سەيسەنبى, 27 قازان 2020
COVID-19 قازاقستاندا. جۇقتىرعاندار — 110542. جازىلعاندار — 105675. قايتىس بولعاندار — 1796
ايماق 1489 7 پىكىر 25 قىركۇيەك, 2020 ساعات 13:23

جۇيە دەموكراتيالانا تۇسسە، جۇرت وعان سەنۋگە ءازىر...

كەز-كەلگەن ساياسي پارتيا ءۇشىن حالىقتىڭ سەنىمىنەن ارتىق بايلىق جانە بەدەل جوق. «Nur Otan» ەلىمىزدەگى جەتەكشى ساياسي پارتيا رەتىندە تۇرعىنداردىڭ ءابسوليۋتتى قولداۋىنا يە. دەگەنمەن، ءار وڭىردە دەڭگەي ءارتۇرلى.

ساراپشىلار مۇنى وڭىرلەردەگى فيليالداردىڭ بەلسەندىلىگىمەن تىكەلەي بايلانىستىرادى. وسى رەتتە، قازاقستانداعى بىلىكتى ساياساتتانۋشىلاردىڭ بىرەگەيى ايدوس سارىم مىرزامەن سۇحبات جۇرگىزدىك.

- ايدوس مىرزا، اۋەلى الماتى قالاسىنداعى پرايمەريزگە قاتىسۋشىلاردىڭ بەلسەندىلىگى تۋرالى باعاڭىزدى بەرسەڭىز. قانشا دەگەنمەن، ءوزىڭىز وسى قالانىڭ تۇرعىنىسىز.

- الماتىلىق كانديداتتاردىڭ بەلسەندىلىگى جوعارى. بايقاعانىم بەلسەندىلەر اقپاراتتىق تەحنولوگيانىڭ تەتىكتەرىن ءتيىمدى پايدالانۋدا. ءاربىر كەزدەسۋلەرى تۋرالى الەۋمەتتىك جەلىگە جاريالاپ، ارتىنشا بەينەماتەريال ازىرلەپ، ءتىپتى ساراپتاما جاساپ جاتقاندارى دا بار. وسى تۇرعىدان العاندا الماتىداعى پرايمەريزگە قاتىسشۋلاردىڭ بەلسەندىلىگىن جوعارى باعالايمىن.

- «Nur Otan» پارتياسىنىڭ الماتى قالالىق فيليالى پرايمەريزدى قاي دەڭگەيدە ۇيىمداستىرۋدا. سىرتتاي باقىلاپ ءجۇرسىز بە؟

- مەن ءوزىم 2-3 كانديداتتى قولداپ، كەزدەسۋلەرىنە قاتىسىپ ءجۇرمىن. سەبەبى ولار قوعامنىڭ قولداۋىنا جانە ساياساي ءارى الەۋمەتتىك ورتادا بەلسەندى. مەنىڭ ويىمشا، ەڭ كوپ كەزدەسۋ وتكىزگەن ادام، حالىقتى سەندىرە سويلەگەن ادام كوپ داۋىسقا يە بولادى. ال، قالالىق فيليال ساياسي ناۋقانعا ساقاداي ساي دەپ ەسەپتەيمىن. ەڭ باستىسى حالىقپەن ارادا جاقسى ناسيحات جۇرگىزگەن. سەبەبى، كەزدەسۋلەرگە بارعاندا قاراپايىم ازاماتتار پرايمەريزدىڭ نە ەكەنىن، نە ءۇشىن ءوتىپ جاتقانىن ايتپاي-اق ءتۇسىنىپ وتىر.

