سەيسەنبى, 27 قازان 2020
COVID-19 قازاقستاندا. جۇقتىرعاندار — 110542. جازىلعاندار — 105675. قايتىس بولعاندار — 1796
1685 17 پىكىر 28 قىركۇيەك, 2020 ساعات 12:55

ءبىزدىڭ اۋىت...

2016 جىلدىڭ قازان ايىندا «اۋىت مۇقيبەك نۇر-وتان پارتياسىنىڭ ورتالىق اپپاراتىنا جۇمىسقا تۇرادى ەكەن...» -دەگەن ەمىس-ەمەس ءسوز شىعا باستادى.

سول-اق ەكەن، ارىپتەستەرىم ينتەرنەت اقتارىپ، اۋىت مۇقيبەكتىڭ جاعان ماقالالارىن وقۋعا كىرىستى. مەن دە ەكى-ءۇش جازباسىن وقىپ، جاسىراتىنى جوق، تىكسىنىپ قالدىم. اشىنعانى سونشالىق، ەشكىمدى ايامايتىنى كورىنىپ تۇر.

ارىپتەسىم اسقار قۇماربايدى شاقىرىپ، سۇراپ ەدىم «جۇماجان قامكەنوۆيچ، الاڭداماڭىز، مەن جاقسى تانيمىن، ول جامان جىگىت ەمەس. ەكى-ءۇش رەت بىزگە كەلىپ، مينيسترلەر مەن دەاۋتتاردىڭ قابىلداۋىنا كىرگەن. وتە ساۋاتتى ەكەن...» - دەپ، جاقسى مىنەزدەمە بەردى.

«ءوزى اتاقتى اقىن تۇمانباي مولداعاليەۆتىڭ قاسىندا جۇرگەن شاكىرتى بولسا،  اقورداعا دەيىن كىرىپ، ماحمۇت قاسىمبەكوۆپەن سويلەسىپ شىقسا، ەندى پارتيا توراعاسىنىڭ ءبىرىنشى ورىنباسارى مۇحتار قۇل-مۇحاممەدتىڭ ءوزى جۇمىسقا الىپ وتىرسا، قالاي جامان جىگىت بولادى؟"-دەپ ويلادىم ءوزىم دە.

كوپ وتپەي، بۇل ءسوز شىندىققا اينالدى. اۋىت مۇقيبەك پارتيانىڭ ورتالىق اپپاراتىنا ەمەس، مەن جەتەكشىلىك ەتەتىن رەسپۋبليكالىق قوعامدىق قابىلداۋ بولمەسىنە كونسۋلتانت بولىپ ورنالاستى.

ۇجىمعا تانىستىرىپ، وتىراتىن ورنىن بەلگىلەپ بەردىك. ءارى قاراي رەسپۋبليكالىق قوعامدىق قابىلداۋ بولمەسىنىڭ جۇمىسى جايلى اقپارات بەرىپ، ىشكە تارتا باستادىم.

ەكى-ءۇش كۇن وتكەن سوڭ بولسا كەرەك، سول ۋاقىتتا، قازاقستان رەسپۋبليكاسى ىشكى ىستەر ءمينيسترىنىڭ ءبىرىنشى ورىنباسارى، پوليتسيا گەنەرال-مايورى ەرلان تۇرعىمباەۆ رەسپۋبليكالىق قوعامدىق قابىلداۋ بولمەسىنە كەلىپ، جازىلعان ازاماتتارمەن جەكە-جەكە كەزدەسىپ، قابىلداۋ وتكىزدى.

قابىلداۋدى ءساتتى اياقتادى. ەندى ەرلان زامانبەكۇلىن شىعارىپ سالۋىم كەرەك. پوليتسيا گەنەرالىن ەرتىپ، زالدا كەلە جاتقام. كوريدوردا ءبىزدىڭ اۋىت كەزدەسە كەتتى دە: «و، مەنىڭ ەراعام ءجۇر عوي مۇندا. اسسالاۋماعالايكۋم، ەراعا!» - دەپ،  داۋىستاي كەلىپ، قۇشاقتاسىپ امانداسا كەتتى. ەرلان زامانبەكۇلى دا جىلى شىرايمەن قۇشاقتاسىپ، اماندىق سۇراپ جاتىر.

