاجى تاعانۇلى.

سونىمەن بىرگە، قمدب توراعاسى مەشىتتىڭ تۇرعىزىلۋىنا اتسالىسقان بارشا اۋىل جۇرتشىلىعىنا ريزاشىلىعىن جەتكىزىپ، مەشىتتىڭ قۇرىلىسىنا اتسالىسقان جەرگىلىكتى ازامات تۇرار عالىمجانۇلى باستاعان ءبىر توپ اۋىل تۇرعىندارىنا العىس حات تابىس ەتتى.

سونداي اق، باس ءمۇفتي ناۋرىزباي قاجى تاعانۇلى جۇرتشىلىق الدىندا «قاسىم حان» مەشىتىنىڭ يمامى باعدات كەرەەۆتى تانىستىردى.

قۇلشىلىق ءۇيى ەرلەرگە جانە ايەلدەرگە ارنالعان ناماز وقۋ زالدارىنان، قۇران وقۋ بولمەسىنەن جانە كىتاپحانادان تۇرادى. مەشىت جانىندا سونىمەن بىرگە، اسحانا، يمام ءۇيى، دارەتحانا بار.

Abai.kz