سونىمەن «Nur Otan» پارتياسى وتكىزگەن تۇڭعىش پرايمەريز دوداسى ءوز مارەسىنە جەتتى.

شىنىن ايتۋ كەرەك، بۇل باستاما پارتيا ءۇشىن ۇلكەن سىناق بولدى. باستابىندا ءۇمىت ارتقاندار مەن كۇدىكتەنۋشىلەر يتجىعىس كۇيدە تۇردى.

كەرەمەتى سول، ءۇش كۇن بويعى سايلاۋشىلاردىڭ بەلسەندىلىگى كەرەمەت جوعارى بولدى. ءتىپتى، ولاردىڭ وتىنىشىمەن پارتيانىڭ ورتالىق ۇيىمداستىرۋ كوميتەتى داۋىس بەرۋ مەرزىمىن تاعى ءبىر سوتكەگە ۇزارتۋعا ءماجبۇر بولدى. ۇزارتتى.

ءسويتىپ، كۇدىك سەيىلىپ، ءۇمىت قارا ءۇزىپ العا شىقتى.

مەنشە، «ينتەرنەت جۇيەسىنىڭ كەسىرىنەن داۋىس بەرە الماي قالدى نەمەسە قالدىق!» دەگەن سىلتاۋ مەن ايىپتاۋعا ەش نەزىز جوق. داۋىس بەرۋ العاش باستالعاندا تىعىزدىقتىڭ ارتۋىنا ساي، سايتتىڭ اشىلىڭقىراماي قالعانى شىندىق. ووعان ءبارىمىز ابىرجىدىق. بىراق، بىرتىندەپ ءبارى قالىبىنا كەلدى. جۇرت سارتىلداتىپ داۋىس بەرە باستادى...

ۇمىتكەر رەتىندە ايتايىن، بۇل جاعىنان «Nur Otan» پارتياسى ءوز مىندەتىن تولىق ورىندادى.

ەندى وزا شاپقاندارعا كەلسەك، باس بايگەنى جوو رەكتورلارى مەن ەمحانا جەتەكشىلەرى كوبىرەك الدى. توو جەتەكشىلەرى دە توپ جارۋدان قالىسپادى. سوسىن مەمقىزمەتتە وتىرعان اق جاعالىلار...

سەبەبى، ولاردىڭ ەلەكتوراتى كوپ. وقىتۋشىلارى مەن ستۋدەنتتەرىن، قىزمەتكەرلەرى مەن جۇمىسشىلارىن جابىلتىپ كەپ جىبەرگەندە، شىرقاپ شىعا كەلەتىنى بەلگىلى.

بۇل ەندى بۇكىل دۇنيەجۇزىندەگى سايلاۋ اتاۋلىنىڭ ورتاق دەرتى.

كەشە باۋىرلاس قىرعىز رەسپۋبليكاسىندا پارلامەنت سايلاۋى ءوتتى.

ورتا ازياداعى «دەموكراتيانىڭ ارالشاسى» اتانعان، ەكى بىردەي توڭكەرىستى باستان وتكىزگەن، مىنەزى بولەك، پارتيالار اراسىنداعى باسەكەلستىگى ەڭ جوعارى سول قىرعىز اعايىندارىمىزدىڭ ءوزى «شايلوونۋن شايتان ويۋندارىنان كۋتۋلبادىك!» دەپ، شۋلاپ وتىر.

ءتىپتى اقش-تا بولاتىن پرەزيدەنت سايلاۋىندا سايلاۋشىلار ءوز كانديداتىنا پوشتا ارقىلى داۋىس بەرمەكشى. ترامپتىڭ ءوزى سوعان كۇدىك كەلتىرىپ، نارازى بولىپ جاتىر...

دەمەك، ونىڭ قاسىندا ءبىزدىڭ «Nur Otan» پارتياسى وتكىزگەن پرايمەريزدە رەكتولار مەن ديرەكتورلاردىڭ كوپ داۋىس الۋى – تاڭعالاتىن دۇنيە ەمەس، قالىپتى جاعدايعا اينالعان شارۋا دەپ ويلايمىن.

بىراق، كەلەسى پرايمەريز كەزىندە ونىڭ دا ءتۇيىنى شەشىلەدى دەپ سەنەم.