«اعا، مەن پارتياعا جۇمىسقا تۇردىم، مىنە، بۇگىن ءۇشىنشى كۇن...» دەپ قويادى اۋىت مىرزا. مەن ءبىر جاقتا قالدىم، ەندى ەكەۋى قولتىقتاسقان كۇيى ءمينيستردىڭ ماشيناسىنا دەيىن بارىپ، قوشتاستى. نە دەرىمدى بىلمەيمىن، ءۇنسىز بۇرىلدىم دا كابينەتىمە كەتتىم.

نەگىزى، مۇنداي جاعداي ءبىزدىڭ قوعامدىق قابىلداۋ بولمەسىندە ءومىرى بولعان ەمەس. بەكىتىلگەن كەستە بويىنشا، ءماجىلىس دەپۋتاتتارى، مينيسترلەر مەن ولاردىڭ ورىنباسارلارى، باس پروكۋروردىڭ ورىنباسارلارى رەتىمەن كەلىپ، پارتيانىڭ قوعامدىق قابىلداۋ بولمەسىندە ازاماتتارمەن قابىلداۋ وتكىزەدى.

ءاربىر قابىلداۋدى ۇيىمداستىرۋعا بىردەن قىزمەتكەر بەكىتىلگەن. كەلگەن باسشىنى سول قىزمەتكەر ەكەۋمىز كۇتىپ الىپ، قابىلداۋ بىتكەن سوڭ ءوزىم شىعارىپ سالامىن. قالعان قىزمەتكەرلەر كابينەتتەرىندە وتىرىپ، ءوز جۇمىستارىمەن اينالىسادى. ونداي كەزدە زالدا ارتىق ءجۇرىس دەگەن بولمايدى...

مىنە، سول ءتارتىپتى جۇمىسقا ورنالاسقانىنا ءبىر اپتا بولماي جاتىپ، ءبىزدىڭ اۋىت مىرزا بۇزدى.

اۋىت مۇقيبەكتىڭ بۇل ارەكەتى قىزمەتتەستەرىنە ونشا ۇناعان جوق. كەيبىر ارىپتەستەرى «سۋبورديناتسيانى ساقتامادى!» دەپ، بىرازعا دەيىن كۇبىرلەپ ءجۇردى.

«تۇرعىنباەۆپەن امانداسۋ» - اينالايىن ەكەن، ەندى ءبىزدىڭ اۋىت مىرزا ءبىر كۇنى كەلىپ، «جۇماجان اعا، ىشكى ىستەر ءمينيسترى قالمۇحانبەت قاسىموۆ بىزدە قابىلداۋ وتكىزەدى ەكەن. مەن سوعان كىرۋىم كەرەك. سەبەبى، تۇراقتى تىركەۋگە تۇرۋدا ىشكى ىستەر ورگاندارى شەتەلدەن كوشىپ كەلگەن قانداستارىمىزدان "سوتتالمادى" دەگەن انىقتاما تالاپ ەتىپ جاتىر. قىتاي تارابى ونداي انىقتاما بەرمەيدى. سوندان زارداپ شەگىپ وتىرعان ءبىر ازاماتتى مينيسترگە الىپ كىرىپ، ماسەلەنى سونىڭ ءوز اۋزىنان ايتقىزام!» - دەيدى.

شىنى كەرەك، «Nur Otan» پارتياسىنا ازاماتتاردان كەلىپ جاتاتىن ءار ءتۇرلى مازمۇنداعى حاتتاردا ەسەپ جوق. سونىڭ باسىم  بولىگىن وسى قانداستارىمىزدان كەلگەن وتىنىشتەر قۇرايتىن. ونىڭ تۇگەلگە جۋىعى قۇجاتتانۋ ماسەلەسىنە بايلانىستى بولاتىن. ءبىز ول وتىنىشتەردى تىركەپ، بەلگىلەنگەن ءتارتىپ بويىنشا قۇزىرلى ورگاندارعا جىبەرەمىز. كوبى، زاڭنامالاردى تۇسىندىرگەن جاۋاپتارمەن عانا شەكتەلەتىن... قىسقاسى، كوشى-قوننىڭ شۋى وتە كوپ بولاتىن. مىنە، ءبىزدىڭ اۋىتتىڭ  «سۋبورديناتسيانى» تاعى دا بۇزىپ، سول ماسەلەنى شىنداپ شەشۋگە بىلەك ءتۇرىپ كىرىسكەنى كورىنىپ تۇر. تاعى ءبىر جاعىنان «پارتيا توراعاسىنىڭ ءبىرىنشى ورىنباسارى مۇحتار ابرارۇلى دا وسى تۇيىنگە باسا نازار اۋدارىپ، ماسەلەنى تۇبەگەيلى شەشۋدى كوزدەگەن شىعار. سول ءۇشىن دە بۇل ماسەلەنىڭ جاي-جاپسارىن جاقسى بىلەتىن جىگىتتى جۇمىسقا العان بولۋى كەرەك...»، - دەپ ويلادىم دا، اۋىت مىرزاعا «كىر! بىراق ءمينيستردىڭ قابىلداۋىنا كىرەتىن ازاماتتى ءوزىڭ تاۋىپ، دۇرىستاپ دايىندا!»، - دەپ تاپسىرما بەردىم.

