سەيسەنبى, 27 قازان 2020
COVID-19 قازاقستاندا. جۇقتىرعاندار — 110684. جازىلعاندار — 105766. قايتىس بولعاندار — 1796
46 - ءسوز 1984 11 پىكىر 25 قىركۇيەك, 2020 ساعات 14:39

ايماعامبەتوۆتى اياقتان شالمايىق!

ءبىلىم جانە عىلىم مينسترلىگىنە اسحات ايماعامبەتوۆ كەلگەلى ءبىلىم سالاسىندا ءبىراز وزگەرىستەر بولدى. سونىڭ ءبىرى رەتىندە «ساۋات اشۋ» دەگەن دۇرەگەي اتاۋدىڭ قۇربانى بولىپ كەتكەن 100 جىلدىق تاريحى بار «الىپپە» اتاۋىنىڭ حالىقپەن قايتا قاۋىشتىرعانىن اتاۋعا بولادى. «حالىق قالاسا حان تۇيەسىن سويادى» دەگەندەي، حالىقتىڭ تالابىن ەسكەرىپ، الىپپە اتاۋىن قايتا تىرىلتكەنى ءۇشىن جۇرتىشىلىقتىڭ ايماعانبەتوۆقا العىسى شەكىسىز.

ەكىنشى تۇرعىدان العاندا، وقتىۋشىلاردىڭ جالاقىسى كوتەرىلدى. ارينە، ۇستازداردىڭ ايلىعى قازىر جوعارى دەپ ايتا المايمىن، بىراق بۇرىنعىمەن سالىستىرعاندا ءوستى. باسقاسىن بىلمەيمىن، قاي مەملەكەت بولسا دا، ۇستازدار مەن دارىگەرگەرلەردىڭ جالاقىسى جوعارى بولۋى كەرەك. قازاقستان بۇل ماسەلەگە ءالى دە باسا نازار اۋدارۋى كەرەك دەپ ويلايمىن.

ۇشىنشىدەن، ايماعامبەتوۆتىڭ اتى بار، زاتى جوق، ديپلوم ساتاتىن جوعارى وقۋ ورىندارىن جابۋعا ارەكەت جاسادى. ءبىر ءبولىمىن جاپتى دا. بۇل تۋرالى مەملەكەت باسشىسى توقايەۆ تا الدە نەشە مارتە ايتقان. ساتىنە باسقاندا «كەرەككە تەرەك جىعىلىپ»، توقايەۆتىڭ تاپسىرماسىنا ايماعامبەتوۆتىڭ باتىل قادامى ءدوپ كەلدى. سونىمەن، كەيبىر جەكە مەنشىك وقۋ ورىندارى جابىلدى، كەيبىرى جابىلۋ الدىندا تۇر. «داۋدىڭ باسى دايرابايدىڭ كوك سيىرى» دەگەندەي، وسى ىستەن سوڭ ايماعامبەتوۆقا شۇيلىككەندەر كوبەيدى. ولاردىڭ اراسىندا دەپۋداتتار دا بار. انشەيىن دە ەلدىڭ تاعدىرى، جەتكىنشەكتەردىڭ قامى ءۇشىن ءماۋ دەمەيتىن، ءتىپتى حالىق اتىن دا بىلمەيتىن كەيبىر دەپۋداتتار ورە تۇرەگەلىپ، ايماعامبەتوۆقا ايقايلاپ شىقتى. ءبىلىم جانە عىلىم مينيسترلىگىن سىنادى، جوق جەردەن سىلتاۋ ىزدەپ، ايماعامبەتوۆتىڭ «اياعىن شاعۋعا» تىرىستى. نەگە؟ سەبەبى جابىلعان جانە جابىلعالى تۇرعان كەيبىر جەكە مەنشىك وقۋ ورىندارىنىڭ دەنى سول دەپۋدات، مينيسترلەردىكى نەمەسە سونى اشقان قالتالىلارعا «كوكە» بولىپ وتىرعاندار. تەگىن كەلىپ جاتقان اقشانى ايماعامبەتوۆ ويلاماعان جەردەن كەسىپ تاستاعان سوڭ، تۋلاماي قايتسىن، جوق جەردەن جىك شىعارىپ، ايماعامبەتوۆكە شۇيلىگىپ جاتىر. بۇل تۇسپالىمىز وتىرىك بولسا نەگە ايعاي كوبەيىپ كەتتى؟! ال حالىق ايماعامبەتوۆتى قولداپ وتىر.

تورتىنشىدەن، ايماعامبەتوۆ كەلگەلى جوعارى وقۋ ورىندارىندارىنداعى جەڭ ۇشىنان جالعاسقان جەمقورلىق ازايىپ كەلەدى. ءبىر مىسال ايتايىن: مەنىڭ ءبىر دوسىم وسىدان بۇرىن 3 رەت ماگيستراتۋراعا ەمتيحان تاپسىرىپ، وقۋعا تۇسە المادى. ەمتيحاننان وتەدى، بىراق سوڭىندا جوعارى جاقتا كوكەسى، وقۋ ورنىندا تانىسى، ونان دا ماڭىزدىسى، الدە كىمدەرگە بەرەتىن 2000 دوللارى جوق بولعان سوڭ، تۇسە الماعان. ال بيىل ونلاين ەمتيحان تاپسىردى، 101 ءنومىر الىپ، كازگۋ-گە وقۋعا ءتۇستى. ەشكىمگە ءبىر تيىن اقشا بەرگەن جوق، ەشكىمدى ىزدەگەن جوق. مىنە بۇل دا ءبىلىم سالاسىنداعى تاعى ءبىر وڭ وزگەرىس.

سوندىقتان، ءبىز ايماعامبەتوۆتى قولدايمىز. ونىڭ ءتىپتى دە باتىل قادامدار جاساپ، ءبىلىم سالاسىنداعى بىلىق پەن شىلىقتى جوعالتىپ، وڭ وزگەرىستەر جاساۋىن شىن جۇرەكتەن ءۇمىت ەتەمىز. بيىلىك تە ءوز مۇدەسى ءۇشىن ايماعامبەتوۆتىڭ ارتىنان شام الىپ ءتۇسىپ جۇرگەندەردىڭ ايتاعىنا ەرىپ، ايماعامبەتوۆتى ورنىنان الىپ تاستاماي، قولىنان ءىس كەلەتىن جىگىتكە ۋاقىت بەرۋ كەرەك.

مەن مۇنى ايماعامبەتوۆقا جاعىمسىپ جازىپ وتىرعام جوق. ول جىگىتتى باق-تان كورگەنىم بولماسا، تانىمايمىن. بىراق ىستەگەن ىستەرى كوكەيگە قونىمدى. ۇلتىمىزدىڭ بولاشاعى، ۇرپاقتارىمىزدىڭ ەرتەڭى ءۇشىن ونى قولدايمىن. ال سىزدەر نە دەيسىزدەر؟!

قالياكبار ۇسەمحاننىڭ الەۋمەتتىك جەلىدەگى جازباسى

Abai.kz

11 پىكىر