سەيسەنبى, 27 قازان 2020
COVID-19 قازاقستاندا. جۇقتىرعاندار — 110542. جازىلعاندار — 105675. قايتىس بولعاندار — 1796
1159 2 پىكىر 24 قىركۇيەك, 2020 ساعات 10:51

فرانتسيا پرەزيدەنتى حالىقارالىق توپتى شىڭجاڭعا جىبەرۋگە شاقىردى

فرانتسيا پرەزيدەنتى شىڭجاڭدا مۇسىلمان توپتاردىڭ قۇقىعى تاپتالىپ جاتقانى تۋرالى اقپاراتتى تەكسەرۋ ءۇشىن حالىقارالىق توپتى قىتايدىڭ سولتۇستىك-باتىسىنداعى ايماققا جىبەرۋگە شاقىردى.

پرەزيدەنت ەممانۋەل ماكرون 22 قىركۇيەكتە بۇۇ-نىڭ باس اسسامبلەياسى جيىنىندا فرانتسيا مۇسىلمان توپتاردىڭ جاعدايىنا الاڭداپ وتىر دەدى.

بۇۇ-نىڭ ەسەبىنشە، قىتاي شىڭجاڭ ولكەسىندە ساياسي لاگەرلەر اشىپ، وندا ءبىر ميلليوننان استام ۇيعىر، قازاق جانە باسقا دا مۇسىلمانداردى قاماۋدا ۇستاعان. پەكين بۇل ورتالىقتاردى ەكسترەميزممەن كۇرەس ماقساتىندا اشقانىن ايتىپ، وعان قامالعاندار جاڭا كاسىپ ۇيرەنىپ شىعادى دەيدى. باتىستاعى زەرتتەۋ ورتالىقتارى مەن ادام قۇقىعىن قورعاۋ ۇيىمدارىنىڭ مالىمەتىنشە، لاگەرلەردە ازاپتاۋ، زورلىق-زومبىلىق كورسەتۋ، ەركىنەن تىس جۇمىس ىستەتۋ جانە وزگە دە ادام قۇقىعىن ورەسكەل بۇزۋ جايتتارى بار.

قىتاي بيلىگى اقش-تى جانە باتىس ەلدەرىن شىڭجاڭداعى ماسەلەنى اسىرا سىلتەپ كورسەتەدى دەيدى. بىراق بۇۇ مەن باتىس ەلدەرىنىڭ وكىلدەرىن شىڭجاڭعا كىرگىزبەي وتىر.

ۇيعىرلار – شىڭجاڭ وڭىرىندە تۇرىپ جاتقان ەڭ ءىرى بايىرعى ەتنيكالىق توپ. وندا ۇيعىرلارمەن بىرگە تۇركىتىلدى وزگە دە مۇسىلمان توپتار: قازاق، قىرعىز، تاجىك، دۇنگەندەر تۇرادى.

اقش بۇعان دەيىن شىڭجاڭداعى قىسىمعا قاتىسى بار دەپ قىتايدىڭ ءبىراز شەنەۋنىگىنە جانە بەينەباقىلاۋ كامەرالارىن جانە تەحنولوگيا جاسايتىن كومپانيالارىنا سانكتسيا سالعان.

Abai.kz

2 پىكىر