بەلگىلەنگەن كۇنى ىشكى ىستەر ءمينيسترى قالمۇحانبەت قاسىموۆ كەلدى. ازاماتتاردى قابىلداۋ باستالدى. كەزەگى كەلگەندە ون جاس شاماسىنداعى كىشكەنە قىز بەن ءوزى قۇرالپاس ءبىر جىگىتتى ەرتىپ ءبىزدىڭ اۋىت كىردى.

«قۇرمەتتى قالمۇحانبەت نۇرمۇحانبەتۇلى، بۇل جىگىتتىڭ اتى-ءجونى – اۋىت مۇقيبەك. ءوزى اقىن. ءبىزدىڭ «Nur Otan» پارتياسىنىڭ وسى قوعامدىق قابىلداۋ بولمەسىندە كونسۋلتانت بولىپ قىزمەت ىستەيدى»-دەپ، قىسقاشا تانىستىرىپ، اۋىت مىرزاعا ءسوز بەردىم.

سىپايى امانداسىپ، وتىردا دا اۋىت مىرزا ءسوزدى باستادى. «قۇرمەتتى قالەكە، مىناۋ مەنىڭ «كوش، كوشكە كىم ءوش؟!» دەگەن كىتابىم. سىزگە ارناپ قولتاڭبا جازىپ اكەلدىم. ىشىندە ءسىز تۋرالى دا ءبىراز ءسوز بار!»-دەپ، مينيسترگە كىتابىن ۇسىندى. ارى قاراي، «قالەكە، مىناۋ "سوتتىلىق تۋرالى" انىقتاماڭىز قانداستارىمىزدىڭ قانىن ءىشىپ بولدى. ءوزىڭىز دە حاباردار بولارسىز، وتكەن جىلى ماجىلىستە كوشى-قون زاڭى تالقىلانعان كەزدە وسى بالەنى الىپ تاستاۋ كەرەك ەدى. ۇكىمەت قۇپتامادى. مىنە، سونىڭ كەسىرىنەن قىتايدان كەلگەن قانداستارىمىز تۇراقتى تىركەۋگە تۇرا الماي، اكىمشىلىك جاۋاپقا تارتىلىپ، سوتتىڭ شەشىمىمەن ولار كەلگەن ەلىنە قايتارىلىپ جاتىر. مىنە، سونداي ازاماتتىڭ ءبىرى – مىنا توعىز جاسار مەيىرگۇل. اتا-اناسىن بەس جىل كەلە المايتىن ەتىپ، ءسىزدىڭ كوشى-قون پوليتسياسى قىزمەتكەرلەرىڭىز قىتايعا قۋىپ جىبەرىپتى!»-دەدى.

سول-اق ەكەن، قولىندا ءوتىنىشى بار مەيىرگۇل اتتى كىشكەنە قىز ءمينيستردىڭ جانىنا كەلدى دە، «قالمۇحانبەت اتا! ءسىزدىڭ دە مەن سەكىلدى نەمەرەڭىز بار شىعار...»-دەپ باستاپ، ءوز جاعدايىن ايتىپ، تاقىلداي جونەلدى.

مينيستر قالمۇحانبەت نۇرمۇحانبەتۇلى قىزدىڭ قولىنان ءوتىنىشىن الدى دا بۇرىشتاما جازىپ، ەرتىپ كەلگەن ءبىر قىزمەتكەرىنە شەگەلەپ تۇرىپ تاپسىرما بەردى.

