كۋاگەرلەر بەلارۋس استاناسىنىڭ ورتالىعىندا اتىس بولعانىن حابارلادى دەپ جازادى Tut.By. وندا قارسىلىق اكتسياسىنا شىققانداردى قاتىگەزدىكپەن ۇستاعان. قوسىمشا كۇش قۇرىلىمدارى كەلگەننەن كەيىن، اتىستىڭ داۋىسى ەستىلگەن. "ينتەرفاكس" وقتى اۋاعا قاراي اتقان بولۋى كەرەك دەپ بولجام جاسايدى.

سارسەنبى كۇنى كۇش قۇرىلىمدارى نارازى حالىقتى ۇلى وتان سوعىسى مۋزەيىنەن كەرى قۋعان. زارداپ شەككەندەر تۋرالى اقپارات بار.

"مينسك باتىر قالا" ەسكەرتكىشى ماڭىنا بەس-جەتى مىڭ ادام جينالعانى حابارلانعان. بىراق كەيىن ول جەرگە اسكەر بارىپ، حالىقتى ىعىستىرىپ، ادامداردى جاپپاي ۇستاي باستادى دەپ حابارلايدى ازاتتىقتىڭ بەلارۋس قىزمەتى.

كەشكى سەگىزدەر شاماسىندا قارسىلىق بىلدىرگەندەر بىرنەشە كوشەنى جاۋىپ، كولىك قوزعالىسىن توقتاتتى دەپ حابارلايدى Nexta تەلەگرام-كانالى.

بەلارۋستە نارازىلىق شارالارى جالعاسىپ جاتقان شاقتا الەكساندر لۋكاشەنكو انت بەرىپ، پرەزيدەنت قىزمەتىنە كىرىستى. يناۋگۋراتسيا ءراسىمىنىڭ بولاتىنىن كوپ ادام بىلمەگەن. ونىڭ وتەتىنى جايلى الدىن الا حابارلانبادى. مەملەكەتتىك "بەلتا" اگەنتتىگىنىڭ جازۋىنشا، "سالتاناتتى ءراسىم" 23 قىركۇيەكتە تاۋەلسىزدىك سارايىندا وتكەن.

لۋكاشەنكو بەلارۋس تىلىندە انت بەرگەن. بۇدان سوڭ انت بەرگەنى جايلى اكتىگە قول قويىپ، ورتالىق سايلاۋ كوميسسياسىنىڭ ءتورايىمى ليديا ەرموشينا وعان بەلارۋس رەسپۋبليكاسى پرەزيدەنتىنىڭ كۋالىگىن تاپسىرعان.

"ناستوياششەە ۆرەميا" ارناسىنىڭ حابارلاۋىنشا، سارسەنبى كۇنى تاڭەرتەڭنەن باستاپ مينسك تۇرعىندارى تاۋەلسىزدىك سارايى الدىندا اسكەري تەحنيكا مەن ساربازدار تۇرعانىن كورگەن. يناۋگراتسيا جايلى سىبىس شىقسا دا ساياساتكەرلەر ونى جوققا شىعارعان.

ەلدە 9 تامىزدان بەرى نارازىلىق شارالارى جالعاسىپ كەلەدى. نارازىلار پرەزيدەنت سايلاۋىنىڭ قورىتىندىسى بۇرمالاندى دەپ ەسەپتەيدى. ولار لۋكاشەنكو وتستاۆكاعا كەتىپ، ەلدە جاڭادان ءادىل سايلاۋى ءوتۋى ءتيىس دەيدى.

66 جاستاعى بەلارۋس باسشىسى نارازىلىققا شىققانداردى كۇشپەن باسىپ، كوپتەگەن ازاماتتار قاماۋ ورىندارىندا ازاپتاۋعا ۇشىراعانىن ايتقان.

بۇعان دەيىن وپپوزيتسيا جەتەكشىسى سۆەتلانا تيحانوۆسكايا يناۋگۋراتسيا وتكىزۋ زاڭسىز بولادى دەپ مالىمدەگەن.

Abai.kz