- پرايمەريز باستالعالى ءارتۇرلى ءاجۋا اڭگىمەلەر كوبەيىپ كەتكەنى راس. بۇل وسىناۋ ساياسي دوداعا دەگەن سەنىمگە سەلكەۋ تۇسىرمەي مە؟ جالپى قوعامدا ەش نارسەگە سەنبەيتىن، بىراق ەشقانداي ارەكەت جاسامايتىن توپتار كوبەيىپ كەتتى دەپ ويلامايسىز با؟

- ءبىزدىڭ قوعام ءتىرى قوعام عوي جانە مۇمكىندىك ىزدەپ وتىرعان قوعام. وسى تۇرعىدان العاندا پرايمەريز ۇلكەن مۇمكىندىك. جاقسى بولسىن جامان بولسىن 11 مىڭ ادام دوداعا ءتۇسىپ وتىر. ونىڭ ىشىندە 78 پايىزى وسى ۋاقىتقا دەيىن «Nur Otan»دا  بولماعان ادامدار.

- دەمەك، كەرىسىنشە وزگەرىستى قالايتىن، پارتيانىڭ باستاماسىنا شىن ىقىلاسپەن سەنۋشىلەر قاتارى ارتتى عوي؟

- ارينە، ءومىردى وزگەرتىسى كەلەتىن بەلسەندىلەر ىنتى-شىنتىسىمەن باسەكەگە تۇسۋدە. جالپى، پرايمەريزدىڭ ەرەكشەلىگى نەدە؟ بىرىنشىدەن جاريالى تۇردە جار سالىنۋدا. ويى بار ساياساتتان ءۇمىتى بار ازاماتتار وسىعان ءتۇسىپ جاتىر. كىم كوپ رەيتينگ جينايدى سايتتا ءبارى كورىنىپ وتىرادى. سول ازاماتتاردى تىزىمگە قوسىپ سالامىز دەپ وتىر. بۇل تۇرعىدا الماتى قالالىق فيليالى ناتيجەلى جۇمىس ىستەۋدە. ءاربىر كانديداتتىڭ كەزدەسۋلەرى، دەباتتاعى سويلەگەن سوزدەرى جەلگە ۇشىپ جاتقان جوق.

- الماتى قالاسىنىڭ فيليالىنىڭ جۇمىستارىن وزگە وڭىرلەرگە ۇلگى رەتىندە كورسەتۋگە بولا ما؟

- مىندەتتى تۇردە. سەبەبى، الماتى الىپ شاھار. مادەنيەتتىڭ عانا ەمەس، ساياساتتىڭ دا باستاۋى وسى شاھار. سوندىقتان، جىلدار بويى قالىپتاسقان تاعىلىمدى تاجىريبەنى بۇگىنگى باسشىلار زامان تالابىنا ساي جاڭعىرتىپ وتىر دەپ ەسەپتەيمىن.

- ءسوز سوڭىندا پرايمەريزدەن قانداي ناتيجە كۇتۋگە بولادى دەگەن ساۋالعا جاۋاپ بەرسەڭىز!

- پرايمەريز تۋرالى اڭگىمە شىققاندا كوپتەگەن ادام قارسى شىقتى. وي بۇنىڭ ءبارى وتىرىك، «نۇر وتان» ەشقاشان وزگەرە المايدى دەپ. بىراق، ۇگىت-ناسيحات باستالعالى بەرى حالىقتىڭ كوڭىل-كۇيى جاقسى جاعىنا قاراي وزگەردى. مىسالى، الماتى قالاسىنداعى كەزدەسۋلەردە حالىقتىڭ قىزىعۋشىلىعى قاتتى ەكەنىن بايقايمىن. سەبەبى، سايلاۋشىلار كانديداتتارمەن كەزدەسۋ كەزىندە ۇلكەن پىكىر-تالاس جاسايدى. سوندىقتان مۇنىڭ ءوزى ۇلكەن ناتيجە. جۇيە دەموكراتيالانا تۇسسە جۇرت وسىعان سەنۋگە ءازىر وتىر. باستى ماسەلە وسى سەنىمدى جوعالتىپ الماۋلارى كەرەك. پرايمەريزدىڭ جەمىسى دە، جەڭىسى دە وسى.

- سۇحباتىڭىز ءۇشىن ۇلكەن راحمەت!

Abai.kz

7 پىكىر