سويتسەك، ءىس مۇنىمەن بىتپەپتى. ءبىزدىڭ اۋىت مەيىرگۇلدى، الگى ءسوزىن تۇگەل ايتقىزىپ، ۆيدەوعا ءتۇسىرىپتى جانە «مەيىرگۇلدىڭ حاتى قاسىموۆتى قالتىراتىپ جىبەردى» دەگەن ماقالا جازىپتى دا «Abai.kz» سايتىنا شىعارىپ جىبەرىپتى. قاسىموۆ قابىلداۋىن اياقتاپ بولماي، مەيىرگۇل تۋرالى اقپارات ينتەرنەتكە شىعىپ بولىپتى. سول كۇننەن باستاپ باق شۋلادى دا كەتتى...

قالەكەڭ ازامات قوي، سوتتىڭ شەشىمىن بۇزعىزىپ، كوپ وتپەي مەيىرگۇلدىڭ اتا-اناسىن قازاقستانعا قايتا ورالتتى. سوڭىنان قالماي ءجۇرىپ، اقىرى «سوتتىلىق تۋرالى» انىقتامانىڭ كوزىن جوعالتتى ءبىزدىڭ اۋىت...

ەندى ەڭبەك جانە حالىقتى الەۋمەتتىك قورعاۋ ءمينيسترى ءمادينا ابىلقاسىموۆا ازاماتتاردى قابىلداۋعا كەلدى. قىتايدان كەلگەن التى-جەتى اقساقالدى ەرتىپ، ءبىزدىڭ اۋىت وعان دا كىردى. ماقساتى – قىتاي مەن موڭعوليادان ورالعان زەينەت جاسىنداعى قانداستارىمىزدىڭ زەينەتاقى ماسەلەسىن شەشپەك.

ادەتتەگىدەي، اقساقالداردىڭ بىرەۋى زەنەتاقىسىنىڭ نەبارى ون ەكى-اق مىڭ تەڭگە ەكەنىن ايتىپ، مينيسترگە جازباشا ءوتىنىشىن بەردى. اۋىت مىرزا دا ولاردىڭ جاعدايىن ودان ءارى تاپتەشتەپ ءتۇسىندىرىپ، كىتابىن ۇسىندى. قابىلداۋ اياقتاپ، قوشتاسىپ جاتقاندا، الگى اقساقالدىڭ بىرەۋى ورنىنان تۇردى دا، «ءاي، ءمادينا قىزىم، توقتاشى! ءبىز مىناۋ قىتايدا ءجۇرىپ، اۋدان اكىمىنىڭ قابىلداۋىنا كىرىپ كورگەن جان ەمەسپىز. ءوزىڭ ءبىر بولايىن دەپ تۇرعان جاپ-جاس قىز ەكەنسىڭ. ءبىزدىڭ دە سەن سەكىلدى قىزدارىسمىز بار. پەنسياڭدى بەرسەڭ بەرەرسىڭ، بەرمەسەڭ قويارسىڭ. مەن ساعان ريزا بولىپ وتىرمىن، ءبىز سەكىلدى الىستان كەلگەن ادامنىڭ باتاسى تەز قابىل بولادى. قاراعىم، قولىڭدى جايشى، ءبىر باتامدى بەرەين ساعان!»-دەپ، قولىن جايىپ، باتا بەرسىن اقساقال.

قولدى جايىپ ءبىز دە وتىردىق تا قالدىق. كاريا باتاسىن ۇزاق جاسادى. ءبىز ەستىمەگەن جاپ-جاڭا باتا. مولدىرەگەن مارجانداي سوزدەردەن قۇراستىرىلعان ۇزاق باتا ءبارىمىزدى تەبىرەنتىپ جىبەردى.

اسەرلەنگەنى سونشالىق، ءمادينا ەراسىلقىزى جۇگىرىپ بارىپ، اقساقالداردىڭ ءبارىنىڭ قولىن الىپ، قوشتاسىپ جاتىر. «اتالار، الاڭداماڭىزدار،  ماسەلەلەرىڭىز شەشىلەدى!»، - دەپ جاتىر مينيستر... باياعى ءبىزدىڭ اۋىتتىڭ «ستسەناريى» ەكەنى كورىنىپ تۇر.

ايتقانداي، بۇل ماسەلە دە شەشىلدى. «قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» زاڭىنا شەتەلدەن ورالعان قانداستارىمىزدىڭ كەلگەن ەلىندەگى ەڭبەك قىزمەتى ەسەپكە الىناتىن ەتىلىپ تولىقتىرۋ ەنگىزىلىپ، 2018 جىلدىڭ ءبىرىنشى قاڭتارىنان باستاپ، قولدانىسقا ەنگىزىلدى.

