جۇما, 27 قاراشا 2020
COVID-19 قازاقستاندا. جۇقتىرعاندار — 129213. جازىلعاندار — 115384. قايتىس بولعاندار — 1990
قوعام 1402 0 پىكىر 24 قىركۇيەك, 2020 ساعات 11:27

التاي كولگىنوۆ: كىتاپحانالار قىسقارتىلمايدى!

10 قىركۇيەك كۇنى نۇر-سۇلتان قالالىق سۋبەكتىلەردى وڭتايلاندىرۋ جونىندەگى كوميسسيانىڭ وتىرىسى ءوتىپ، وندا ءماسىليحات دەپۋتاتى ميراس شەكەنوۆ كىتاپحانالاردى قىسقارتۋدى ۇسىنىپتى. وسى ارقىلى پرەزيدەنت توقاەۆ بيىلعى جولداۋىندا ايتقان مەملەكەتتىك شتاتتى قىسقارتۋ تۋرالى تاپسىرماسىن ورىنداۋ كەرەكتىگىن العا تارتقان.

ءماسىليحات دەپتاتىنىڭ ويىنشا، كىتاپحانالاردى قىسقارتسا، ءبىلىم سالاسىنداعى مەملەكەتتىك قىزمەتكەرلەردىڭ سانىن جىل سوڭىنا دەيىن 10 پايىزعا قىسقارتۋعا مۇمكىندىك بار كورىنەدى.

بۇل ماسەلە قوعامدا قىزۋ تالقىلاندى. كوپشىلىك كىتاپحانالاردى قىسقارتۋعا قارسىلىق ءبىلدىردى. پرەزيدەنتتىڭ مەملەكەتتىك قىزمەتكەرلەردىڭ سانىن ازايتۋ تۋرالى تاپسىرماسى ۇكىمەتتەگى باس ارتىق كادرلارعا قاراتىلعانىن ەلوردا شەندىلەرىنىڭ ەسىنە سالۋعا تىرىسقان. «كولگىنوۆتىڭ جارناماسى كورشى ەلدىڭ تىلىندە عانا جاسالا ما؟» اتتى جازبامىزدا ءبىز دە ءوز ويىمىزدى ايتتىق.

وسى ماسەلەگە بايلانىستى نۇر-سۇلتان قالاسىنىڭ اكىمى التاي كولگىنوۆ تە ءوز ويىن ءبىلدىردى. 24.kz تەلەارناسىنىڭ ەفيرىندە اكىم كىتاپحانالاردىڭ قىسقارتىلمايتىنىن ايتتى.

- بيىلعى كارانتين كوپ دۇنيەگە باسقاشا كوزقاراسپەن قاراۋعا مۇمكىندىك بەردى. كارانتين ۋشىعىپ تۇرعان جازعى ايلاردا 80% قاشىقتان جۇمىس ىستەدىك. سول كەزدە مەملەكەتتىك قىزمەتكەرلەردى قىسقارتۋعا بولاتىنىنا كوز جەتكىزدىك. پرەزيدەنتىمىز جولداۋدا جىل سوڭىنا دەيىن مەملەكەتتىك قىزمەتكەرلەردى 10 پايىزعا ازايتۋ تۋرالى ايتتى.

بىراق كىتاپحانالاردى قىسقارتۋ تۋرالى اڭگىمەنىڭ قايدان شىققانىن بىلمەيمىن. مەن دە جەلىدەن كوردىم، ونى كىم ويلاپ تاپقانىن بىلمەدىم. ول قاتە ۇعىم. بىرىنشىدەن كىتاپحانالارعا تيسۋگە بولمايدى. كىتاپ - ءبىلىم قازىناسى. كىتاپحانالاردى جاپقانشا، ادامداردى تارتۋىمىز كەرەك. ەلەكتروندى كىتاپ بولسىن، ونلاين وقىسىن، كىتاپحانا كەلىپ وقىسىن، ادامدار كىتاپ وقۋى كەرەك. سوندىقتان كىتاپحانالار قىسقارتىلمايدى. كىتاپحانالارعا تيىسپەيمىز، - دەدى كولگىنوۆ.

Abai.kz

0 پىكىر