ال، پرايمەريزگە قاتىسقان مەنىڭ جانە مەنىڭ جەرلەستەرىمنىڭ نەگىزگى ەلەكتوراتى – تاۋەلسىزدىك جىلدارى الىس-جاقىن شەتەلدەردەن كوشىپ كەلگەن قانداستارىمىز ەكەنى شىندىق.

وكىنىشكە وراي، مەنىڭ جەرلەستەرىم پارتيا قاتارىندا وتە از. ءتىپتى، كەيبىر اۋدانداردا جوق دەپ ايتۋعا بولدى. ا، بىراق ولار ساياساتتى سۋشا ساپىرعاندا، اۋىزدىعا ءسوز، اياقتىعا جول بەرمەيدى. مەملەكەت پارتياسىز بولمايدى. پارتيا بولعان جەردە باسەكە بولماي قويماسى تاعى انىق.  نەگە ەكەنىن بىلمەيمىن، ولاردىڭ پارتياعا مۇشە بولعىسى كەلمەيدى. ءبارى دە قازاقتىڭ ءوز قولىمەن قۇرعان پارتياسى عوي، ودان قاشۋدىڭ تۇككە كەرەگى جوق. مىنا پارتيا بولماسا، انا پارتياعا كىرىۋگە بولماي ما؟

بايقايمىن، وسى جولعى پرايمەريز بارىسىندا شەتتەن ورالعان اعايىنداردىڭ سانا-سەزىمىندە زور سەرپىلىس بولدى. «سىزگە داۋىس بەرەم...» دەگەن نەشە جۇزدەگەن قولداۋشىلارىم «اتتەگەن-اي!» دەپ، سان سوعىپ جاتتى.

كەزىندە تۇماعاعا ەرىپ، ارى كەتكەندە، ءبىر وتىز ۇيگە بارعان شىعارمىن. بۇكىل اۋدان مەنى بىلە بەرمەيدى عوي.

سوعان قاراماستان، ەڭبەكشىقازاق اۋدانىنداعى سايلاۋشىلارىمنان 424 داۋىس الىپ، جەرلەستەرىمنەن ءوزىپ كەلگەنىم ءۇشىن، ءوز باسىم ءدان ريزا بولدىم.

ماقتانىشپەن ايتا كەتەيىن، ءوزىم جارىسقا تۇسكەن ەڭبەكشىقازاق اۋدانىندا 9 080 پارتيا مۇشەسى https://vote.primaries.kz ۆەب-سايتى جانە ءموبيلدى قوسىمشا ارقىلى ونلاين داۋىس بەرۋ جۇيەسىنە تىركەلىپ، 8 507 ادام داۋىس بەردى. كورسەتكىش 94 %.

راحمەت سىزدەرگە، ەڭبەكشىقازاقتىق پارتيالاستارم جانە مەنىڭ سىرتتاي تىلەكتەس بولعان اق جۇرەك قولداۋشىلارىم!

«Nur Otan» پارتياسى وتكىزگەن تۇڭعىش پرايمەريز بىزگە نە بەردى؟!

ەندى وسى سۇراق توڭىرەگىندە ءوز تۇيگەنىمىزدى ورتاعا سالايىق.

قاراڭىز، پارتيا ءباسپاسوز قىزمەتىنىڭ مالىمەتىنشە، «Nur Otan» پرايمەريزىنە 11 مىڭعا جۋىق ۇمىتكەر قاتىسىپتى. ەشكىمگە شەكتەۋ قويىلعان جوق. كانديداتتاردىڭ 70%-ى ءوزىن-ءوزى ۇسىنعاندار ەكەن.

پرايمەريز، ەڭ الدىمەن، «Nur Otan» پارتياسى مۇشەلەرىنىڭ ساپاسىن تەكسەردى، كوزقاراسىن انىقتادى. اسىرەسە، 35 جاسقا دەيىنگى جاس مۇشەلەرىنىڭ دەڭگەيىن سىنادى.

تىركەلىپ، ۇگىت-ءناسيحات كەزەڭى باستالعان كۇننەن باستاپ، سول ون ءبىر مىڭعا جۋىق ۇمىتكەر ءوزى تۇرعان اۋىلدىڭ نەمەسە اۋداننىڭ، بولماسا ءوزى اينالىسىپ جاتقان سالانىڭ شەشۋگە ءتيىستى تۇيتكىلدى تۇيىندەرىن بارىنشا تەرەڭ زەرتتەپ، سايلاۋالدى باعدارلامالارى ارقىلى ورتاعا سالدى. دەباتتار ارقىلى ءوزارا پىكىر الماسىپ، ءوز باعدارلامالارىن ودان ارى پىسىقتاي تۇسۋگە مول مۇمكىندىك الدى.