سودان باستاپ، «سۋبورديناتسيا» جايىنا قالدى. ءبىزدىڭ اۋىت رەسپۋبليكالىق قوعامدىق قابىلداۋ بولمەسىنە كەلگەن مينيسترلەر مەن دەپۋتاتتاردىڭ بارىنە كىرىپ شىقتى.

پارتياعا ازاماتتاردان توقتاۋسىز حاتتار كەلىپ جاتادى دەدىك قوي. ءبىر كەزدە قانداستارىمىزدان «ورالمان كۋالىگىمنىڭ مەرزىمىن وتكىزىپ الىپ، ازاماتتىققا قۇجات تاپسىرا الماي ءجۇرمىن...» نەمەسە «قازاقستان ازاماتتىعىن الىپ ەدىم، قىتاي ەلشىلىگى قىتاي ازاماتتىعىنان شىعارۋ تۋرالى ءوتىنىشىمدى قابىلداماي جاتىر...» دەگەن سەكىلدى مازمۇنداعى ءبىر قالاپپەن جازىلعان ۇپ-ۇقساس حاتتار جاڭبىرداي جاۋىپ كەتەدى. ءبىز ول وتىنىشتەردى تىركەپ، قاتىستى مينيسترلىكتەرگە جونەلتىپ جاتامىز. قانداستارىمىزدىڭ وسىنداي ماسەلەسىن شەشۋ ءۇشىن سول حاتتاردى ءبىزدىڭ اۋىتتىڭ ۇيىمداستىرىپ وتىرعانىن دا ىشتەي سەزەم. رەتى كەلگەندە ونداي حاتتاردىڭ ۇلگىسىن قانداستارىنا ءوزى جازىپ بەرىپ، «WhatsApp» الەۋمەتتىك جەلىسى ارقىلى تاراتىنىن اۋىت مۇقيبەكتىڭ ءوزى ايتادى ماعان.

باسقا ءسوز ايتپايمىن. تەك، تۇيتكىلدى ماسەلەنى شۋلاتباي شەشۋدىڭ بۇل دا ءبىر تاپتىرماس جولى ەكەنىن ىشتەي ءتۇسىنىپ، اۋىت باۋىرىمنىڭ ارقاسىنان ءۇنسىز عانا قاعىپ قويام...

ايتپاقشى، اۋىت ءىنىم جۇمىسقا تۇرعان سوڭ، شاماسى ەكى اي وتكەندە، مەنىڭ كابينەتىمە كىرىپ، «اعا، كورىپ شىعىڭىزشى!»-دەپ، ءبىر حات بەرىپ كەتتى. قاراسام، اۋىت مىرزا «كوش كولىكتى بولسىن!» رەسپۋبليكالىق اكتسياسى اياسىندا كوشى-قون ماسەلەلەرى بويىنشا ازاماتتاردى تاقىرىپتىق قابىلداۋدىڭ «تۇجىرىمداماسىن» جاساپتى. مەنىڭ اتىما حات جازىپ، سول «تۇجىرىمدامانى» پارتياىڭ ورتالىق اپپاراتىنىڭ جىلدىق جەلىلىك كەستەسىنە ەنگىزۋدى ءوتىنىپتى.

«تۇجىرىمداما» – وتە كەمەلدى، ساۋاتتى جازىلعان. قاتتى قۋاندىم. ول كەزدە پارتيادا «جول ۇستىندە قابىلداۋ»، «ادىلەت كەڭەس بەرەدى» قاتارلى بىرنەشە رەسپۋبليكالىق اكتسيالار وتكىزىپ وتىراتىن ءداستۇرىمىز بار ەدى. ءىنىمنىڭ ءسوزىن ەكى ەتپەي، باسشىلىققا ايتىپ، اتالعان «تۇجىرىمدامانى» «Nur Otan» پارتياسىنىڭ جىلدىق جوسپارىنا ەنگىزدىك تە قاتىستى مينيسترلىكتەردىڭ باسشىلارىن،  مەملەكەتتىك ەمەس ۇيىمداردىڭ وكىلدەرىن جانە قانداستارىمىزدى قاتىستىرا وتىرىپ، ءتورت مارتە رەسپۋبليكالىق «كوش كولىكتى بولسىن!» اكتسياسىن وتكىزدىك. ءالى ەمسىمدە، ءبىرىنشى اكتسيانى  پارتيانىڭ الماتى قالالىق فيليالىندا وتىرىپ، جۇرگىزدىم. اتالعان اكتسيانىڭ كوشى-قون ماسەلەلەرىن شەشۋدەگى جانە قانداستارىمىزدىڭ بيلىك پارتياسىنا دەگەن تانىمىن تەرەڭدەتە تۇسۋدەگى، ءتىپتى دە جاقىنداتا تۇسۋدەگى ءرولى ەرەكشە جاقسى بولدى.

