سارسەنبى, 20 قاڭتار 2021
بيلىك 733 0 پىكىر 13 قازان, 2020 ساعات 12:00

سقو-دا بلوكبەكەتتەر قويىلدى

سولتۇستىك قازاقستان وبلىسى مامليۋتكا قالاسى جانە ەسىل اۋدانىنىڭ ورتالىعى ياۆلەنكا اۋىلى 12 قازاندا كارانتينگە جابىلدى. سوڭعى ەكى اپتادا اتالعان ەلدى مەكەندەردىڭ ارقايسىسىندا 16 ادامنان كوروناۆيرۋس انىقتالعان.

دۇيسەنبى كۇنى كارانتيندىك ايماقتاردا بلوكبەكەتتەر ورناتىلدى. تۇرعىنداردىڭ كەشكى ساعات 22.00 مەن تاڭەرتەڭگى ساعات 6.00 ارالىعىندا ۇيلەرىنەن شىعۋىنا شەكتەۋ قويىلدى. مامليۋتكا قالاسىنىڭ رەسەيمەن شەكارادا ورنالاسۋىنا بايلانىستى 100 ورىنعا شاقتالعان كارانتيندىك ستاتسيونار اشىلعان. قازىرگى تاڭدا 58 ادام تەست ناتيجەسىن كۇتىپ جاتىر.

– قالا 14 كۇنگە كارانتينگە جابىلادى. وڭىردە كوروناۆيرۋس جۇقتىرعاندار سانىنىڭ وسۋىنە بايلانىستى وسىنداي شەشىم قابىلداندى. بيزنەس نىساندارى، دۇكەندەر تۇنگى ساعات 11-گە دەيىن ىستەۋشى ەدى. قازىر قاۋلىعا سايكەس 9-عا دەيىن جۇمىس ىستەيدى. الايدا قاتاڭ شەكتەۋ جوق. قوعامدىق كولىك جۇرمەيدى. تاكسيمەن جۇرۋگە بولادى. اۋدان ورتالىعىندا ءۇش مەكتەپ بار. ولار – ونلاين رەجيمدە، ال باستاۋىش سىنىپتار شتاتتىق رەجيمدە جۇمىس ىستەيدى. مەكتەپتەر بۇرىڭعىداي وقۋلارىن جالعاستىرا بەرەدى، – دەدى مامليۋتكا قالاسى اكىمىنىڭ ورىنباسارى الماگۇل رامازانوۆا.

9 قازان كۇنى سقو-دا بۋلاەۆ قالاسى كارانتينگە جابىلعان ەدى. ەكى اپتا ىشىندە مۇندا 24 ادام ۆيرۋس جۇقتىرعان.

قازىر بۋلاەۆ قالاسى، جۇماباەۆ اتىنداعى اۋدان مەن پەتروپاۆل قالاسى اراسىندا جولاۋشىلار تاسىمالى تۇتاس توقتاعان. بۋلاەۆ قالاسى تۇرعىندارىنا تۇندە سىرتقا شىعۋىنا شەكتەۋ قويىلعان. تۇرعىندار كۇندىز جۇمىسقا، دۇكەنگە، دارىحاناعا ەركىن بارا الادى. 65 جاستان اسقان ادامدارعا مۇمكىندىگىنشە ۇيدەن شىقپاۋعا كەڭەس بەرىلگەن. كامەلەت جاسقا تولماعاندارعا كەشكى ساعات 19-دان كەيىن ەرەسەكتەرسىز جۇرۋگە شەكتەۋ قويىلعان. قوناق شاقىرۋعا تىيىم سالىنعان. جەرلەۋ راسىمىنە 30-دان ارتىق ادام قاتىسپاۋى ءتيىس.

مامليۋتكا مەن بۋلاەۆ قالالارى رەسەيمەن شەكارادا ورنالاسقان.

سولتۇستىك قازاقستان وبلىسىندا سوڭعى تاۋلىكتە 11 ادام كوروناۆيرۋس جۇقتىرعان. ناۋرىز ايىنان بەرى ايماقتا 3921 ادامنان كوروناۆيرۋس انىقتالعان، 22 ادام قايتىس بولعان. ايماق ناۋقاستار سانى جاعىنان رەسپۋبليكادا تومەنگى ورىنداردا تۇرعانمەن سوڭعى ۋاقىتتا مۇندا كوروناۆيرۋس جۇقتىرعاندار كوبەيگەنى بايقالادى.

Abai.kz

0 پىكىر