سونداي-اق، ۇمىتكەرلەردىڭ 29%-ى جالىنداعان جاستار ەكەنىن ەسكەرسەك، پرايمەريز سول جاستاردىڭ قولىنان نە كەلەتىنىن، حالىقپەن حالاي جۇمىس ىستەي بىلەتىنىن، مەملەكەتىن قانشالىق سۇيە الاتىنىن ايقىنداپ قانا قويماي، ولاردىڭ ۋاقىت تالابىنا ساي، وزدەرىن تولعاندىرعان جاڭا يدەيالارى مەن كونسترۋكتيۆتى ۇسىنىستارى جارىققا شىعارۋعا زور مۇمكىندىك بەردى.

ءسويتىپ، 11 مىڭعا جۋىق ۇمىتكەر بۇكىل قازاقستاننىڭ ەڭ تۇيتكىلدى ماسەلەلەرىن جىپكە تىزگەن مارجانداي ەتىپ، بۇكىل الەم جۇرتىنىڭ الدىنا جايىپ سالدى. ەل ىشىنەن القىپ ءوتىپ، قازاقستاننىڭ الەمدىك قاۋىمداستىقپەن قاتىناسى تۋرالى دا ءسوز بولدى. قامتىلماعان سالا قالعان جوق! تاعى ول ماسەلەلەردى شەشۋدىڭ ۇتىمدى جولدارىن ۇسىندى.

ارينە، ءار كىم ءار دەڭگەيدە.

ءاربىر ۇمىتكەر كوتەرگەن ۇسىنىس –  سول ءوڭىر، سول سالا بويىنشا حالىقتى قاتتى تولعاندىرىپ وتىرعان وتە ماڭىزدى ماسەلە.

بۇل – ءاتۇستى قارايتىن ماسەلەلەر ەمەس. حالىقتى اشىندىرىپ وتىرعان تۇيتكىلدەر – وسى.

تۇيىندەپ ايتساق، «Nur Otan» پارتياسى پرايمەريز ارقىلى الداعى بەس جىلدا اتقارىلۋعا ءتيىس مەملەكەتتىك باعدارلاما جاساپ بەردى.

وسى ارقىلى «Nur Otan» پارتياسى مۇشەلەرىنىڭ بارلىق جاعىنان دەڭگەيىنىڭ بيىك ەكەنىن كورسەتتى.

مۇشە ساپالى بولسا، پارتيانىڭ بولاشاعى زور دەگەن ءسوز!

پرايمەريزدىڭ جوعارى دەڭگەيدە وتكەنى ءۇشىن، پارتيا توراعاسىنىڭ ءبىرىنشى ورىنباسارى باۋىرجان قىدىرعاليۇلىن جانە ول باسقارىپ وتىرعان ۇجىم مەن بارلىق پارتيالاستارىمدى شىن جۇرەكتەن قۇتتىقتايمىن!

ۇسىنىس:

ءار اۋدان، ءار وبلىس جانە مەملەكەتتىك ماڭىزى بار قالا ءوز ءوڭىرىنىڭ ۇمىتكەرلەرى ورتاعا سالعان سايلاۋالدى باعدارلاماسىنىڭ ءبارىن جيىپ، جۇيەلەپ، ۇكىمەتكە ۇسىنۋى ءتيىس.

ۇمىتكەرلەردىڭ سايلاۋالدى باعدارلامالى نەگىزىندە، ۇكىمەت ءوز تۇجىرىمداماسىن تولىقتىرىپ، الداعى اتقارۋعا ءتيىس جۇمىس باعىتىن ايقىنداي ءتۇسۋى كەرەك!

سوندا عانا پرەزيدەنت قاسىم-جومارت توقاەۆ جولعا قويعان «حالىق ۇنىنە قۇلاق اساتىن مەملەكەت» تۇجىرىمداماسى ءتىپتى دە بەكەمدەلە تۇسپەك!

اۋىت مۇقيبەك،

«ەرەن ەڭبەگى ءۇشىن» مەدالىنىڭ يەگەرى،

قر پرەزيدەنتى جانىنداعى ۇلتتىق قوعامدىق سەنىم كەڭەسىنىڭ مۇشەسى

Abai.kz