اۋىت مۇقيبەك ەلۋ جاسقا تولعاندا ەلباسى نۇرسۇلتان نازارباەۆ ارنايى قۇتتىقتاۋ حاتىن جىبەردى.

سول حاتىندا تۇڭعىش پرەزيدەنت نۇرسۇلتان ءابىشۇلى «سونداي-اق جۇرتشىلىق ءسىزدى شەت ەلدەردە تۇراتىن قانداستارىمىزدىڭ قازاق توپىراعىنا ورالۋىنا شاناشىرلىق ءبىلدىرىپ، وسى ورايدا ۇشىراساتىن قيىندىقتاردىڭ وڭتايلى شەشىلۋىنە بەلسەنە اتسالىسىپ جۇرگەن ازامات رەتىندە دە قادىرلەيدى» - دەدى.

ال، سول كەزدەگى پارتيا توراعاسىنىڭ ءبىرىنشى ورىنباسارى، قازىرگى قر پارلامەنتى سەناتىنىڭ توراعاسى ماۋلەن اشىمباەۆ ءوزىنىڭ قۇتتىقتاۋىندا «ءسىزدى حالىق ەلباسى، پارتيا توراعاسى ن.ءا.نازارباەۆتىڭ كوشى-قون ساياساتىنىڭ ءوز دەڭگەيىندە ورىندالۋىنا ەرەكشە ات سالىسىپ جاتقان ازامات رەتىندە جاقسى تانيدى» دەي كەلىپ، تاعى «Nur Otan» پارتياسىنىڭ رەسپۋبليكالىق قوعامدىق قابىلداۋ بولمەسىندە جۇمىس ىستەي ءجۇرىپ، كوشى-قون ماسەلەلەرى بويىنشا ازاماتتاردى تاقىرىپتىق قابىلداۋدىڭ ارنايى تۇجىرىمداماسىن دايىنداعان ەڭبەگىڭىزدى ايىرىقشا اتاپ وتكىم كەلەدى. بۇگىنگى تاڭدا بۇل تۇجىرىمداما پارتيانىڭ رەسپۋبليكالىق جەلىلىك كەستەسىنە ەنگىزىلدى»-دەپ، اۋىت مۇقيبەكتىڭ بۇل ەڭبەگىن وتە جوعارى باعالادى.

ءسوزىمدى قورتىندىلاسام، «Nur Otan» پارتياسى اۋىت مۇقيبەكتىڭ كوسىلىپ جۇمىس ىستەۋىنە مول مۇمكىندىك بەردى. ءبىز دە ونىڭ بەتىنەن قاققان جوقپىز، ول دا پارتيا ۇستانىمىنا تەز يكەمدەلىپ، قامشى سالدىرماي قىزمەت ەتتى. ۇجىمعا بىردەن ءسىڭىپ كەتتى. قاتىپ قالعان ەسكى توڭدى ءجىبىتىپ، پارتيادا جۇمىس ىستەۋدىڭ جاڭا ۇلگىسىن كورسەتتى. كوشى-قونننىڭ ءوزى سوڭىنا تۇسكەن بارلىق ماسەلەسىن شەشتى. جۇمىسقا العان مۇحتار قۇل-مۇحاممەدتىڭ دە، ءبىزدىڭ دە ءۇمىتىمىزدى ابىرويمەن اقتادى...

مىنە، ءبىزدىڭ اۋىتتىڭ پرايمەريزگە قاتىسىپ، ءماجىلىس دەپۋتاتتىعىنا ۇمىتكەر بولعىسى كەلىپ جاتقانىن كورىپ، ۇيدە تاقىم قىسىپ وتىرمىن.

مەنىمشە، ءبىزدىڭ اۋىت ءماجىلىس دەپۋتاتى بولۋعا داپ-دايىن تۇلعا!

جۇماجان جۇكەنوۆ،

«Nur Otan» پارتياسىنىڭ مۇشەسى، «پاراسات» جانە  «قۇرمەت» وردەندەردىڭ يەگەرى، پارتيا ارداگەرى

Abai.kz

17 پىكىر